Pesomba hai ka'apu-apu
8
1 Diekana dahaku nta gau'o dadaano sinumbele da tinompa tewali pesomba hai ka'apu-apu.a Menonaa luwunto tomento'oriomo dadaano ka'apu-apu. Koie ponto'ori da pokomentaba'omo miano. Sawali kito pololaro, koiemo da pokomorosoo miano. 2 Ki daa miano da kanahi, me'aluo da tino'orino, santo'u-to'uahano, koie miano nai da'apo to'orio da tekona. 3 Sawali miano da lou'o Apu Alla, iaamo da tino'orino Apu Alla.4 Tewalio bara mongkaa sinumbele da ari tinompa tewali pesomba hai ka'apu-apu? Toto'oriomo koie ka'apu-apu santo'u-to'uno nahina. Ronga toto'oriomo hi me'asasi Apu Alla, nahina meha. 5 Mau ki daa me'alu da nineehako apu ronga sangia, mengkena hai langi ronga hai wita'ea, 6 sawali hai cita, te'iaasi me'asa Apu Alla, yahoo i Ama. Iaamo da ari weweuho luwu, ronga Iaamo kato daa tora. Ronga te'iaasi me'asa Apu, yahoo Yesus Kristus. Mentete hai Iaa kai dadi luwuo, ronga toranto yahoo hai Iaa.
7 Sawali mau kicana koie, nai da'a luwu miano to'orio. Dahoo iponoha da biasa mosomba ka'apu-apu. Dadi, dungku diekana dahirapo parasaeaho koie sinumbele da ari tinompa tewali pesomba hai ka'apu-apu, hicuamo tarono ka'apu-apu. Nangkuamo, hindo mpongkaa koie sinumbele, kando pomperasa hindo kodosamo, tendenomo nasando da'amo to'orio maina da tekona ronga maina da tesala. 8 Santo'u-to'uahano, na'iaa kinaa da moko'okudakita hai Apu Alla. Nato da'a nta marugi'ako ki sato kaaho, ronga nato da'a nta labaako kito kaaho.
9 Sawali mau kicana koie, mi'o'olokaa, te'iaamo kando tuuna hai dosa miano da modengke parasaeando, tendenomo himina lalesa weweuho da po'ehemiu. 10 Menonaa, daako to'orio hi sai da'a mohapa, kiu pongkaa sinumbele da tinompa tewali pesomba hai ka'apu-apu. Sawali ki daa petila'u koie da modengke parasaeano da ontoko hiu daa konainoo mongkaa hai laica mposombaando hai ka'apu-apu, koie miano dahomo nta tetiani eheno nta mongkaa da tinompa tewali pesomba hai ka'apu-apu. 11 Dadi tendenomo ponto'oriu, kai silaka koie petila'u da modengke parasaeano. Mainakaa, kai mate koie Kristus tendenomo iaa na'ana. 12 Ronga kiu posalaki hai petila'u kana koie, yahoo uluahako kai poweweu da inanggano tesala, batuano, co'omo da mosalaki hai Kristus. 13 Nangkuamo, kicuamo koie kinaa danta mokongkodosaa petilaku, naku da'amo nta paisa mongkaa da sinumbele, kai osie tuuna hai bolo dosa koie petilaku.