Kuasa da mebinta hai Sangkoleono Apu Alla
14
1 Da kontu'uma danta paraluu niweweumiu yahoo mololaro. Ronga mi'usaha to'u kami awaa kuasa da mebinta hai Sangkoleono Apu, lalo'eahopo kuasa mompokodungku haratia kana nabii. 2 Miano da mogau'ako gau da mebinta hai Sangkoleono Apu, nai da'a mogau'akono miano, sawali da pogauno yahoo Apu Alla. Nahina da paha'o da kanahino, kana'umpe nangkua kuasano Sangkoleono Apu kai pogau da rahasia. 3 Sawali miano da mogau kana nabii, hai mianomo kai pogau, danta pokomorosohira, oliwihira, ronga lilimboihira. 4 Miano da mogau'ako gauno Sangkoleono Apu te'iaasi mokomorodoo wotolu mpantano. Sawali miano da mogau kana nabii, da pinokomorodono yahoo jema'a.5 Sanaa'o larongku kimi nto'ori luwumiu mpogau'ako gauno Sangkoleono Apu. Sawali da kontu-kontu'uma yahoo kami nto'ori mogau kana nabii. Kana'umpe miano da mogau kana nabii, kolaloo koguna ka'iaa miano da mogau'ako gauno Sangkoleono Apu; tabeano koie miano ki batuangiosi, kai da'asi gunano hai jema'a. 6 Dadi, raro mpetila, nahina gunano kicu leu awakomiu kaku pogau'ako gauno Sangkoleono Apu. Sawali da kolalo koguna yahoo kicu pokodungku'akomiu'o hapa hi ari Apu Alla palenga'akuo, atawa ponto'ori, atawa gauno nabii, atawa pompotisu.
7 Pengkenaasi pokosangka musik da sai kopenaa, kanano suli ronga gambusu, dahoo bara miano nta to'orio ki lagu hapa da sinuli ronga nigambusu, ki sai te'atoro unino? 8 Atawa ki sai mentee unino torompe, inai danta mepasadia mamusu? 9 Kanasi kimi mpogau'ako gauno Sangkoleono Apu, ki sami mpogau kai mentee, kana'umpe miano kai daa nta paha'o da nigaumiu? Kicana koie, comiu koie kana to'u da mogau'akono ngalu. 10 Die hai wita'ea me'aluo rupano gau, sawali nahina te'asa da sai hina batuano. 11 Sawali ki saku to'orio batuano koie ino'awa da pogauno miano, kanaakumo suku suere akoie hai miano, kanapo na'ana hai aku. 12 Mekona hai comiu, kuto'orio himi mokea to'u mo'awa kuasa mebinta hai Sangkoleono Apu. Sawali moicoano kuasa da kontu'uma pinokeahakomiu yahoo, kami mpule'o koie jema'a kai morodo.
13 Nangkuamo koie, inai da mogau'ako gauno Sangkoleono Apu, kahioomo kai amala mo'ita kai pinoweehi kuasa kai batuangio koie da nigauno. 14 Kana'umpe kicu amalaako gauno Sangkoleono Apu, sangkoleongku da amala, sawali pekirincu nai da'a menunu. 15 Dadi, hapa danta niweweungku? Kicu daa nta amala, nta amalaako sangkoleongku, ronga amalaako pekirincu. Nta moreree'ako sangkoleongku, ronga moreree'ako pekirincu. 16 Kana'umpe kimi amalaako gauno Sangkoleono Apu kami daa mpontarimakasi hai Apu Alla, ronga ki daa suere miano da sai paha'o, koie miano nai da'a nta kanahi, « Amin, » himi ari montarimakasi; nasai to'orio hapa da kanahimiu. 17 Mau ki moico amala pontarimakasimiu hai Apu, nai koguna hai miano suere.
18 Kaku pontarimakasi hai Apu Alla tendenomo hicuna to'o-to'ori mogau'ako gauno Sangkoleono Apu ka'iaa luwumiu. 19 Sawali hai laro sambahea'a, po'ehengku mogau'ako da olima mpali ino'awa da pinahano miano kaku to'orisi potisu'ira, ka'iaa teporewu-rewu gau da sai pinaha.
