Hakuno ronga tugasino rasulu
9
1 Na'iaa bara i'aku miano lalesa? Na'iaa bara i'aku die rasulu? Naku da'a bara paisa ontoakono'o mata wotolungku koie i Yesus Apunto? Na'iaa bara comiu wuano pohedoangku hai Apu? 2 Mau miano suere kindo kanahi na'iaa i'aku rasulu, sawali comiu, matantuo dakomiumo nta akui'aku hicua i'aku rasulu. Kana'umpe kami mparasaeaho Apu, koiemo peto'ono hicua i'aku rasulu.3 Diemo polawanincu ko'ira miano da sai akui'aku. 4 Nahina bara hakumami nta mongkaa ronga mondo'u tendenomo pohedoamami? 5 Nahina bara hakumami nta wawaa samotu'a sa'imanimami hai laro lakoahamami, kana ko'ira petilano i Yesus, ronga rasulu suere, naamo koie i Petrus? a 6 Atawa te'iaasi bara i'aku ronga i Barnabas danta lako mo'u'ungke tinoraako mpantamami? 7 Nahina miano da lako mamusu kai petanggoi mpanta. Nahina miano da mombula angguru hai umano kasai pongkaa wuano. Ronga nahina tumpu mpakani da sai nta mondo'u susuno da pinakanino.
8 Hapa da nigauku die na'iaa pekirino to manusia, sawali mebinta hai haratiano Apu Alla. 9 Kana'umpe hai Boku Parentano nabii Musa dahoo teburi: « Osie kaloo ngangano sapi da konainoo mo'ii pae. »b Yo sapi bara da pineehawano Apu Alla? 10 Atawa koie parere mekona hai cita? Menonaa, kai teburi koie nangkua icita, kana'umpe miano da merakala ronga da mo'ii momperahi-rahi nta mo'awa tila hai pohedoando. 11 Hico arimo mbulaakomiu'o mantuno sangkoleomiu laro ntoraamiu, nai tewali bara na'amami kako po'awa tila ntinoraako mebinta hai comiu? 12 Ki da'a miano meha da kohaku nta mo'awa tilado hai comiu, nai da'a bara kolalo owose hakumami?
Sawali cami nako da'a mongkikitai kana koide. Deenapo kotanggoiho luwu karasai da nirora'imami, kai osie da'a da halangio peleleakoano Lele Mohende dadaano Kristus. 13 Petilaku, minto'oriomo, miano da mohedo hai raha mpesombaa, po'awaando tinoraakondo mebinta hai raha mpesombaa. Ronga miano da urusio pontompa'a pesomba po'awaa tilano mebinta koie hai pesomba. 14 Kanamo koie na'ana Apu ariomo patantuo miano da moleleako haratiano Apu Alla kai po'awa tinoraakono koie hai poleleakoano.
15 Sawali mau te'asamponoha, naku paisapo mongkikitai kana koide. Naku da'a burio die luwu kami weweuhakuo. Dadisi kicu mate, ka'iaa ke'isaa koie mehawa'angku, hicu leleako haratia sai kogadi. 16 Kicu leleako koie Lele Mohende, kana'umpe kaku daa nta mentaba'ako? Nangkuamo koie tugasincu. Masilaka'aku ki saku leleako Lele Mohende. 17 Kicu nunu'o po'ehe mpantaku, pantasio kaku po'awa gadi. Sawali nasaku da'a nunu'o po'ehe mpantaku, kaku weweuho kana koie hinangkua Apu Alla da patugasiakuo koie pohedoa. 18 Dadi hapa gadincu? Gadincu koiemo: leleako Lele Mohende sai kogadi, ronga naku da'a mongkikitai hakuku.
19 I'aku die, nahina te'asa miano dahangku tepo'ata. Sawali mau kicana koie, kuweweuhomo wotolungku tewali atano luwu miano, kaku to'ori mowawa miano hai Yesus Kristus kai me'a-me'alupo. 20 Kicu perongaakondo miano Yahudi, nta kana sipaku miano Yahudi, kaku to'ori wawahira ko'ira miano hai Yesus Kristus. Kicu perongaakondo miano da tora nunu'o parentano i Musa, sipaku kana to'usi ko'ira miano da nunu'o koie parentano, sawali santo'u-to'uno naku da'a tekoo'ako. Kaku weweuho kana koie, kaku to'orisi wawahira hai Yesus Kristus. 21 Kicu perongaakondo miano da sa'iaa Yahudi, dadaangku kana da sa'iaa Yahudi, da sai monunu parentano i Musa, kaku to'orisi wawahira kando nunu'o Yesus Kristus. Sawali mau kicana koie, na'iaa batuano sai nunu'o parentano Apu Alla. Deenapo santo'u-to'ungku nunu'o parentano Kristus. 22 Kicu perongaa miano da modengke imanindo, i'aku na'angku kana-kana ira, kaku to'orisi wawahira kando nunu'o Yesus Kristus. Ongkundaano, dadaando luwu miano, kanasi na'angku, mau ki mohapa, kaku to'orisi wawahira hai Yesus Kristus kando mesalama. 23 Luwuo koie kuweweuho tendenomo Lele Mohende, kaku to'ori itai mo'awa tila barakati kokeena.
24 Minto'oriomo hai petandia, luwu miano itai mekalulu, sawali te'iaasi me'asa danta moponangi yahomo da mo'awa hadia. Nangkuamo koie, pekalulumo kami awaa koie hadia. 25 Luwu miano da itai metandi, ndokuasai to'uo wotolundo. Kando weweuho kana koie, ndona mokea mo'awa hadia danta lono. Sawali icita toweweuho kato pompelawe hadia da samengka-mengkauno. 26 Nangkuamo koie, naku pekalulu ki sai hina tuduano, ronga na'iaa i'aku miano mpebusu da mobusu woa. 27 Sawali kuna lati'o wotolungku ronga kuasai to'uo, kai osie i'aku da ari potisu'ira miano suere, i'akumo da sinuurako mebinta hai petandia.