Osie mekara-kara hai miano da sai parasaea
6
1 Kimi daa nta mekara-kara pada miano Ngkarasitee, yo hapa kami moseka lako mepe'urusi hai miano da sai to'orio Apu Alla? Moicoano mimpo'ita hai miano mparasaea danta otuhio kara-karamiu. 2 Nami da'a bara to'orio hicua miano mparasaea danta adili'o die wita'ea? Dadi, kicua comiu danta adili'o die wita'ea, nami da'a bara nta tule'i urusio kara-kara da mobata? 3 Nami da'a bara to'orio hicua cita danta adili'ira mala'ekati? Lalo'eahopo kara-kara biasa hai tora-toraanto tepo'ole-oleo. 4 Dadi, ki lako da'a kara-kara da kana koie, dakomiu bara nta mepe'urusio hai miano luara da sai inanggano jema'a? 5 Kaku kanahi kana die kami memokoko'anu. Nahinamo bara hai comiu miano da motu'a mpinehawa danta tule'i urusio kara-karado ko'ira petilano? 6 Deenapo miano Ngkarasitee pokompekara-kara'o petilano, ronga dungku'ando mepe'urusi na'iaa hai miano Ngkarasitee!7 Osiepo koma isala, himi daa nta mekara-kara, tesalakomiumo hai ra'ino Apu Alla! Dadisi kimi pinokomarugi atawa nirukusi. 8 Deenapo comiumo da rukusihira ronga mokomarugi'ira miano meha, kanapo petila mpe'asa imanimiu.
9 Nami da'a bara to'orio, pera miano da moweweu da mosa'o nai da'a nta awaa tilari hai pomparentaano Apu Alla? Mi'osie kulepio wotolumiu! Pera miano da endeo, da mesomba hai ka'apu-apu, da mesosanto'ori, da mesampora pada ntama, 10 da mononako, da lodoko, da mokua molangu, da mososa'o simbauno, ronga da merukusi, nahina tilarino hai pomparentaano Apu Alla. 11 Iponoha dahira hai comiu da mengkana ko'ira. Sawali diekana mowuakomiumo hai dosamiu. Apu Alla tindahakokomiu ronga mokontekonakomiu tendenomo kuasano Apu Yesus Kristus ronga Sangkoleono Apu Alla Apunto.
Oliwi mekona hai endeo
12 Dahoo da kanahi, « Luwuo halalakuo. » Sawali nai da'a luwuo koguna. Dadi, mau ki halalakuo luwu, sawali nahina te'asa dahangku ehe kai tepo'ata wotolungku. 13 Kanahimiu, « Kinaa tarono tia, ronga tia tarono kinaa. » Sawali orua'o dahoo nta mokolono'o Apu Alla. Wotolunto na'iaa tarono nta po'endeohi, sawali nta tarono Apu, ronga Apu da piaraa koie wotolunto. 14 Apu Alla da ari mokontoraa Apu Yesus mebinta hai matea, Iaamo da kuasa nta mokontoraa na'ana wotolunto.
15 Nami da'a bara to'orio, wotolumiu hicua pokosangkano wotoluno Kristus? Dadi, tule'io bara inala pokosangkano wotoluno Kristus, kai pinokontewali pokosangkano wotoluno tina endeo? Nai da'a to'u! 16 Atawa ntada'a nami da'apo to'orio, yo miano ki peduluakono miano endeo, pe'asa wotoluakonomo koie miano da endeo? Kana'umpe nadaa teburi hai Boku Haratiano Apu Alla, « Orua'ira kando tewali asa wotolu. »a 17 Sawali miano da boboto'akonomo Apu, Sangkoleono Apu ronga sangkoleono koie miano boboto'omo.
18 Osie mo'okudahi niweweu endeo. Kana'umpe luwuo dosa suere da niweweuno miano kadadiahano hai bungkuno kuli wotoluno. Sawali miano da endeo namosalaki koie hai wotolu mpantano. 19 Nami da'a bara to'orio wotolumiu hicua raha mpesombaa dahano Sangkoleono Alata'ala da moo'iahicomiu? Ronga Apu Allamo da moweekomiu koie Sangkoleono. Ronga koie wotolumiu na'iaa anu mpantamiu. 20 Apu Alla ariomo olicomiu ronga wada mputakomiu. Nangkuamo koie wotolumiu kai pa'angga'o Apu Alla.