Pololaro
13
1 Mau kicu to'ori mogau'ako pera gauno to manusia ronga gauno mala'ekati, sawali ki saku kopololaro, kanaakumo randu da me'uni ronga tawa-tawa membii. 2 Mau kicu to'ori mogau kana nabii, paha'o pera rahasia, ronga to'orio luwu, mau kicu pompokolinca tangkeno tendenomo parasaea da moroso, sawali ki saku kopololaro, nahina mpiha pekonaangku.a 3 Mau kicu titila'o pera hapa da inawangku, deenapo soroo wotolungku kai tinunu,b sawali ki saku kopololaro, mau te'ete nahina nta pinelawengku.4 Miano da kopololaro koie sabaraa, mobunaa larono, nai singgira, nai melou mereree mpanta, ronga nai mentaba. 5 Miano da kopololaro koie nai kasara, nai po'u'ungke laba mpantano, nai melou mesa'o-sa'o laro, ronga nai da'a mo'ungkaariakono tesalano miano. 6 Nai mohende'ako niweweu mosa'o, sawali da menona. 7 Miano da kopololaro koie to'ori morora'i luwu, parasaeaho luwu, momperahi-rahi ngkaida'a, sabara tineiho luwu.
8 Pololaro nai da'a nta paisa pura. Oliwino nabii dahoo nta tekabu; gau da mebinta hai Sangkoleono Apu dahoo nta ari-ari; ponto'ori dahoo nta pura. 9 Kana'umpe nasai koa ponto'orinto ronga pe'oliwinto kana nabii. 10 Dahosi nta dungku wotuno dahano Apu Alla nta mokongkoa'o luwu, ronga da sai koa dahoo nta pura.
11 Daangkupo okidi, pogauku kana hi pogau ana'ate, pekirincu kana ana'ate, pompehawaku kana ana'ate. Diekana hicu owosemo, kubintaniomo koie sipa ana'ate. 12 Hapa da inontonto diekana yahoo kana nunua da sai mentee hai paiasa. Sawali perumbuino, dahomo nta mentee kana da tepora'i. Diekana naku da'apo to'orio luwu, sawali perumbuino, dahakusi nta to'orio luwu, kana Apu Alla to'orio luwu dadaangku.
13 Dadi, diekana dahoo otolu danta sadia niweweunto: parasaea, momperahi-rahi, ronga mololaro. Ronga da kolalo paraluu koiemo mololaro.