Osie mesomba hai ka'apu-apu
10
1 Mokeahaku kami nto'orio, raro mpetila, hapa da kadadia hai mbueto tempono nabii Musa. Luwundo melolako hai tontono seru, ronga mpontealohi tahi kana da lolako hai wita motu'i. 2 Luwundo arihiramo menibaho hai bolo seru ronga hai tahi, kando tewali ana guruno i Musa. 3 Luwundo arihiramo mongkaa roti da mengkena, 4 ronga mpondo'u nindo'u da mengkena da mebinta hai Apu Alla,a ndona arimo mpondo'u e'e da wowaa mebinta hai watu da itai merongahira, yahoo watu da mebinta hai Apu Alla.b Ronga koie watu yahoo Kristus. 5 Mau kicana koie, asa ntilara owose da sai ineheno Apu Alla, yahomo kai poturusihira kando mentekamburako mate hai lueno papawu.6 Luwuo koie kai kadadia yahoo nta pe'ontoanto, nta mokompehawakita kato osie mokeahako da mosa'o kana da ari niweweundo ko'ira miano. 7 Mi'osie monunuti ko'ira asa ntilarando miano da mesomba hai ka'apu-apu. Larono Boku Haratiano Apu Alla dahoo teburi, « Kando totoro ko'ira miano mpongkaa ronga mpondo'u, yahopo kando pewangu kando mohende ngkabaria. »c 8 To'osie endeo, kana da niweweundo ko'ira miano asa ntilara, dungku kando memate rua pulu otolu rewu larono me'asa oleo. 9 Ronga to'osie soba-soba'o Kristus, kana da niweweundo ko'ira miano asa ntilara, dungku memate tinutuno ule. 10 Ronga mi'osie mpengungu, kana da niweweundo ko'ira miano asa ntilara, dungku kai popatehira mala'ekatino matea.
11 Luwu koie da kadadia hai ira pembue'anto tewaliomo pe'ontoanto, ronga teburiomo nta pompokompehawato, icita da tora die wotu da okudahio kompura-puraano.
12 Nangkuamo koie, inai da merasa'o hi modoro pentadeno, o'olokaa kai osie saru tuuna! 13 Posoba-soba da awakomiu yahoo posoba-soba biasa, nai da'a mokulaloiho mokorano miano. Kana'umpe Apu Alla nangkonianto'u hi pedandi, yahomo kasai poturusicomiu kami sinoba-soba ntelia. Ki konakomiu posoba-soba, Apu Alla nta moweekomiu sala kami ntule'i sabara tineiho.
14 Nangkuamo koie, raro mpetilaku da telou, osie mo'okudahi ka'apu-apu kami mpesomba. 15 Kupogau'akomiu kana miano da mandara. Kahioomo kami mpekirio die da kanahincu. 16 Temponto mondo'u angguru ronga montarimakasi hai Apu Alla, na'iaa bara koie menteehano hito pono-ponohaakonomo Kristus laro reano? Naamo temponto mpetitila'o roti kato mengkaaho, na'iaa bara koie menteehano hito boboto'akonomo wotoluno Kristus? 17 Nante'iaasi me'asa boto roti, kato mengkaaho cita die da me'alu, tewalicitamo me'asa wotolu.
18 Ndoka peehawa'ira miano Israil. Ko'ira miano da mempongkaa sinumbele da ari tinompa, boboto'iramo hindo daa mpesomba hai pontompa'a pesomba. 19 Hapa kaku kanahi kana koie? Dahaku bara kanahi, akoie ka'apu-apu atawa da sinumbele da tinompa tewali pesomba hai ka'apu-apu dahoo bara batuano? 20 Nahina! Da patudungku yahoo, koie sinumbele da tinompa, na'iaa hai Apu Alla, sawali hai ira setani. Ronga naku ehe kimi boboto'akondo setani. 21 Nami ntewali menunu mondo'u hai pondo'uano Apu, kimi mpenunumo mondo'u hai pondo'uano setani. Nami ntewali menunu tewawe me'asa meda'akono Apu, kimi mpenunumo mpongkaa me'asa meda'akono setani. 22 Atawa mokeakita bara mokomosa'oo larono Apu? Dakita bara moko-mokora ka'iaa Apu?
23 Kanahino miano, « Nahina niweweu da sai halala. » Menonaa! Sawali nai da'a luwuo koie niweweu koguna. « Nahina niweweu da sai halala. » Menonaa, sawali nai da'a luwuo koie niweweu pokomorodoo jema'a. 24 Osie te'iaasi mekirio kai moico dadaau panta'u, sawali peehawa'ira na'anda suere miano kai moico dadaando.
25 Tewalio kimi mpongkaa pera ihino sinumbele da inolimiu hai tadoha. Osiemo momparesa meri'ou, ki daamo ari tinompa tewali pesomba hai ka'apu-apu, kanano ki daa ko'oru-orua pelaroamiu. 26 Kana'umpe dahoo teburi hai Boku Haratiano Apu Alla, « Die wita'ea ronga pera ihino, Apu da ko'apuako. »d
27 Ki boboicomiu da sa'iaa miano Ngkarasitee mongkaa, kami ntarimaasi, mincaaho hapa hi poweekomiu. Mi'osiemo momparesa maina pebintaano koie kinaa, kai osie ko'oru-orua pelaroamiu. 28 Sawali ki daa suere miano da kanahi, « Die kinaa ariomo tinompa tewali pesomba hai ka'apu-apu, » tendenomo koie miano da mo'awaakomiu, osiemo mongkaa, kai osie ko'oru-orua pelaroano. 29 Patudungku na'iaa pelaroamiu da ko'oru-orua, sawali pelaroano koie miano da mo'awaakomiu.
Aipo dahoo danta metukana, « Hapa po'ehengku kaicua pelaroano suere miano danta mompatantu? 30 Kicu pongkaa ronga montarimakasi hai Apu Alla, hapa kai daa miano danta pasala'aku tendenomo koie kinaa, hicu arimo mo'itaakono barakati? » 31 Dadi, hapamo danta niweweumiu, nta mongkaa atawa mondo'u atawa mohapa, miweweuhomo luwu kami daa poko'owose'o Apu Alla. 32 Osie moweweuhakono miano, kando tuuna hai dosa, mengkena miano Yahudi ronga da sa'iaa, maupo jema'ano Apu Alla. 33 Kahioomo kami ngkana i'aku, hai luwu da niweweungku, kutotandaiho pokosanaa'o larondo luwu miano. Da patudungku na'iaa kai moico dadaangku, sawali kai moico dadaando miano me'alu, kando to'ori pinokosalama.