Niamatano Paulus mebinta hai Apu Alla
12
1 Menonaa nahina gunano mereree mpanta. Sawali dahaku nta mereree mpanta'ako hi ari Apu Alla popo'ontoniaku niamata. 2 Kuto'orio me'asa miano Ngkarasitee da hopulumo opaa ta'u ari tealo, tinaarako dungku tengka ko'otolu hai suruga. (Naku da'a to'orio ki santo'u-to'u wotoluno da tinaarako atawa na'iaa, Apu Alla da to'orio.)a 3 Ku'ulangio penda: Kuto'orio koie miano hi tinaarako hai suruga. (Naku da'a to'orio ki santo'u-to'u wotoluno da tinaarako atawa na'iaa, Apu Alla da to'orio.) 4 Kai tibo tinaarako hai Firdaus kai pompodea hapa da sai pinoko'umbasakono miano ronga da sai niwukahi kai nigau. 5 Koie miano daakana da paraluu nirereeku, na'iaa wotolu mpantaku. Sawali wotolu mpantaku, te'iaasi nta mereree'ako hicu modengke. 6 Kicu mokea mereree mpanta, i'aku na'iaa miano mpore; da nigauku yahoo da menona. Sawali kuna metaha, kai osie da'a miano da telia angga'aku ka'iaa da ari inontono da niweweungku atawa modeaho hapa da ari kanahincu.7 Sawali kaku osie lalo'ea tetaba-taba tendenomo koie niamata da sai hina pengkenano, kai konaaku rungku hai wotolungku da kana tinenano ibilisi. Koiemo rungku da popoetiaku kaku osie tetaba-taba. 8 Pentolu kupe'e'eta hai Apu kai bintaaku koie rungku. 9 Sawali Apu namolawani, « Pompeehawaku co'o koa'omo, kana'umpe mondo'omo kuasangku hai laro modengkeau. » Nangkuamo koie, kolaloaku mohende mereree mpanta'ako hicu modengke, kai olumiaku kuasano Kristus. 10 Yahomo kaku mohende hi modengke wotolungku, hicu inare-are, hicu po'awa hali-hali, hicu pinakasea, ronga hicu pinokomasusa tendenomo Kristus. Kana'umpe kicu konainoo modengke, dahangkumo nta mokora.
I Paulus tewereakondo miano Korintus
11 Ariakumo tewali miano mpore da mereree mpanta, sawali comiu da pakisaa'aku. Santo'u-to'uno comiu da pantasi kami reree'aku. Kana'umpe mau ki sai hina pekonaangku, naku pompe'o'oo monangi hai ira koie rasulu da sai hina pengkenando. 12 Luwu peto'o tinekangkaako ronga niweweu da kuasa koiemo menteehano hicua i'aku rasulu; ariakumo sabara mokoda'aa hai tongamiu kami ontoo. 13 Hai larono hapa dahamiu sai pinaduli, kimi pinokompengkena jema'a meha? Ntada'a hi saku da'a bebeaticomiu. Tesala'aku bara hi saku da'a mo'itaicomiu sumbanga? Paraluu'o bara kaku po'ita ma'apu?
14 Diekana kompentolungkumo sadia nta lako awakomiu, ronga naku ehe nta bebeaticomiu. Kana'umpe naku da'a mokeahako inawamiu, sawali wotolumiu. Kana'umpe na'iaa anadalo da mo'u'ungkeakono nta tinoraakono miano motu'ano, sawali miano motu'a da mo'u'ungkeakono nta tinoraakono anano. 15 Nangkuamo koie, kai sanaa larongku nta weehakomiu'o kai pura luwuo hapa-hapangku, deenapo wotolungku. Dadi, kicana koie owoseno pompeehawaku comiu, pantasio bara ki sakura-kuranomo pompeehawamiu i'aku?
16 Minto'oriomo hi saku paisa bebeaticomiu. Sawali dahoo da kanahi i'aku die da akalakomiu ronga mokomporekomiu. 17 Dadi, ko'ira miano da tinenaku awakomiu, ariakumo bara tena'ira kando po'alaicomiu laba? 18 Ariakumo tena'o i Titus lako awakomiu, ronga montena petila da pe'asa imaninto lako salako'o. Dahoo bara na'ana koie i Titus mo'alaicomiu laba? Na'iaa bara oruakami hico pohedo, patudumami ronga caramami mengkenaa?
19 Ponto'orimiu bara, luwu da niburimami die patudumami nta pokontekonaa tesalamami? Na'iaa! Apu Alla to'orio luwu da kinahiimami hi nunu'o po'eheno Kristus. O raro mpetila da telou, luwuo niweweumami yahoo nta pokomorodoo parasaeamiu. 20 Dahaku temee-mee, te'iaamo kicu leu awakomiu, nami da'apo kana da pomperahi-rahincu, ronga i'aku naku da'apo kana da pomperahi-rahimiu. Te'iaamo ki daa da teposala, singgira, mokula mpelaroa, mokea tora mpanta, mekasosa-sosa'o, mesangkeli, mentaba, ronga mohitu. 21 Dahaku temee-mee, kicu leu awakomiu penda, kai pokomokoko'anuaku Apu Alla hai ra'imiu, kai pewowo larongku hina me'alupo miano da kodosa nimpia, nando paisapo nta boli'io endeondo ronga niweweu ngkabariado da sai pantasi.