Atorano anadalo ronga miano motu'a
6
1 Comiu anadalo, kahioomo kami nunu'o po'eheno miano motu'amiu, nangkua koie da tekona ronga da po'eheno Apu. 2 « Pa'angga'o tamau ronga tinau, » kana'umpe diemo parenta da meri'ou da kodandi kanahi: 3 Kiu pa'angga'o tamau ronga tinau, « dahoo nta moico tuarau ronga mentaa umuruu die hai wita'ea. »a 4 Ronga comiu tama ana, mi'osie pokomosa'oo pelaroando anamiu, sawali piara moicohira nunu'o pompotisuno ronga oliwino Apu.Atorano ata ronga ponggawa
5 Comiu da tewali ata, kahioomo pelaroamiu kai bibi momee nunu'o po'eheno ponggawamiu die hai wita'ea, ronga misanto'u-to'u, kana himi nunu'o po'eheno Kristus. 6 Osie te'iaasi hai ra'indo kimi mpohedo kami mpokosanaa'o larondo, sawali kana atano Kristus da santo'u-to'u weweuho po'eheno Apu Alla. 7 Pohedoa dahamiu tepo'ata, kahioomo kami hedoo metuu-tuu laro, kana Apu Alla da nilayanimiu, na'iaa te'iaa hai miano. 8 Mimpeehawa'o, pera miano, kana ata atawa da sa'iaa ata, ki arimo moweweu da moico, dahoo nta mo'awa wolohino mebinta hai Apu.
9 Ronga comiu apuno ata, miweweuhira kai moico kana koie, ronga osie u'umeetiakondo'o hukuma. Kahioomo kami nto'orio hi me'asasi Apumiu hai suruga, da sai meruruki miano.
Sandata mamusuno Apu Alla
10 Kompura-puraano, kahioomo kami mokoraako kuasano ronga korano Apu, himina boboto'akonomo. 11 Mimpake'omo luwuo sandata mamusuno Apu Alla, kami nto'ori ta'oo akala mosa'ono ponggawano bilisi. 12 Kana'umpe da nirora'into na'iaa to manusia, sawali yahoo setani ronga kasangi-sangia da parentaa ronga da kuasaiho die wita'ea da rondomaako dosa, naamo kuasa da mosa'o hai laamoa. 13 Nangkuamo koie, mimpake'omo luwuo sandata mamusuno Apu Alla, kami ntule'isi meta'o, ki dungkumo oleo dahamiu nta tepora'iakono da mosa'o, ronga ki arimo luwu koie, kami daasi moroso.
14 Dadi, mimpentade morodomo, kami mpekokoriako ngkona, ronga mebabu utiako da po'eheno Apu Alla, 15 ronga karumiu kai pesapatu'ako pelaroa ehe leleako Lele Mohende da mapuhio penaa. 16 Pera da nirora'imiu, kahioomo kami sadia merereihako parasaea, kana'umpe te'iaasi parasaea kami nto'ori popatee luwuo mata mpuano ponggawano bilisi da kolanga-langa. 17 Ronga mintarimaamo topi uti, yahoo salama'a, kai tii taano Sangkoleo, yahoo haratiano Apu Alla.
18 Pera danta pino'itamiu, mi'amalamo nunu'o pompotisuno Sangkoleono Apu, ronga dagai'o kami osie mo'otu amalaakondo mianono Apu Alla. 19 Ronga mimpo'itaakuo, kai poweehaku Apu Alla gau da tekona ronga moseka kicu poleleako rahasiano Lele Mohende. 20 Tendenomo koie Lele Mohende i'aku die da kana miano ntinena, dahakumo terante hai bolo ntorungku. Mimpo'itaakuo kaku moseka gau'o da menona.
Oliwi ronga salamu
21 I Tikhikus petilato da telou, ata ntinenano Apu da konianto'u, iaamo danta mo'awaakomiu luwu lelengku, kami nto'orio dadaangku ronga pohedoangku. 22 Diemo patudungku kaku tena'akokomiu'o, kami nto'orio dadaamami, ronga kai pokomorodoakomiu'o laromiu.