Tora molinyaa
5
1 Nangkuamo koie, comiu kowati anano Apu Alla da telou, mimpoweweumo kana da niweweuno Apu Alla. 2 Mintoramo mpekalolaro, kana pololarono Kristus comiu, dungku kai soroo wotoluno kana pesomba ronga kurbaa da mowondu da pokosanaa'o larono Apu Alla tendenomo cita.3 Sawali da endeo ronga pera da mowuse atawa da lodoko, mau mponenee, mi'osie to'u. Dosa da kana koie nai pantasi da'a hai umatino Apu Alla. 4 Kanasi penda, osie da'a gau ngkabaria, gau ntaiwelo, atawa kosu'i-su'i mosa'o, kana'umpe koie nai pantasi. Sawali da moico yahoo montarimakasi hai Apu Alla. 5 Mimpeehawa'o moi-moico: nahina miano endeo, atawa miano mowuse, atawa miano lodoko, batuano miano da mosomba ka'apu-apu, danta mo'awa tilari hai laro mpomparentaano Kristus ronga Apu Alla. 6 Dagai'o kai osie da'a miano da gau-gau'akokomiu'o da sai hina gunano, kana'umpe niweweundo miano madoraka da kana koie da pokomosa'oomo larono Apu Alla. 7 Dadi, mi'osie to'u mesimbau'akondo ko'ira miano daakana.
8 Menonaa, comiu na'amiu iponoha, nasami penunu po'eheno Apu, yahomo kami ntora hai laro rondomaa. Sawali diekana molinyaakomiumo tendenomo himi mparasaeahomo Apu. Nangkuamo koie, kahioomo kami ntora molinyaa. 9 Kana'umpe da molinyaa kowua'ako da moico, ronga da tekona, kai tii da menona. 10 Mimpepagurumo kami mpaha'o da pokosanaa'o larono Apu Alla. 11 Mi'osie itai mpoweweu da sai hina gunano, da niweweundo miano da mpoo'ia hai rondomaa, deenapo tisu'akondo'o koie hi tesala. 12 Kana'umpe mau montulura koie da niweweundo da tewuniako, namokoko'anuomo miano. 13 Sawali pera niweweundo da niwincahino da molinyaa, inontoomo. Kana'umpe luwu da inonto koie molinyaahomo. 14 Nangkuamo kando kanahi miano:
« Pe'engkamo da moturi,
pewangumo mebinta hai matea,
ronga dahoo nta panarico Kristus. »
15 Nangkuamo koie, midagai'o toramiu, mi'osie kana miano mpore, sawali kami motu'a mpinehawa. 16 Osie pokosia-sia'o wotumiu, sawali kai koguna, kana'umpe die wotu pono'akoomo niweweu mosa'o. 17 Nangkuamo koie, mi'osie pore, sawali kahioo kami nto'orio da po'eheno Apu. 18 Ronga mi'osie memolangu, kami mpoweweu da sa'ia-iaa, sawali moicoano kai kuasaicomiu Sangkoleono Apu. 19 Kimi mpogau pada-pada comiu, kami mpogau'ako ino'awa mebinta hai mazmur, ronga lagu mporeree, kai tii lagu rohani. Laronto'umiumo mpelagu reree'o Apu. 20 Kahioomo kami sadia montarimakasi hai Apu Alla Tamanto, ki hapamo da inawamiu, tendenomo Yesus Kristus Apunto.
21 Kahioomo kami mpatimbali turu pada-pada comiu, tende po'anggamiu Kristus.
Torano miano ngkosampora
22 Comiu tina da kosampora, turu hai samporamiu, kana turumiu hai Apu. 23 Kana'umpe tama da kapalaihomo tina, kana Kristus yahomo da kapalaiho jema'a. Iaamo da pokosalama'o jema'a, yahoo wotoluno. 24 Nangkuamo koie, malengu turuno jema'a hai Kristus, kanamo na'ana koie tina kai sadia turu hai samporano.
25 Comiu tama da kosamotu'a, lou'o samotu'amiu, kana polouno Kristus jema'a, dungku kai soroo wotoluno tendenomo jema'a. 26 Kai weweuho kana koie, yahoo nta tindahako'ira tarono Apu Alla, hina arimo baho'akondo'o e'e ronga haratiano Apu Alla kando memowua. 27 Kanamo koie Apu Yesus poweweuno jema'ano kai to'ori mentade mokokolaro hai ra'ino, sai pinosala'i, nahina te'asa nta nimosa'oakono, sawali namolinyaa mpelaroa ronga sai tekebaako. 28 Kanamo koie, tama osie sai lou'o samotu'ano kana polouno wotoluno. Inai da lou'o samotu'ano, yahomo da lou'o wotoluno. 29 Kana'umpe nahina miano da ari kokoleaho wotolu mpantano, sawali namoweeho mongkaa ronga piaraa, kana poweweuno Kristus jema'ano. 30 Kana'umpe citamo die pokosangka wotoluno. 31 Kana da teburi hai Boku Haratiano Apu Alla, « Nangkuamo yo tama kai daa nta bintaa tamano ronga tinano kando boboto samotu'ano, yahopo orua'ira kando tewali me'asa wotolu. »a 32 Diemo pompotisu da olaro, sawali nunu'o ponto'orincu, mekona hai boboto'ando koie Kristus ronga jema'ano. 33 Mau ki kana'umpe, mi'osie sai lou'o samotu'amiu kana wotolumiu, ronga tina kai haragai'o samporano.