Surano i Paulus hai jema'a
Kolose
Salamu
1
1 Die sura mebinta hai aku i Paulus, rasuluno i Yesus Kristus nunu'o po'eheno Apu Alla, ronga hai Timotius petilato, 2 nta dungku hai petilato umatino Apu Alla da konianto'u nunu'o Kristus hai jema'a Kolose. Kahioomo Apu Alla Tamanto kai peehawakomiu ronga mapuhiakomiu'o barakati.Amala ronga montarimakasi
3 Koa ko'amalaakokomiu, sadiakami montarimakasi hai Apu Alla Tamano Yesus Kristus Apunto, 4 hicona modeaho parasaeamiu hai Yesus Kristus, ronga pololaromiu luwu miano mpe'asa imanimiu, 5 tendenomo da pinerahi-rahimiu, da pinasadiano Apu Alla hai suruga, kana da ari pinodeamiu iponoha, tempono dungkukomiu pompotisu da menona, yahoo Lele Mohende. 6 Koie Lele Mohende upuomo wita'ea ronga tewaliomo barakati hai miano me'alu, kana da ari kadadia hai comiu, isomiu modeaho ronga paha'o koie pompeehawano Apu Alla da santo'u-to'uno. 7 Da ari potisukomiu koie luwu yahoo i Epafras, simbau mpohedomami da telou, atano Kristus da konianto'u mohedo tendenomo cita. 8 Iaamo da mo'awaakami himi mpekalolaro tendenomo pohedoano Sangkoleono Apu.
9 Nangkuamo koie, sa'isomami modeaho lelemiu, nako paisa ari-ari amala mo'itaakokomiu, kai poweekomiu Sangkoleono Apu pinehawa da motu'a ronga pompaha, kami nto'orio po'eheno Apu Alla da santo'u-to'u. 10 Ehepo hai laro ntoraamiu kai te'angga Apu, ronga dahomo nta sanaa larono hai luwu da niweweumiu, kami daa kowua'ako pera pohedoa da moico, kai tii ponto'orimiu dadaano Apu Alla kai tetiani moico. 11 Ehepo kai pokomorosokomiu kuasano ronga korano Apu Alla da owose, kami motende sabara tineiho pera karasai. 12 Ehepo kai sanaamo laromiu ronga montarimakasi hai Apu Alla Tamanto. Iaamo da mo'eheako kami itai mo'awa tilari hi ari mompasadia'akondo umatino hai laro mpomparentaano da molinyaa. 13 Iaamo da ari luarakokita mebinta hai kuasa da rondoma, kai wawakita hai pomparentaano Anano da telou. 14 Koiemo Anano da ari hudakita, yahomo kai te'ampuni dosa sinalakinto.
Pompokulaloihano Yesus Kristus
15 Yesus Kristus koiemo gambarano Apu Alla da sai inonto. Iaamo da meri'ou da'a ka'iaa luwu da ari pinadadi. 16 Kana'umpe tendenomo Kristus, kai pompokoda'a Apu Alla pera da da'a hai suruga, kanapo die hai wita'ea, mau da inonto ronga da sai inonto, da owose, da kuasa, da momokole, ronga pera da momparentai laamoa. Kai pinadadi luwu da da'a mentete hai Kristus ronga nta pereree'ano. 17 Iaamo da meri'ou da'a ka'iaa ko'ira pera da meda'a. Luwu da meda'a, Iaamo da ari atoro'o kando pohedo moico mperonga-ronga. 18 Iaamo da kapalaiho jema'a, ronga jema'a kanamo wotolu mpantano. Iaamo da meri'ou mewangu mebinta hai mateaha, yahomo kai tewali da kontu'uma ka'iaa luwu da da'a. 19 Kana'umpe po'ehe mpantanosi Apu Alla kai mondo luwu sipano hai Yesus Kristus. 20 Ronga mentete hai Iaa, kai pokomoicoo Apu Alla luwu da da'a hai wita'ea ronga hai suruga. Reano Yesus da tesolo hai keu mpinotalambe penteteanomo kai pinokontepokona manusia hai Apu Alla.
21 Iponoha toramiu mentalahio Apu Alla, ronga midaluo hai bolo mpinehawamiu ronga niweweumiu da mosa'o. 22 Sawali diekana, kai mate wotoluno i Kristus, penteteanomo hi pokomoicokomiu Apu Alla kami ntepokonaakono. Kanamo koie poweweuno Apu Alla comiu, kami mowua hai ra'ino, ronga sai tekebaako naamo sai pinosala'i. 23 Nangkuamo koie, kami ngkonianto'u parasaea morodo ronga motende, naamo osie tebintani hai hapa da pinerahi-rahimiu tendenomo Lele Mohende da ari pinodeamiu, da upuomo wita'ea hai tontono langi. Ronga i'aku die i Paulus tewaliakumo miano ntinena da moleleako koie Lele Mohende.
Pohedoano ronga karasaino i Paulus
24 Diekana mohende'akumo hicu daa marasai tendenomo comiu. Kana'umpe kai marasai wotolungku, hicuna mokongkoa'o karasaino Kristus tendenomo jema'a, yahoo wotoluno. 25 Kaku tewali miano ntinenano jema'a, nangkua Apu Alla da patugasiaku kaku potisu'akokomiu'o luwu haratiano kai mondo. 26 Iponoha koie haratia yahoo me'asa rahasia da tewuniako tepo'etu-etu ta'u ronga tepoposoro-soro lee. Sawali diekana koie rahasia teleleakoomo hai luwu umatino. 27 Kai weweuho kana koie Apu Alla, kando mento'orio umatino hi kawasa ronga owose koie rahasia nta tarondo pera suku. Koie rahasia yahoo Kristus da hai bolo mpelaroamiu, kami mperahi-rahio himi daa nta merongaa hai pina'owose'ano.
28 Koiemo Yesus Kristus da nileleakomami hai upu-upuo miano. Ko'oliwiakondo'o ronga motisu'akondo'o pinehawa motu'a, kako to'ori wawahira hai Apu Alla kana miano nto'ori da boboto'akono Kristus. 29 Koiemo da pinekoraakongku kaku tampelako wukungku, meronga kuasano Kristus da mekora mohedo hai laro wotolungku.