Dosa hai tongano jema'a
5
1 Kana'umpe kai tibo teleleako hi daa miano hai comiu da endeo, meduluakono awono, samotu'ano tamano? Mainakaa mau ko'ira miano da sai hina agamando nando paisa moweweu ngkabaria da kana koie. 2 Kicana koie, yo hapa kami daasi mentaba? Nai da'a bara pantasi kai perurumate laromiu, kami saario lako koie miano da moweweu ngkabaria? 3 Kana'umpe mau ki saku da'a, sawali sangkoleongku kowatino hicu daasi, ku'otuhiomo koie miano da moweweu dosa kami hukumaa, kicanano dahaku kokeena. 4 Kimi mentekongko meronga neeno Apu Yesus, angga'omo hicu daasi itai, ronga tendenomo kuasano Apunto Yesus, 5 misoroakono'omo ponggawano bilisi koie miano kai lono wotoluno, sawali nta salama'ano sangkoleono, ki leu mpenduapo Apu Yesus.6 Nai pantasi kimi mentaba. Nami da'a bara to'orio batuano die parere, « Te'ete'o koie tulu, sawali namokontewua'o luwuo nigonta. » 7 Koie tulu pengkenano dosa. Nangkuamo koie, basiakomo koie tulu lembahi, kami ntewali nigonta ntonia. Kana'umpe santo'u-to'uahano, nahina dosamiu. Kahioomo kami ngkana koie, kana'umpe ana domba, Kristus, ariomo sinumbele tewali pesomba ntepulosi'a.a 8 Nangkuamo koie, kahioomo kato pokomaroahakono'o koie oleo Ntepulosi'a, osie tulu da mompokomosa'o, sawali roti da sai kotulu, yahoo pelaroa molino ronga da menona.
9 Hai surangku da meri'ou dahoo teburi, kami osie mesimbau'akondo miano da me'endeo. 10 Sawali naku da'a mepatudu tabekomiu mesimbau'akondo miano da sai parasaea da endeo, da lodoko, da mpe'akala, atawa da mposomba ka'apu-apu. Kicanano nato ehe mesimbau'akondo miano da kana ko'ira, dadisi kato bintaa die wita'ea. 11 Sawali da niburincu diekana, kami osie mesimbau'akono miano, da kanahino hicua Karasitee, sawali yahoo miano endeo, lodoko, mesomba hai ka'apu-apu, pososa'o miano, tekonea molangu, atawa me'akala; koiemo miano da kana kami osie to'u mesimbau'akono, mau mperongaakono mpongkaa nai tewali.
12 Mo'otuhi kasalaahano miano suere da sa'iaa Karasitee na'iaa urusangku. Sawali anggota jema'a, na'iaa bara comiu danta otuhio tesalado? 13 Hai Boku Haratiano Apu Alla dahoo teburi, « Saarihira lako miano mosa'o da meda'a hai comiu. »b Sawali Apu Alla pantano danta adili'ira miano da sa'iaa Karasitee.