Oliwi kompura-puraano
13
1 Penduahakumo leu awakomiu, die nta kompentolungkumo. Hai Boku Haratiano Apu Alla dahoo teburi, « Luwuo kara-kara, dahano nta saha ki inotuhi, ki po'eheako orua atawa otolu saksii. »a 2 Iponoha arincu leu kompendua awakomiu, ariakumo mokompehawa'ira miano da mpoweweu dosa. Diekana hito daa mpekamentalahi, kupokompehawakomiu penda: Kicu leu awakomiu, naku da'a nta modio-diohakokomiu. 3 Dahaku nta moweekomiu buktii da pinokeahakomiu hicua Kristus da tena'aku mogau. Ronga koie i Kristus nai da'a mesipa molu'o hai comiu, deenapo popo'ontoniakomiu'o kuasano. 4 Menonaa tempono nibasiropa, modengkee, sawali diekana toraamo tendenomo kuasano Apu Alla. Cami na'amami molu'okami kana Kristus, sawali dakomiu nta ontoo hico tora pono-ponohaakono Kristus tendenomo kuasano Apu Alla.5 Ndoka mintandaiho paresaa wotolumiu, kimi daasi santo'u-to'u tora kana miano da parasaeaho Kristus! Paresaa pelaroamiu! Matantuomo dakomiu paha'o hicua Yesus Kristus da moo'ia hai pelaroamiu. Kana'umpe ki sai da'a, batuano nami da'a mongkona daamiu pinaresa. 6 Sawali pomperahi-rahincu mimpaha'o hi sako da'a sai mongkona daamami pinaresa. 7 Ko'amalaakokomiu hai Apu Alla, kai tulumicomiu kami osiemo mpoweweu da mosa'o. Patudumami na'iaa mepopo'ontoako hicua cami miano da inangga moico, sawali mokeakami kami mpoweweu da moico. Nai da'a mohapa kico inangga sai moico. 8 Kana'umpe nako tule'i moweweu da sai mengkena pompotisu da menona; sawali da ninunumami yahoo da menona. 9 Mohendekami hico modengke, asala comiu kami moroso. Yahomo ko'amalaakomiu, kami mpohule nunu'o mbule tora da tekona. 10 Koiemo sababuno kaku poburiakomiu die sura, hi saku da'apo awakomiu, kaku osie awaicomiu ronga hukumaakokomiu'o kuasano Apu, kicu dungkukomiu. Kana'umpe kaku pinoweehi kuasa, yahoo nta pokomorodoo imanimiu, na'iaa nta sosa'oo.
Salamu
11 Kompura-puraano, raro mpetila, kahioomo kami memohende, pokomoicoo toraamiu, ronga nunu'o oliwi. Tora meboboto ronga mentepokona. Apu Alla pu'uno pololaro ronga mapuhino penaanto nta merongakomiu. 12 Pada mpekasalamu ronga mongkeni lima peto'ono himi mpe'asa imani.b Luwu miano mpe'asa mparasaea mompokatuakokomiu salamu. 13 Pompeehawano Apu Yesus Kristus, ronga pololarono Apu Alla, naamo boboto'ano Sangkoleono Alata'ala danta merongakomiu.