20 Raro mpetila, mi'osie mepekiri kana ana'ate. Hai larono niweweu da mosa'o, kahioomo kami dada'iaasi kana ana'ate, sawali kimi mpepekiri, kahioomo kami ngkana miano nto'ori. 21 Hai Boku Haratiano Apu Alla dahoo teburi kanahi,
« Koharatia'omo Apu, ‹ Dahakusi nta montena suku suere,
da suere gauno,
kando potisu'ira umaticu.
Sawali mau kicana koie, nando da'asi ehe modedeahaku. › »a
22 Dadi, kuasa mogau'ako gauno Sangkoleono Apu, yahoo peto'o hai miano da sai da'apo parasaea, na'iaa miano da parasaeamo. Ronga kuasa mogau kana nabii, yahoo peto'o hai miano mparasaea, na'iaa miano da sai parasaea. 23 Nangkuamo koie, kicanano laro ntepo'awaano jema'a, luwu miano mogau'ako gauno Sangkoleono Apu, kando leu miano da toniapo parasaea, atawa da sa'iaa miano Ngkarasitee, ko'ira miano nta kanahindo namemolawukomiumo. 24 Sawali kimi mpogau luwumiu kana nabii, kai leu miano da sa'iaa Karasitee atawa da toniapo parasaea, luwu da nigaumiu, koiemo danta tisu'akono'o sinalakino koie miano, dungku kai to'orio niweweuno hicua dosa, 25 ronga luwu rahasia da tewuniako hai pelaroano dahomo nta mentee, yahomo kai sudu mesomba hai Apu Alla ronga mangaku, « To'u-to'uo Apu Alla dahoo merongakomiu. »
Atorano jema'a hindo tepo'awa sambahea
26 Dadi, raro mpetila, hapa batuano luwu koie? Kimi ntepo'awa nta sambahea, dahoo da melagu, dahoo da mompotisu, dahoo da mompokodungku haratia da mebinta hai Apu Alla, dahoo da mogau'ako gau da mebinta hai Sangkoleono Apu, ronga dahoo da batuangiakondo'o koie gau. Sawali luwuo koie kai pinadala nta pokomorodoo jema'a. 27 Ki daa danta mogau'ako gauno Sangkoleono Apu, kahioomo te'orua atawa me'alunomo ki te'otolu miano kando mpeka'eu. Ronga dahoo danta batuangio. 28 Ki sahina da tule'i mobatuangi, ko'ira miano danta mogau kahioomo kando pengio hai laro ntepo'awaando; kahioomo kando mpogau'akono Apu Alla hai bolo mpelaroando.
29 Ki daa danta mogau kana nabii, kahioomo orua atawa otolu miano danta mogau, ronga ko'ira meha-mehano kando timba-timbaamo hai pelaroando. 30 Sawali kicanano haratia mebinta hai Apu Alla leu hai te'asa miano suere da totoro hai larono tepo'awaa, koie miano da konainoo mogau, kahioomo kai ari-ari. 31 Menonaa, luwumiu tewalio mogau kana nabii tee-tee'asa miano, kami nto'ori luwumiu mpepopotisu ronga pinokomoroso. 32 Miano da awaa kuasa mogau kana nabii to'orihiramo atoro'o koie kuasa kando tarimaa gilirando. 33 Kana'umpe Apu Alla nai ehee da mohitu, sawali yahoo tepokonaa.
34 Kana da kadadia hai luwuo jema'ano Apu Alla, kahioomo tina kando mpengio hai laro ntepo'awaa. Nando niwukahi mogau. Deenapo kahioomo kando nunu'o parenta, kana da teburi hai Boku Parentano nabii Musa. 35 Kindo mokea mepopotisu hapa-hapa, ndopetukana hai samporando hai laica. Nai pantasi ki tibo tina mogau hai larono tepo'awaano jema'a.
36 Hai comiu bara pebintaano koie haratiano Apu Alla? Atawa te'iaasi bara hai comiu nileleakoano? 37 Ki daa te'asa miano da angga'o wotoluno hi po'awa kuasa mogau kana nabii atawa suereno kuasa, kahioomo kai to'orio, die hicu ari moburiakokomiu yahoo parentano Apu. 38 Sawali ki sai ehe padulio koie parenta, mi'osie mompaduli koie miano.