Nahinamo tepo'ataa
4
1 Koie da patudungku yahoo: me'asa ana'ate danta mo'awa tilari nahina teposengkano me'asa ata, ki sai da'apo tewali miano nto'ori, mau kicuamo iaa da ko'apuako luwuo koie hapa-hapa. 2 Dahopo kuasaiho ko'ira miano da piaraa ronga da pasipolee, dungku kai leu tempono da ari pinatantuno tamano. 3 Kanasi na'anta, hi sato da'apo tewali miano nto'ori, dakitapo tepo'ata hai atorano die wita'ea. 4 Sawali sadungkuno tempono, yahopo Apu Alla kai tena'o Anano da pinokohinano me'asa tina ronga da tora nunu'o parentano i Musa, 5 kai leu hudakita hito daa tepo'ata hai parentano i Musa, kato to'ori nineehako anano. 6 Himina ntewalimo anano Apu Alla, yahomo kai tena'o Sangkoleono Anano kai pewiso hai pelaroanto, ronga koie Sangkoleo da me'e'eta kanahi, « O Ama, O Tamangku. » 7 Dadi, comiu koie na'iaamo yo ata, sawali tewalicomiumo yo ana. Kicuamo comiu anano, comiumo danta tarimaa tilari mebinta hai Apu Alla.8 Iponoha nami da'apo to'orio Apu Alla, yahomo kami ntepo'ata hai ka'apu-apu da sa'iaa Apu Alla. 9 Sawali diekana minto'oriomo Apu Alla, atawa dadisi kito kanahi, Apu Alla da to'oricomiu. Kana'umpepo penda kami daa nta tegili mbule monunu ko'ira atorano wita'ea da modengke ronga da kadee-dee, kami ntepo'ata penda? 10 Yo hapa kami mponunu atorano miano Yahudi mekona hai oleo owose, wotiti, wotu, ronga ta'u? 11 Kaku temee-mee, te'iaamo kasahinamo gunano kokaungku hai comiu.
Pehawa'o dadaanto nimpia
12 Kupo'ita hai comiu, raro mpetilaku, kami ntewali kana i'aku, kana'umpe ariaku tewali kana icomiu. Nami paisapo salakiaku. 13 Minto'oriomo isoku leu leleako Lele Mohende hai comiu, kana'umpe wotolungku dahoo morungku. 14 Mau kicana koie wotolungku bebeaticomiu, nai da'a mokosisimiuo ronga nami da'a paruruaku, sawali milawatiaku kana mala'ekatino Apu Alla, deenapo kana to'u da lawatio pantano Yesus Kristus. 15 Yo hapa koie kahendepamiu nimpia kasai hinamo diekana? Kuto'oriomo kanahi koie nimpia kicanano tewali, dakomiumo nta sungki'akuo matamiu kami weehaku. 16 Diekana tewaliakumo bara musumiu, tendenomo hicu daa mo'awaakomiu da menona?
17 Ko'ira miano da mompotisu ntesala mokea to'uhira raesakokomiu, sawali nasando mongkote, ndona mokea sincalakokomiu mebinta hai aku, kami mokua nunu'ira. 18 Menonaa, moicoo miano ki mokua, podomo ki moicosi patuduno, ronga ki dada'iaangkonosi, osie te'iaasi hito daa mperonga. 19 Raro anaku, poeriakupo penda kana tina da dedea ntia tendenomo comiu. Dahoo nta e'elengua poeriaku dungku kai mentoda sipano Kristus hai laro ntoraahamiu. 20 Taperano moko'au larongku kato mperonga diekana, kaku to'ori mogau'akokomiu kai moluu, kana'umpe puraamo akalaku tendenomo comiu.
I Hagar ronga i Sarah
21 Comiu da mokea tora nunu'o parentano i Musa, mimpo'awaakuo, nami da'a bara to'orio hapa da teburi hai Boku Parentano nabii Musa? 22 Nai da'a bara teburi kanahi, hi orua koie anano i Ibrahim, me'asa anano hai atano tina, ronga me'asa anano hai tina da sa'iaa ata? 23 Anano hai atano tina tehina nangkua po'eheno manusia, sawali anano hai tina da sa'iaa ata tehina tendenomo dandino Apu Alla.
24 Die yahoo me'asa parere: Ko'ira da orua tina kowatino orua pedandi. Me'asa da mebinta hai tangkeno Sinai yahoo i Hagar danta ko'ana'ako ata. 25 I Hagar yahoo tangkeno Sinai hai wonua Arab. Kanamo Yerusalem diekana, kana'umpe torando me'o'ana yahoo mentepo'ata hai parentano i Musa. 26 Sawali i Sarah, tina lalesa, yahoo Yerusalem hai suruga. Iaamo petinaanto. 27 Kana'umpe dahoo teburi haratia kanahi,
« O tina ngkomba, mehawamo,
co'o da sai paisa mompokohina!
Pekoramo mogau kau daa mohende,
co'o tina da sai paisa dedea ntia!
Kana'umpe ico'o tina da moo'ia mpanta nta me'aluo ana'u
ka'iaa tina da kosampora! »a
28 Ronga comiu petilaku, comiumo da kana i Ishak, yahoo ana da tehina tendenomo pedandino Apu Alla. 29 Kana iponoha, koie anadalo da pinokohina tendenomo po'eheno manusia pakaseaho koie da pinokohina tendenomo Sangkoleono Apu. Kanasi diekana. 30 Sawali hapa kanahino Boku Haratia? « Saarihiramo koie ata ntina ronga anano, kana'umpe koie anano ata nai da'a nta mo'awa tilari merongaa koie anano tina da sa'iaa ata. »b 31 Kuamo koie, raro mpetilaku, cita die na'iaa anano tina ata, sawali yahoo anano tina da sa'iaa ata.