Dadaano miano ngkosampora
7
1 Diekana dahaku nta gau'o ihino suramiu, himi ari moburiakuo kanahi, « Moicoo ki daa tama da sai kosamotu'a. » 2 Sawali tendenomo endeo, moicoo koie tama kai kosamotu'a, kanapo na'ana koie tina kai kosampora. 3 Kahioomo miano da kosampora kando pedulu moturi samporano. Nai moico yo tama ki sai ehe me'asa mpoturiakono samotu'ano. Atawa yo tina ki sai ehe me'asa mpoturiakono samporano. 4 Wotoluno tina na'iaa pantano da ko'apuako, sawali samporano. Kanamo koie na'ana tama, na'iaa pantano da ko'apuako wotoluno, sawali samotu'ano. 5 Mi'osie mekamentalahi, tabea kicuasi pogaumiu larono opia oleo, kami santo'u-to'u amala. Sa'arino koie, mimpedulumo mbule, kai osie bilisi nangicomiu tendenomo hi sami da'a tule'i mokotaha'o kea-keamiu.6 Die da kanahincu na'iaa parenta, sawali yo pe'oliwi. 7 Santo'u-to'uno po'ehengku ki daa luwu miano ehe kana i'aku kai osiemo mesinca. Sawali tee-tee'asa miano na'arimo tarimaa sipano mebinta hai Apu Alla. Me'asa miano suere sipano, ronga meha suere.
8 Pera miano da sai da'apo mesinca, ronga pera tina da walumo, diemo oliwincu: Moicoano kimi ntora mompanta kana i'aku. 9 Sawali ki sami mpokotaha'o kea-keamiu, kahioomo kami ngkosampora. Kana'umpe dadisi kimi ngkosampora, ka'iaa ki tunuicomiu napsuumiu.
10 Die petenaku hai miano da kosamporamo (sawali santo'u-to'uno na'iaa petenaku, yahoo parentano Apu): Tina da kosamporamo osie tepobintaakono samporano. 11 Sawali ki tabulumo teposinca, kahioomo kai poo'ia sai mesinca, atawa dame'akono samporano. Ronga yo tama nai tewali teposincaakono samotu'ano.
12 Ko'ira suere miano ku'oliwihira (na'iaa Apu da kanahi sawali i'aku): ki daa te'asa tama Ngkarasitee da kosamotu'aako tina da sai parasaeaho Apu Yesus, kai ehesi koie tina pono-ponohaakono samporano, koie tama osie bintaa samotu'ano. 13 Ronga ki daa tina Ngkarasitee da kosamporaako tama da sai parasaea, kai ehesi koie tama pono-ponohaakono samotu'ano, koie tina osie bintaa samporano. 14 Kana'umpe koie tama da sai da'a parasaea pantasiomo kai daa nta tewali umatino Apu Alla tendenomo koie samotu'ano da parasaeamo. Kanamo na'ana koie tina da sai parasaea pantasiomo kai daa nta tewali umatino Apu Alla tendenomo koie samporano. Ki sai kana koie, ko'ira anamiu nta dadino miano ngkaapiri; mainakaa santo'u-to'uahano, pantasihiramo kando tewiso hai umatino Apu Alla. 15 Sawali kicuamo koie miano da sai parasaea kai bintaa samporano, kahioomo kai bintaa. Kicanamo koie, nahina da koo'o koie tina atawa tama da parasaea. Sawali po'eheno Apu Alla kami ntepokona. 16 Kana'umpe nato da'a to'orio: comiu tina, aipo dakomiu nta tule'i wawaa samporamiu kai salama. Atawa comiu tama, aipo dakomiu nta tule'i wawaa samotu'amiu kai salama.
Tora kana isono boboicomiu Apu Alla
17 Kahioomo kami e'elengua tora kana hi ari Apu mompatantuakokomiu, kai kanasi dadaamiu tempono Apu Alla boboicomiu tewali Karasitee. Diemo atora hicu daa potisu'akondo'o luwu jema'a. 18 Kicanano da'a te'asa miano da arimo mesuna kai boboiho Apu Alla, koie miano osie mehapu kanahi nai paisa mesuna.a Kanamo ki da'a miano da sai paisapo mesuna kai boboiho Apu Alla, koie miano osiemo mepesuna. 19 Kana'umpe mesuna atawa sai mesuna nahina batuano. Da kontu'uma paraluu yahoo nunu'o parentano Apu Alla. 20 Moicoano tee-tee'asa miano kai tora kana isono boboiho Apu Alla. 21 Ki konaa tempo daau niboboi, daako tewali ata, nai da'a mohapa. Sawali kiu tule'i tewali miano da sa'iaa ata, osie sai weweuho. 22 Kana'umpe me'asa miano da tepo'ata, kai boboiho Apu, tewaliomo mianono Apu da lalesa. Naamo miano da sa'iaa ata, kai boboiho Apu, tewaliomo atano Kristus. 23 Apu Alla ariomo oli mputakomiu. Dadi, mi'osiemo penda tewali atano miano. 24 Dadi, raro mpetilaku, malengu dadaano toraamiu tempono boboicomiu Apu Alla, kahioomo kai dada'iaasi.
