2
1 Mokeahaku kami nto'orio kana'umpe pekorangku meta'oakokomiu, ronga ko'ira miano hai Laodikia, kai tii ko'ira miano da sai da'apo mento'oriaku. 2 Kaku weweuho kana koie, kai moroso larondo ronga boboto pekalola-lolaro. Kanamo koie kai morodo pelaroando hindo paha to'uo ronga to'orio hicuamo Kristus koie rahasiano Apu Alla. 3 Kana'umpe hai boto wotoluno Kristus dahanomo tewuniako luwu pinehawa motu'a ronga ponto'ori da ko'angga hai Apu Alla. 4 Kaku po'awaakomiu kana koie, kai osie da'a miano da mokomporeakokomiu'o gauno da mandara. 5 Kana'umpe mau kicu mentalahicomiu, hai larongku dakitasi mperonga. Mohende'o larongku hicu ontokomiu tora te'atoro ronga parasaea morodo hai Kristus.Kristus mondo'ano toraaha
6 Aricomiumo mangaku hicua Yesus Kristus koie Apumiu. Nangkuamo koie, kahioomo kami ntora boboto'akono. 7 Kahioomo kai kohaka toramiu hai Iaa, ronga Iaamo da tewali watu mpompu'uino dahamiu wanguo toramiu. Kahioomo kai morodo parasaeamiu, kana da ari pinepopotisu'akomiu, ronga pelaroamiu kai mohende sadia montarimakasi.
8 Midagai'o kai osie da'a te'asa miano da moko'akala'akokomiu'o gau da sai hina gunano, mokomporeakokomiu'o pompotisu da mebinta hai manusia teposoro-soro ronga hai kasangi-sangia, na'iaa mebinta hai Kristus. 9 Kana'umpe mondo'ano luwu sipano Apu Alla, koiemo hai wotoluno Kristus daahano. 10 Ronga koa'anomo toraahamiu hai Iaa. Iaamo da kuasaiho luwu da momparenta ronga da mengkuasa. 11 Tendenomo Iaa, aricomiumo nisuna, na'iaa suna kana poweweuno miano, sawali sunano Kristus, yahoo bintanio niweweuno wotolu ngkodosamiu. 12 Kana'umpe tempomiu nibaho, kowatinomo himi kinoburu merongaa Kristus hai larono koie pebaho'a. Ronga mimperongaamo niwangusako mebinta hai matea, tendenomo himi mparasaeaho kuasano Apu Alla da wangusako mebinta hai raro miano mate.
13 Iponoha icomiu kowatino miano mate tendenomo dosa, ronga nami da'a nunu'o Boku Parentano Musa nasami da'apo tewiso tewali umatino Apu Alla, sawali diekana Apu Alla nampotorakomiu merongaa Kristus. Apu Alla ariomo ampunio luwu sinalakinto. 14 Madosakita tendenomo hito limpakio Boku Parentano Musa, sawali Apu Alla nangkikihio koie sura dosa da bebeaticita, kai alaa pasoo hai keu mpinotalambe. 15 Na'icomo dahano Apu Yesus nangihira pera da mengkuasa ronga da mpomparentai laamoa kai luuhio kuasando, kando tewali pekondoando miano me'alu kana miano nterako da sininta.
U'ungkee kawasano suruga
16 Nangkuamo koie, mi'osie moturusio miano kai pasalakomiu mekona hai kinaamiu ronga nindo'umiu, atawa hi sami da'a pokomaroaho oleo owoseno agama, atawa kontorano wotiti, atawa oleo mpekolia. 17 Luwuo ko'ira te'iaasi kana to'u nunuano hapa-hapa danta leu mperumbui, mainakaa da santo'u-to'uno koiemo Kristus. 18 Osie moturusio miano da pura-pura meparuru ronga mpesomba hai mala'ekati, kando gau-gaukomiu ronga alaa tilari mpeponangimiu. Ko'ira miano mereree'ako niamata da ari inontondo, ronga mentaba'ako pekiri ngkodosando. 19 Nando da'amo mpe'ungkaa morodo hai Apu Yesus da kapalaiho wotolu, ronga da piaraa, naamo kokoriakono'o ia koie omputa kai boboto, kai to'ori tora tewali miano nto'ori kana da po'eheno Apu Alla.
20 Mina arimo mate merongaa Kristus, ronga tepulosicomiumo hai kuasano kasangi-sangia, yo hapa kami daapo tora kana miano da kinuasaino wita'ea, ronga nunu'o pera giuno atora kana die, 21 « Osie mohenderi diie, osie mongkaa koie, osie mohedo diide! » 22 Luwu koie atora te'iaasi mekona hai hapa danta pura ki pinakemo, kanano kinaa. Ronga koie atora mepu'u hai parenta ronga pompotisuno to manusia. 23 Menonaa, ontoahano koie atora moicoo, kana'umpe miano da nunu'o koie atora kana to'u miano da sambahea nunu'o po'ehe mpantano, meparuru, ronga paturu'o wotoluno. Sawali nasai hina gunano koie atora nta tulumio miano kai pokotaha'o kea-keano. a