Surano i Paulus hai raro jema'ano wonua
Galatia
Salamu
1
1 Die sura mebinta hai aku i Paulus, rasulu. Na'iaa manusia da tena'aku ronga na'iaa miano da potoro'aku, sawali da potoro'aku yahoo Yesus Kristus ronga Apu Alla Tamanto da ari wangusako i Yesus mebinta hai raro miano mate. 2 Salamu mebinta hai luwu petila da perongangku nta dungku hai comiu raro jema'a hai wonua Galatia.3 Kahioomo Apu Alla Tamanto ronga Apu Yesus Kristus kando peehawakomiu ronga mapuhiakomiu'o barakati. 4 Hina nunu'o po'eheno Apu Alla Tamanto, kai soroo wotoluno Apu Yesus tendenomo dosanto, kato tehuda mebinta die wotu da pono'ako sa'o. 5 Kahioomo Apu Alla kai pinoko'owose samengka-mengkauno. Amin.
Me'asasi Lele Mohende
6 Tekangka to'uaku himi merare'ea teboli'i bubungkuiho Apu Alla da ari boboicomiu tendenomo pompeehawano Yesus Kristus, kami ntibo mponunu lele suere da kanahimiu moicoo. 7 Santo'u-to'uno, nahina lele suere da moico, sawali dahoo miano da pokomalio pinehawamiu ronga mokea balia'o koie Lele Mohende mebinta hai Yesus Kristus. 8 Nangkuamo koie, mau kicua cami atawa me'asa mala'ekati da mebinta hai suruga montuluraakomiu lele mohende da sai mengkena da ari nileleakomami, koie miano kahioomo kai konaa katundari! 9 Da ari kanahimami, diekana kupo'awaakokomiu penda, ki daa miano da moleleakoakomiu lele mohende da suere ka'iaa da ari tinarimamiu, kahioomo kai konaa katundari!
10 Dadi, diekana dahaku bara mokea kai reree'aku miano atawa Apu Alla? Dahaku bara mepereree hai to manusia? Kicu daa mokea kana koie, i'aku diie na'iaamo atano Kristus.
Kana'umpe i Paulus kai tewali rasulu
11 Nangkuamo kaku po'awaakokomiu raro mpetilaku, koie Lele Mohende kudaa mo'awaakokomiu na'iaa mebinta hai to manusia. 12 Kana'umpe na'iaa hai to manusia ariangku tarimaa ronga da ari motisu'aku, sawali yahoo niamata kaku tarimaa mebinta hai Yesus Kristus.
13 Kana'umpe dakomiumo modeaho banguku iponoha daangkupo me'agama Yahudi, kaku pakasea ngkanaicoo luwuo jema'a umatino Apu Alla ronga e'elengua pokohancuru'o. 14 Kicua miano da me'agama Yahudi, nahinamo pengkenangku, kana'umpe kuna moku-mokua nunu'o atorado pembue'angku ka'iaa ko'ira simbauku da pe'asa ntorangku ronga da pe'asa sukuku.
15 Sawali tendenomo pompeehawano Apu Alla i'aku, kai boboihaku ronga tindahakoaku daangkupo hai larono malo-malo. Moiconoo Apu Alla 16 kai popo'ontoniakuo Anano danta nileleakongku hai miano da sa'iaa miano Yahudi, ronga koie tempo nahina dahangku mo'ita oliwi hai miano. 17 Naku da'a lako hai Yerusalem awahira da mperi'ouhakuo tewali rasulu, sawali lako'angku yahoo hai wonua Arab. Aripo na'ico, kaku pohule mbule hai Damsik.
18 Otolu ta'upo da ari tealo, yahopo kaku lako hai Yerusalem awaa i Petrus,a kako pekato'ori, ronga moo'ia hai laicano hopulu olima oleo mengkauno. 19 Sawali naku po'awa ko'ira rasulu meha; da inawangku te'iaasi i Yakobus, petilano Apu Yesus. 20 Dahosi Apu Alla da ontokita, kupo'awaakokomiu, hapa die kudaa buriakokomiu'o menonaa, naku da'a mekulepi.
21 Arinopo koie kaku lako hai wonua Siria ronga Kilikia. 22 Ronga ko'ira jema'a Ngkarasitee hai Yudea nando paisapo ontoo ra'incu. 23 Te'iaasi ndopodeahomo da kanahindo miano, « Koie miano da ari pakaseakita iponoha, diekana iaamo da leleako da pinarasaeanto, mainakaa nimpia po'eheno yahoo mokohancuru'o koie da pinarasaeano diekana. » 24 Yahomo kando mereree'o Apu Alla tendenomo i'aku.