3
1 Nangkuamo koie, himina arimo niwangusako merongaa Kristus, moicoomo kami u'ungkee hapa da da'a hai suruga, dahano totoro Kristus hai muanano Apu Alla. 2 Pekiriomo hapa da hai suruga, osiemo mepekiriako da hai wita'ea. 3 Kana'umpe aricomiumo mate, ronga Apu Alla da tongoo toramiu merongaa Kristus. 4 Ki leu mpendua Kristus pu'uno toraahanto, dakomiumo nta inonto merongaa hai pina'owose'ano.Mesipa'ako sipa da tonia
5 Nangkuamo koie, mihawiakomo luwu da pinokeahakono pelaroamiu die hai wita'ea, kana ko'ira: endeo, moweweu ngkabaria, napsuu, mokeahako da mosa'o, mosuku'ako kawasa, da pengkenano mesomba hai ka'apu-apu. 6 Luwuo ko'ira yahomo da pokomosa'oo larono Apu Alla hai miano da sai nunu'o po'eheno. 7 Kanasi na'ana da ari niweweumiu hai laro ntoraamiu iponoha. 8 Sawali diekana mibasiakomo luwu di'ira: sa'o laro, mekikilowu, patudu mosa'o, montumbu, ronga mogau da upali nigau. 9 Mi'osie mpekakule-kulepi, kana'umpe aricomiumo luuhio sipano wotolumiu da mengkau ronga niweweuno, 10 kami mpake'o sipamiu da tonia, da e'elengua pinokontoniano Apu Alla, da padadicomiu kami ntewali kana gambarano. Patuduno kami nto'ori to'uo Apu Alla. 11 Larono die da kana, nahinamo teposengkano miano Yahudi ronga da sa'iaa, miano da ari mesuna ronga da sai da'a, miano sasukuto ronga da sa'iaa atawa miano ngkuno,a ata ronga da sa'iaa ata, nangkuamo Kristus da kontu'uma ronga da meronga mponohakita.
12 Nangkuamo koie, comiu miano ntinindahakono Apu Alla da teruruki ronga da telou, kahioomo kami ngkopololaro, mobata mompeehawa, owawa mpelaroa, mogau moluu, ronga sabara. 13 Osie mekapodiohako sawali mimpeka'ampu-ampuni ki da'a da mekasalaki, kana'umpe Apu ariomo ampunicomiu, kahioomo kami ngkana na'amiu. 14 Ronga da wawoiho luwuo koie yahoo mekalolaro, kana'umpe koiemo da santo'u-to'uahano mokoboboto'o luwu.
15 Kahioomo mapuhino Kristus kai pomparenta hai bolo mpelaroamiu, kana'umpe tendenomo koie, kami meniboboi ntewali pokosangkano me'asa wotolu. Ronga mpontarimakasi. 16 Kahioomo pompotisuno Kristus da dompa kawasa kai poo'iahio pelaroamiu. Kahioomo kami mpekapotisu'ako ronga mpeka'oli-oliwiako pinehawa motu'a. Kahioomo kami mpelagu'ako mazmur ronga lagu mporeree kai tii lagu rohani, kami mpontarimakasi hai Apu Alla hai bolo mpelaroamiu. 17 Pera hapa nta nigaumiu ronga nta niweweumiu, kahioomo kami weweuho meronga neeno Apu Yesus, ronga mpontarimakasi hai Apu Alla Tamanto, tendenomo Iaa.
Atorano miano asa rapi
18 Comiu tina da kosampora, turusio po'eheno samporamiu, kanamo koie da po'eheno Apu.
19 Comiu na'amiu tama da kosamotu'a, milou'o samotu'amiu, osie kasario.
20 Comiu anadalo, minunu'o petenano miano motu'amiu pera dahando kanahi, kana'umpe da kanamo koie da pokosanaa'o pelaroano Apu.
21 Comiu tama ana, mi'osie popoetiakondo'o ka'awai anamiu, kana'umpe dahoo nta motewe larondo.
22 Comiu ata, minunu'o dahano tenakomiu ponggawamiu die hai wita'ea, osie te'iaasi hai ra'i-ra'indo kando sanaa, sawali kami santo'u-to'u ronga momee hai Apu. 23 Hapa da niweweumiu, kahioomo kai laronto'umiu, kana hi tenakomiu Apu, na'iaa miano. 24 Dakomiumo to'orio himi daa nta tarimaa tilari kana gadimiu mebinta hai Apu Yesus Kristus. Kana'umpe Iaamo pe'apua dahamiu mohedo. 25 Inai da mosalaki, dahoo nta niwolohiako niweweuno, kana'umpe Apu Alla nai peruruki miano.