Surano i Paulus hai raro jema'ano wonua
Galatia
Pobetekino Gau
Die sura nta lako'ano hai raro jema'a Karasitee hai wonua Galatia. Iso-isono miano Galatia nando to'orio haratiano Apu Alla, yahomo kando mpesomba hai ka'apu-apu. Kai leu i Paulus leleako Lele Mohende hicua i Yesus Mokole Pompokosalama, yahopo asa ntilarano miano Galatia kando mparasaea.
Sabintaniomo i Paulus koie wonua Galatia, kando leu miano da mompotisu'ako da sai tekona. Kanahindo, « Nai koa kito parasaeaho Yesus kato salama, sawali paraluu'o kato mpesuna, ronga nunu to'uo luwu atorano agama Yahudi kana da teburi hai Boku Parentano nabii Musa. »
Sapodeaho koie i Paulus hapa da pompotisudo, kai mosa'o larono. Kai poburi die sura lako hai miano Galatia kai pokomenteehakondo'o pompotisu da menona. Da pinokodungkuno die hai sura yahoo:
Kato pinokontekona hai ra'ino Apu Alla te'iaasi kito parasaeaho i Yesus. Na'iaa tendenomo hito mpesuna atawa kito nunu'o parenta suere. Kahioomo kato pepopotisu nunu'o nabii Ibrahim. Koie i Ibrahim parasaeaho Apu Alla, yahomo Apu Alla kai angga'o miano ntekona. Icita na'anta, kito parasaeaho Apu Yesus, Apu Alla dahoo nta anggakita miano ntekona, ronga dakita nta awaa barakati da ari nidandino Apu Alla hai Ibrahim.
Hai larono pasala 5 ronga 6, i Paulus mokomenteeho pololarondo miano Ngkarasitee tendenomo hindo parasaeaho Apu Yesus. Ronga koie pololaro mentoda'omo hai pera niweweundo hai laro tora-torando.
Ihino sura
1. Salamu (1:1-5).
2. Kana'umpe i Paulus kai tewali rasulu (1:6 – 2:21). Na'iaa manusia da potoro'o tewali rasulu. Lele Mohende da nileleakono na'iaa mebinta hai manusia, sawali nantarimaa mebinta hai Yesus Kristus.
3. Pompotisu dadaano salama'a (pasala 3 – 4). Kato pinokontekona tendenomo hito parasaeaho i Yesus, na'iaa tendenomo nunu'o Boku Parentano nabii Musa.