Filipi i

Surano i Paulus hai jema'a

Filipi

Pobetekino Gau

Tempono i Paulus lako moleleako Lele Mohende hai wonua Eropa, iso'ano tealo yahoo hai kota Filipi, da da'a hai propinsi Makedonia. Mau ki da'a miano kokeena da sai ehee i Paulus, dahirasi na'anda da ehe parasaea. Sa'arino i Paulus bintanio Filipi, pempi-pempiahira jema'a Filipi pokatuo doi nta tulumio.

Sa'arino tealo kira-kira hopulu ta'u, kai petorungku koie i Paulus hai kota Roma. Sapodeaho leleno i Paulus jema'a Filipi, kando tena'o i Epafroditus kai lako mowawaakono doi. Sa'arino tealo opia wotiti, yahopo i Paulus kai tena'o i Epafroditus kai pohule hai Filipi ronga wawaa die sura.

Patuduno i Paulus kai poburi die sura nta tulurahira miano Filipi dadaano hai bolo ntorungku. Mopoe'o larono hi podeaho leleno miano Ngkarasitee da sai tepokonano ronga da mompotisu mpore. Mau kicana koie, i Paulus mohende'o ronga momperahi-rahi da moico, tendenomo parasaeano hai Yesus Kristus.

Patuduno i Paulus kai poburi die sura nta montarimakasi tendenomo petotoano jema'a Filipi da ari tinarimano tempono marasai. Ko'orua, oliwihira kando sabara moseka hai larono karasai. Pino'itano kando owawa mpelaroa kana Apu Yesus, osie te'iaasi wotolu mpantado da pinehawado. Kai pokompehawa'ira, tendenomo pompeehawano Apu Alla kando boboto'akono Yesus Kristus nangkua parasaeando, na'iaa tendenomo hindo nunu'o atorano agama Yahudi. Kai oliwihira kando tora mentepokona, kai tetiani me'alu miano da parasaea. Kai po'awaakondo patuduno kai tena'ira i Epafroditus ronga i Timotius lako awahira. Kai oliwihira kando dagai'ira miano mosa'o da mompotisu da tesala.

Sipano miano Ngkarasitee da tegambara die hai sura yahoo, mohende, motende pinehawa, boboto, ronga morodo parasaeano hai Yesus Kristus.

Ihino sura

1. Salamu (1:1-2).

2. Montarimakasi ronga amalaakondo jema'a Filipi (1:3-11).

3. Mau ki tetorungku, me'alu miano da mpodeaho Lele Mohende (1:12-26).

4. Oliwi kando tora tepokona ronga sai tekebaako (1:27 – 2:18).

5. Reree'o Timotius ronga Epafroditus da mohedoakono Apu (2:19-30).

6. Oliwi kando dagai'ira miano da mompotisu da tesala (3:1 – 4:1).

7. Oliwi kando mohende ronga boboto'akono Apu (4:2-9).

8. Pontarimakasi tendenomo doi da pinokatundo ronga salamu (4:10-23).