Rupa-rupa kuasa, sawali Sangkoleo me'asasi
12
1 Diekana, raro mpetila, po'ehengku kami nto'orio da menona dadaano kuasa hi poweekomiu Sangkoleono Apu. 2 Peehawa'o daamiupo sai to'orio Apu Alla, tepongaruhicomiupo ronga kenunuta mesomba hai ka'apu-apu da sai to'ori mogau. 3 Kahioomo kami nto'orio, yo miano da mogau nunu'o po'eheno Sangkoleono Apu Alla nahina da tule'i tundario i Yesus. Rongapo nai te'asa miano da tule'i kanahi, « Yesusmo Apu! » ki sa'iaa Sangkoleono Alata'ala da potisu'o.4 Marupa-rupa'o kuasa, sawali Sangkoleono Apu da mompokoda'a me'asasi. 5 Ronga marupa-rupa'o pohedoa mekona hai Apu, sawali me'asasi Apu. 6 Ronga dahoo opi-opia cara hai pohedoano Apu, sawali Apu Alla te'iaasi me'asa da weweuho luwu hai laro ntoraahando luwu miano.
7 Sangkoleono Apu moweeho tee-tee'asa miano kuasa nta nimoicoakonto luwu. 8 Me'asa miano, Sangkoleono Apu moweeho pinehawa motu'a kai mandara me'oliwi. Hai miano meha, koiesi Sangkoleo da moweeho ponto'ori kai mandara mompaguru. 9 Hai mehano miano, Sangkoleono Apu moweeho imani. Ronga hai mehano, koiesi Sangkoleo moweeho kuasa nta mompokontido. 10 Dahoo miano da pinoweehino kuasa nta mompokoda'a peto'o tekangka, ronga mehano pinoweehi kuasa nta mompokodungku haratia kana nabii. Hai mehano miano penda, Sangkoleono Apu mompoweehi kuasa kai to'ori tindahako maina sangkoleo da mebinta hai Apu Alla ronga da sa'iaa. Dahoo da pinoweehi kuasa kai tule'i mogau'ako rupano gau da mebinta hai Sangkoleono Apu, dahoo penda da pinokontule'i nta mobatuangi ko'ira gau. 11 Luwuo koie, pohedoanosi Sangkoleono Apu da me'asa; tee-tee'asa miano pinoweehi kuasa nunu'o po'eheno Sangkoleono Apu.
Me'asasi wotolu, me'aluo pokosangkano
12 Koie Kristus kana wotoluno manusia; wotolu koie me'asasi, sawali me'aluo pokosangkano. Ko'ira pokosangka, mau ki me'alu, me'asasi wotolu. 13 Kanamo koie luwunto, mengkena miano Yahudi ronga da sa'iaa, mau ata ronga da sa'iaa ata, luwunto aricitamo nibaho'ako koie Sangkoleo da me'asasi, kato boboto hai wotoluno Kristus. Ariomo Apu Alla weehakita'o Sangkoleono da me'asa.a
14 Kana'umpe koie wotolu me'aluo pokosangkano, nai da'a te'iaasi me'asa. 15 Kicanano karu kanahi, « Tendenomo hi sa'iaa i'aku lima, yahomo kasaku tewiso hai wotolu, » dadi menonaa bara hi sai tewiso hai wotolu? 16 Ronga kicanano biri kanahi, « Tendenomo hi sa'iaa i'aku mata, yahomo kasaku tewiso hai wotolu, » dadi menonaa bara hi sai tewiso hai wotolu? 17 Kicanano upuo wotolu yo mata, hapamo nta pompodedea? Kicanano luwu dadino biri, mainaamo nta pompewuha? 18 Sawali Apu Alla ariomo patantuo nta dahano tee-tee'asa pokosangka hai wotolu, nunu'o po'eheno. 19 Kicanano luwuo te'iaasi me'asa pokosangka, hai hapa nta dahano wotolu? 20 Dadi menonaa me'aluo pokosangka, sawali wotolu me'asasi.
21 Nangkuamo koie, mata nai tewali mogau'akono lima, « Naku da'a paraluukico! » Ronga rapa nai tewali mogau'akono karu, « Naku da'a paraluukico! » 22 Deenapo pokosangkano wotolu da inontonto modengke, koiemo da paraluu'ea hai wotolu. 23 Naamo pokosangkano wotolu da inontonto sai ko'angga, koiemo kato angga ntesincaa. Ronga pokosangkato da sai pantasi inonto, topeehawa ntesincaa. 24 Sawali pokosangkato da moico nai paraluukio da kana koie. Apu Alla ariomo atoro'o wotolunto, ki da'a pokosangkato da sai inangga, kato peehawa to'uo, 25 kai osie dadi teposincaakono wotolu, sawali pokosangka da sai mengkena kando pada mpekapee-peehawa. 26 Nangkuamo koie, ki daa te'asa pokosangka da marasai, luwu pokosangka itai mopoenoo. Ki daa te'asa pokosangka da inangga, luwuo pokosangka mohende mponohaa.
27 Comiumo wotoluno Kristus, ronga comiumo tee-tee'asa miano pokosangkano. 28 Apu Alla ariomo tindahako opi-opia miano hai larono jema'a: lamoro me'asa rasulu, ko'orua nabii, ko'otolu guru, saliwano koie dahoo da mompokoda'a peto'o tekangka, da pinoweehi kuasa nta mompokontido, nta montulumi, nta mowawai, ronga danta mogau'ako gau da mebinta hai Sangkoleono Apu. 29 Luwundo bara koie rasulu, atawa nabii, atawa guru? Luwundo bara koie mo'awa kuasa nta mompokoda'a peto'o tekangka? 30 Luwundo bara koie mompokontido, atawa mogau'ako gau da mebinta hai Sangkoleono Apu, atawa mobatuangi koie gau? 31 Nangkuamo koie, kahioomo kami u'ungke to'uo ko'ira kuasa da kontu'uma kami awaa.
Ronga dahakupo nta motisukomiu sala da kontu-kontu'uma.