Salama tendenomo parasaea
3
1 O miano Galatia mpore, dakomiu bara kona ntino'ori, dungku kami mpinokompore? Na'iaa bara koie Yesus Kristus da ari nibasiropa, ku'ari tarangkaniakokomiu'o kai mente-mentee'ea hai ra'imiu? 2 Te'iaasi die kudaa nta metukanaicomiu kanahi: Yahomo bara himi ntarimaa Sangkoleono Apu tendenomo himi nunu'o parentano i Musa? Atawa tendenomo himi mparasaeaho Lele Mohende da pinodeamiu? 3 Kana'umpe kami dungku pore kana koie? Iso-isomiu parasaea, pomperahi-rahiamiu hai Sangkoleono Apu. Diekana dakomiu bara nta merapio da pinatuduimiu kami daa perahi-rahio kamokoraa mpantamiu? 4 Nahina bara gunano luwu toraaha da ari tinealohimiu? Hioo kai daa sai nta hina gunano? 5 Apu Alla ariomo moweekomiu Sangkoleono ronga moweweu tinekangkaako hai comiu. Hapa kai daa nta kana koie? Tendenomo himi daa nunu'o parentano i Musa? Atawa tendenomo himi mparasaeaho Lele Mohende da pinodeamiu?6 Kanamo na'ana i Ibrahim parasaeaho Apu Alla, nangkuamo Apu Alla kai angga'o hicua miano ntekona.a 7 Dadi minto'oriomo, pera miano da parasaea, ko'iramo leeno i Ibrahim. 8 Koie Boku Haratiano Apu Alla peri'ouahano tino'ori hicua Apu Alla nta mokontekonaa miano da sa'iaa to Yahudi tendenomo parasaea. Koiemo lele mohende da meri'ou nileleako hai Ibrahim kanahi, « Tendenomo ico'o, kando daa nta nibarakati luwuo suku. »b 9 Kai nibarakati koie i Ibrahim hina mparasaea. Dadi, ko'ira luwu miano da parasaea itaihiramo nibarakati na'anda kana i Ibrahim.
10 Sawali konahiramo katundari pera miano da momperahi-rahi hindo daa nta pinokontekona tendenomo nunu'o parentano i Musa. Kana'umpe dahoo teburi hai Boku Haratiano Apu Alla kanahi, « Kona ntunda'iramo miano da sai konianto'u nunu'o pera da teburi hai Boku Parentano nabii Musa. »c 11 Mentoda'omo hi sahina te'asa miano da pinokontekona hai ra'ino Apu Alla tendenomo hi nunu'o parentano i Musa, kana'umpe dahoo teburi, « Miano da tekona tendenomo parasaeano dahoo nta mo'awa toraaha. »d 12 Sawali parentano i Musa nai da'a mepu'uako parasaea, kana'umpe dahoo teburi kanahi, « Inai da nunu'o parentano i Musa dahoo nta tora tendenomo hina weweuho. »e
13 Sawali koie Kristus ariomo hudakita mebinta hai katundari da mebinta hai parentano i Musa. Iaamo da konaa katundari tendenomo icita, kana'umpe dahoo teburi kanahi, « Kona ntunda'o miano da nibaehako hai laa ngkeu. »f 14 Tendenomo koie da ari niweweuno Yesus Kristus, kai dungku'ira suku suere barakatino Apu Alla da ari nidandino hai Ibrahim. Kicana koie, cita da parasaea po'awakitamo Sangkoleono Apu da ari nidandino.
Parentano i Musa atawa dandino Apu Alla
15 Raro mpetila, moicoomo kaku po'ala gambara hai tora-toraanto tepo'ole-oleo: Me'asa miano hi ari medandi ronga ariomo inotuhi, koie dandi nahina da tule'i boli'io atawa tianio. 16 Kanamo koie luwuo dandi da ari kanahino Apu Alla hai Ibrahim ronga hai turunano. Nai da'a teburi kanahi, « hai ira turunau », batuano me'aluo miano. Sawali da teburi yahoo: « hai turunau »,g batuano te'iaasi me'asa miano turunano, yahoo koie Kristus. 17 Patudungku yahoo: peri'ouhomo dandino Apu Alla hai Ibrahim, yahopo kai pinoweehi Boku Parentano nabii Musa. Olotano i Ibrahim ronga i Musa dahoo pato etu tolu pulu ta'u. Nangkuamo koie dandi da meri'ou nai to'orimo pinopateako atawa tekikihiako Boku Parentano nabii Musa da merumbui. 18 Kicanano te'iaasi miano da nunu'o Boku Parentano nabii Musa danta mo'awa tilari mebinta hai Apu Alla, koie batuano, nahinamo gunano dandino Apu Alla. Sawali santo'u-to'uahano, Apu Alla moweeho Ibrahim koie tilari tendenomo na'ari dandi'o.
19 Kicana koie, hapa gunano parentano i Musa? Sa'arino Apu Alla dandi'o i Ibrahim, perumbuinopo kai pinoweehi koie Boku Parentano nabii Musa kai mentee sinalakino miano. Koie parenta te'iaasi pinadala dungku leuhano turunano i Ibrahim da ari nidandi. Koie parenta pinokodungkudo mala'ekati hai Musa da tewali toleano to manusia. 20 Kina me'asa miano danta mo'otuhi, nai da'amo paraluu tolea. Kanamo koie, ki pedandi Apu Alla, Iaa pantano da otuhio, nai pompake tolea.h
21 Kicana koie, nai pekakona bara koie parentano i Musa ronga koie dandino Apu Alla? Nahina oleono dahando sai mpekakona. Kana'umpe kicanano arimo pinoweehi parenta da tule'i pokontoraa miano, matantuomo dahoo nta pinokontekona tendenomo parentano i Musa. 22 Sawali koie parentano nabii Musa da torungku'o luwuo to manusia hai bolo dosa. Dadi, te'iaasi ko'ira miano da parasaeaho Yesus Kristus danta tarimaa dandino Apu Alla.
23 Nasai da'apo dungku tempono kato to'ori parasaea, koie parentano i Musa kana to'u podagano katorungku da bosokita, dungku kai leu tempono Apu Alla mokomentoda'o i Yesus kato parasaeaho. 24 Dadi, koie parentano i Musa kana to'u da poteanakita, dungku kai leu koie Kristus, kato pinokontekona tendenomo parasaea. 25 Diekana leuhomo tempono dahanto nta parasaea, yahomo kasai da'amo dagaicita koie poteana.
26 Kana'umpe luwumiu yahoo anano Apu Alla, mina mparasaeahomo Yesus Kristus. 27 Kana'umpe luwumiu aricomiumo nibaho'ako neeno Kristus, ronga mesipa'akomo sipano Kristus. 28 Sakanano koie, nahinamo miano Yahudi atawa miano Yunani, nahinamo sangkinaa atawa da sa'iaa sangkinaa, nahinamo tama atawa tina, kana'umpe luwumiu bobotokomiumo hai Yesus Kristus. 29 Ronga nangkuamo comiu mianono Kristus, comiumo koie turunano i Ibrahim, ronga danta mo'awamo tilari da ari nidandino Apu Alla.