11
1 Minunu'o sipaku, kana i'aku nunu'o sipano Kristus.Atorano tina ki sambahea
2 Kurereekomiu, himina sadia mokopehawa'aku ronga nunu'o pompotisu ku'ari potisukomiu. 3 Sawali po'ehengku kami nto'orio die: da kapalaiho pera tama yahoo Kristus, da kapalaiho tina yahoo samporano, ronga da kapalaiho Kristus yahoo Apu Alla. 4 Ki konainoo koie tama amala atawa mogau kana nabii, kai daa tutuwio rapano, batuano koie miano dahoo koko'anuiho Kristus da kapalaiho. 5 Ronga ki konainoo koie tina amala atawa mogau kana nabii, kasai da'a tutuwio rapano, koie tina dahoo koko'anuiho samporano da kapalaiho.a Kanamo hi kiniiri butu koie rapano tina. 6 Kana'umpe ki sai ehe metutuwi koie tina, dadisi ki kiniiri. Sawali koie tina ki kiniiri atawa nigunti wuuno, tewaliomo pompokola'u-la'ua. Nangkuamo koie, dadisi ki petutuwi.
7 Yo tama nai paraluu metutuwi, nangkuamo iaa gambarano ronga tereree'ano Apu Alla. Sawali yo tina yahoo te'angga'ano samporano. 8 Kana'umpe tama kai dadi, na'iaa mebinta hai tina, sawali tina dadi mebinta hai tama. 9 Ronga tama nai pinokodadi nta tarono tina, sawali tina pinokodadi nta tarono tama. 10 Nangkuamo koie, ronga tendenomo raro mala'ekati, kahioomo tina kai petutuwi, kowati peto'ono hi pinoweehi kuasa.b 11 Mau kicana koie, kito tora hai ra'ino Apu, nai tule'i yo tina tora pantano tebintani hai tama, ronga nai tule'i yo tama tora pantano tebintani hai tina. 12 Kana'umpe mau kicua hai tama pebintaano koie tina da iso-iso, perumbuino yo tama tehina mebinta hai tina. Ronga luwuo da da'a mebinta hai Apu Alla.
13 Mimpekirio pantamiu, pantasio bara tina ki amala hai Apu Alla sai metutuwi? 14 Da tabulumo biasa, aricomiumo pinotisu'ako yo tama ki mentaa wuuno, nai pantasi. 15 Sawali yo tina ki mentaa wuuno, yahoo tereree'ano. Kana'umpe kai pinoweehi wuu kai tewali petutuwino. 16 Sawali ki daa miano da ehe megagahiako, dahaku nta molawani, da tinekoneahakomami ronga luwu jema'ano Apu Alla yahoo, tina metutuwi ki amala.
Atorano tewawea merongaa Apu
17 Mekona hai pera atora hicu daa nta mo'awaakokomiu die, naku da'a nta rereekomiu. Kana'umpe hai laro mentepo'awaamiu, nahina da nimoicoako, sawali te'iaasi da mosa'o. 18 Lamoro me'asa, kupodeaho, kimi ntepo'awa sambahea, dahoo da mentepopobungku. Ronga kanahincu, te'etemo koie lele dahoo menonano. 19 Menonaa, pantasianomo ki da'a dahamiu sai mentepokona, kai mentee inaiho da to'u-to'u parasaea. 20 Sawali himi nte mentepo'awa, na'iaa kana da tepo'awa nta tewawe merongaa Apu. 21 Kana'umpe kimi mpongkaa, tee-tee'asa miano kaaho kinaano da niwawano, sai mekatari-tarima. Nangkuamo kai da'a asa ntilara da mokohuloo, ronga penda da memolangu. 22 Hapa kai kana koie? Nahina bara laicamiu dahamiu nta mpongkaa ronga mpondo'u? Atawa nta paruruo jema'ano Apu Alla himi daa koko'anuihira da mengkadee-dee? Kana'umpe nta kanahincu hai comiu? Nta rereekomiu bara? Naku da'a! Naku da'a to'u nta rereekomiu.
23 Kana'umpe hapa da ari pinokodungkuku hai comiu, koie mebinta hai Apu, yahoo: koie malo daano nta nirako Apu Yesus, kai po'ala roti, 24 kai pontarimakasi hai Apu Alla, kai sisibio, yahopo kai koharatia, « Diemo wotolungku da sinoro tendenomo comiu. Miweweuhomo die, dahamiumo nta nte mokopehawa'aku. » 25 Kanasi penda hindo arimo tewawe, kai po'ala pondo'ua kai koharatia, « Die pondo'ua yahoo pedandi da tonia, tendenomo reaku. Miweweuhomo die, kohoko himi mpondo'u, dahamiumo nta nte mokopehawa'aku. » 26 Menonaa, kohoko himi ngkaaho die roti ronga mondo'u die angguru, dakomiumo leleako mateano Apu Yesus dungku kai leu.
27 Nangkuamo koie, inai da mongkaa roti ronga da mondo'u angguruno Apu da sai nunu'o carano da pantasi, koie miano kodosaamo hai reano ronga wotoluno Apu. 28 Dadi, kahioomo pera miano kai paresaa isala pelaroano, yahopo kai pongkaa roti ronga mondo'u angguru. 29 Kana'umpe inai da mongkaa roti ronga mondo'u angguru kasai to'orio hi boboto'akonomo wotoluno Apu Yesus, sadia'omo hukuma danta awaa. 30 Nangkuamo koie, me'aluo hai comiu da morungku ronga modengke, deenapo medahira da mate. 31 Kito paresaa pelaroanto meri'ou, koie Apu nai da'amo nta hukumakita. 32 Sawali ki hukumakita Apu, patuduno dahoo potisukita, kato osie hinukuma merongaa dunia.