I Paulus inakui'omo hai rasulu
2
1 Sa'arino tealo da hopulu opaa ta'u, yahopo kaku lako penda hai Yerusalem dakamimo meronga i Barnabas, kai tii Titus dahakumo wawaa. 2 Kaku lako nangkua Apu Alla da tena'aku lako. Hai laro ntepo'awamami ko'ira da tewali ponggawa dahangkumo tulura ntesincaakondo'o Lele Mohende da nileleakongku hai miano da sa'iaa miano Yahudi, kaku osie mokokau ngkabaria hai laro mpohedoangku da ari tealo ronga da konainoo niweweungku.a 3 Deenapo i Titus da leu salako'aku nai da'a pinakisaa kai pesuna, mau kicua iaa miano Yunani. 4 Menonaa, dahoo miano da dadarihira miano Ngkarasitee kando mpesuna. Ko'iramo petila pura-pura da mpewuwuniako kando mpewiso nunukita nta solidiki'o ki daamo lalesa miano da boboto'akono Yesus Kristus tepulosi mebinta hai Boku Parentano Musa. Po'ehendo kato tepo'ata mbule hai atorano agama Yahudi. 5 Sawali mau te'asantoniapo, nako ehe turu hai ira, kana'umpe kai e'elenguasi koie Lele Mohende da menona sadia da'a hai comiu.6 Ronga ko'ira da inangga konee, mau ki kana'umpe te'anggado iponoha, nai da'a paraluukuo, kana'umpe Apu Alla nai peruruki miano, mau ko'ira da te'angga, nando da'a tena'aku tianio pompotisuku. 7 Deenapo ndo'ontoomo hicua Apu Alla da patugasiaku lako leleako Lele Mohende hai miano da sa'iaa Yahudi, kana i Petrus hai miano Yahudi. 8 Kana'umpe Apu Alla da ari moweeho pohedoa i Petrus kai tewali rasuludo miano da ari mpesuna, yahomo da ari moweehaku pohedoa hai miano da sai mpesuna. 9 Sando ontoo hicua Apu Alla da meehawa'aku, yahopo koie i Yakobus, i Petrus,b kai tii i Yahya, da inangga ponggawano jema'a, kando pongkeni'akuo lima, kanasi penda i Barnabas, kana peto'o boboto'amami, kako lako hai ira miano da sa'iaa miano Yahudi, sawali ira lako'ando hai miano Yahudi. 10 Da pino'itando te'iaasi kako e'elengua mompeehawa ko'ira miano da kadee-dee, yahoo pohedoa dahano ehe to'u pelaroangku.
I Paulus awaiho i Petrus
11 Sawali saleuno i Petrus hai Antiokhia, kaku awaiho hai ra'ino, tendenomo hi tesala poweweuno. 12 Kana'umpe daandopo sai meleu ko'ira tinenano i Yakobus, koie i Petrus dahopo ehe me'asa mpongkaahakondo ko'ira miano da sa'iaa to Yahudi. Sawali saleundo, nai ehemo okudahi'ira, tendenomo momeetakohira ko'ira miano Yahudi da kanahi, luwu miano mparasaea paraluu'o mpesuna. 13 Ko'ira miano Yahudi meha itaihiramo mompe'anu-anuto'u kana i Petrus. Nangkuamo koie, mau i Barnabas na'ana itai tepongaruhi tendenomo niweweundo da mompe'anu-anuto'u.
14 Sawali saku ontoo bangudo hi sai nunu'o pompotisuno Lele Mohende da menona, nilakoku awaiho koie i Petrus hai ra'indo luwu miano na'ico kanahi, « Kicua ico'o miano Yahudi tora kana miano da sa'iaa miano Yahudi, nau da'amo nunu'o sarano miano Yahudi, yo hapa kau pakisaa'ira miano da sai mpesuna kando tora kana miano Yahudi? »
Pinokontekona tendenomo parasaeaho Yesus Kristus
15 Nunu'o miano motu'amami cami diie yahoo miano Yahudi, na'iaa miano suere suku da mangkedosa. 16 Sawali koto'oriomo hi sahina te'asa miano da pinokontekona hai ra'ino Apu Alla tendenomo monunu parentano i Musa, te'iaasi ki parasaeaho Yesus Kristus. Nangkuamo koie, icami na'amami kako parasaeaho Yesus Kristus ronga pinokontekona tendenomo koie parasaeamami, na'iaa tendenomo moweweu parentano i Musa. Kana'umpe nahina te'asa miano da pinokontekona tendenomo nunu'o parentano i Musa.
17 Sawali kicua icami, da mokea pinokontekona tendenomo Yesus Kristus, menteehomo inawakamisi hicona ngkodosa, yahoo bara batuano, koie Kristus da mompokongkodosa? Na'iaa to'u! 18 Kana'umpe kicu lako mowangu mbule parentano i Musa da ari sinosa'ongku, mentoda'anomo hicuamo i'aku miano da sai monunu parenta. 19 Kanaakumo miano mate, nahinamo gunano parentano i Musa hai aku. Koiemo parenta da popateaku, yahopo kaku tora nunu'o Apu Alla. Ariakumo nibasiropa meronga Kristus, 20 ronga na'iaamo i'aku da tora, sawali koie Kristus da tora hai larongku. Ronga die toraahangku hai wotolungku diekana, yahoo tendenomo hicu parasaeaho Anano Apu Alla da lolaroaku, da ari soroo wotoluno tendenomo i'aku. 21 Naku da'a sai ehee pompeehawano Apu Alla, kana'umpe ki daa miano da pinokontekona tendenomo nunu'o parentano i Musa, nahinamo gunano hi ari mate koie Kristus.