25 Diekana mekona hai miano da sai da'apo mesinca. Akoie naku po'awa parenta mebinta hai Apu. Sawali kana miano da tule'i pinarasaea tende pololarono Apu i'aku, dahaku nta moweekomiu oliwi. 26 Po'awangku, meehawa'o perano susa da nirora'into diekana, kolaloo moico kimi e'elengua tora kana dadaamiu diekana. 27 Ki daamo samotu'au, osiemo bintaa. Ki sai hinapo samotu'au, osiemo mo'u'ungke tina. 28 Sawali kiu ehe mesinca, na'iaa dosa. Kanamo na'ana koie waipode ki pesinca, na'iaa dosa. Te'iaamo perano da mesinca me'aluo karasai danta awaa wotoluno. Ronga mokeahaku kai osie awakomiu koie karasai.
29 Patudungku kana die, raro mpetila: Nai da'amo mengkau tempono. Metampu'u diekana, pera miano da kosamporamo, kahioomo hai laro ntoraando kai kana da sai kosampora. 30 Miano da mewowo kai kana miano da sai mewowo, osie mepekiriako hapa da pinewowoakono. Miano da mohende, kai kana da sai mohende, osie mepekiriako hapa da nimohende'akono. Miano da mo'oli, osie mepekiriako hapa da ari inolino. 31 Ongkundaano, miano da mompake hapa-hapano die wita'ea, kahioomo kai kana da sai marepo'ako koie hapa-hapa. Kana'umpe dadaano wita'ea diekana dahomo nta oru pura tempono.
32 Mokeahaku kami osie tewere. Tama da sai kosamotu'a te'iaasi danta pinekirino da mekona hai Apu, kana'umpe kai pokosanaa'o larono Apuno. 33 Sawali tama da kosamotu'amo, da me'a-me'alu pinekirino yahoo dadaano wita'ea, kana'umpe kai pokosanaa'o larono samotu'ano. 34 Yahomo kai tetila orua pinehawano. Tina da sai kosampora atawa waipode, pinehawano te'iaasi da mekona hai Apu, hina mokea luwuo wotoluno ronga penaano kai tinindahako tewali tarono Apu. Sawali tina da kosamporamo, tuduano pinehawano yahoo dadaano wita'ea, kana'umpe kai pokosanaa'o larono samporano.
35 Kuburiakomiu'o die luwu nta nimoicoakomiu, na'iaa nta halangicomiu, sawali mokeahaku, kami weweuho da tekona ronga laronto'umiu hedoo pohedoano Apu.
36 Ki daa te'asa tama da merasa'o hi sai da'a moweweu da pantasi hai kontolai samotu'ano, ronga samotu-motu'anomo koie waipode,b kai paraluumo nta mesinca, kahioomo kai nunu'o po'eheno. Na'iaa dosa, kahioomo kando kawi. 37 Sawali ki daa te'asa miano da otuhio hai pelaroano hi sai da'amo nta mesinca, mau ki daamo kontolai samotu'ano, ki sai da'asi pinakisaa sawali po'eheno pantano ronga ki daasi mokototogasio wotoluno, da niweweuno koie moicoo. 38 Dadi miano ki pesinca, moicoo, ronga miano ki sai pesinca, kola-kolaloopo moico.
39 Me'asa tina ki pesincamo, tekoo'omo hai samporano hi daapo tora. Ki matemo samporano, koie tina tewaliomo mesinca penda hai tama da ineheno; podo kaicuasi miano da parasaeaho Apu. 40 Sawali kolaloopo konantuara ki poo'ia mpanta, sai mesincamo penda. Koie po'awangku pantaku, sawali da ponto'orincu dahosi merongaaku Sangkoleono Apu Alla.