1 Korintus i

Surano i Paulus da meri'ou hai jema'a

Korintus

Pobetekino Gau

Patuduno i Paulus kai poburi die sura hai jema'a Korintus yahoo nta wolohio surano miano Korintus da mo'ita oliwi, ki kana'umpe nta poweweu masa'ala da saba hai larono jema'a. Koie jema'a, da ari wanguo yahoo i Paulus. Korintus yahoo kota owoseno propinsi Akhaya da nikuasaino pamarenta Roma. Me'aluo ihino kota da mebinta hai suere wonua nangkua miano padangga. Montoeho adatino Korintus, sawali nando da'apo to'orio Apu Alla, ronga niweweundo mosa'oo; dahando mpesomba hai ka'apu-apu, sawali dahoo opi-opia rupa agama na'ico. I Paulus da iso-iso mowawaakondo koie Lele Mohende, yahomo kai da'a asa ntilara da parasaeaho Apu Yesus. Arino i Paulus na'ico, kai leu i Apolos, da mandara potisu'ira miano mparasaea hai Korintus dadaano Sala Salama'a.

Ari tealo opia wotiti, kando poburi sura miano Korintus nta lako hai Paulus. Diemo surano i Paulus da meri'ou, powolohino koie surando miano Korintus. Patuduno yahoo lawanio da pinetukanaakondo, ronga pokompehawa'ira tendenomo niweweundo da sai pantasi, kanano teposala'a hai larono jema'a, ronga da moweweu ngkabaria. Hai laro surano dahoo gau'o penda mekona kawi, carano mo'otuhi da tekona ronga da tesala, atora hai larono jema'a, kuasa da mebinta hai Sangkoleono Apu Alla, ronga pewanguano miano mate.

Hai pasala 13, i Paulus potisu'ira dadaano pololaro da santo'u-to'u, nangkua parenta da kolalo paraluu ka'iaa parenta suere.

Ihino sura

1. Salamu ronga montarimakasi (1:1-9).

2. Pompokompehawa kando osie teposala ronga moweweu mosa'o (1:10 – 6:20).

3. Dadaano kawi (pasala 7).

4. Dadaano pesomba hai ka'apu-apu (8:1 – 11:1).

5. Dadaano tina da metutuwi hi sambahea (11:2-16).

6. Atorano tewawe merongaa Apu (11:17-34).

7. Kuasa da mebinta hai Sangkoleono Alata'ala (pasala 12 – 14).

8. Niwanguano mbule miano mate (pasala 15).

9. Petotoa hai miano Ngkarasitee hai Yerusalem (16:1-4).

10. Pino'ita ronga salamu kompura-puraano (16:5-24).