Pantano Apu Alla da tewali hakim
4
1 Kahioomo kando anggakami miano hicua ata ntinenano Kristus da pinatugasiako peleleakoano rahasiano Apu Alla. 2 Da paraluu hai miano da tinena kando pinarasaea. 3 Kicua i'aku, hapa da kanahimiu atawa da kanahino suere miano mekona hai dadaangku, nahina batuano. Deenapo i'aku, po'awangku mekona hai wotolu mpantaku nahina batuano. 4 Ponto'orincu naku da'a moweweu da tesala. Sawali na'iaa koie danta mokomenonaa kanahi hi sahina tesalaku. Apumo danta otuhio tesalaku. 5 Nangkuamo koie, nasai da'apo leuho wotuno, mi'osie tekara-karai mompatantuakono tesalano atawa sai tesalano miano. Tarimaapo dungku kai leu Apu. Iaamo danta bongkara'o luwu rahasia da tewuniako dahano rondoma, ronga danta palenga'o luwu ihi mpelaroano to manusia. Koiemo wotu dahano Apu Alla nta reree'o pera miano da pantasi montarima poreree.Osie mentaba
6 Raro mpetilaku, hapa da nigauku itonia mekona hai wotolungku ronga hai Apolos, patudungku kami mpe'onto hai cami, kami mpaha'o batuano da kanahi, « Nunu'o hapa da teburi hai Boku Haratiano Apu Alla, osie molimpaki. » Kicanamo koie, nami da'a nta tule'i moreree ntelia da me'asa miano ronga momparuru suere miano. 7 Hapa sababuno kami daa mokea mentaba? Ronga koie da nidiomiu na'iaa bara pompoweehino Apu Alla? Kicua koie pompoweehi, yo hapa kami mokea mentaba'ako?
8 Ponto'orimiu nahinamo kakurangamiu? Ponto'orimiu kawasakomiumo? Ponto'orimiu tewalicomiumo mokole, ronga icami nako da'a? Samoi-moicoano kimi daamo to'u-to'u tewali mokole, kako perongakomiu momokole. 9 Deenapo po'awangku, cami rasulu ariomo Apu Alla mokontewalicami miano da dompa sai te'angga, kana to'u miano nterako hai mamusua danta pinopate hai ra'indo miano me'alu. Tewalicamimo pekondoano luwu ihino wita'ea, raro mala'ekati, kai tii to manusia. 10 Tendenomo hico nunu'o Kristus, kako tewali kana miano mpore, sawali comiu, ponto'orimiu mandarakomiumo. Cami modengke, sawali comiu, ponto'orimiu mokorakomiumo! Comiu te'angga, sawali icami pinoko'anu-anu! 11 Dungku die wotu icami mokohuloo ronga mokokondo'u; pinodaimami te'iaamo da dodai hai wotolumami ronga tehihia'omo. Miano nte o'anukami, kako kolinca-linca nasahina poo'iahamami da matantu. 12 Mobea'o pohedoamami mo'u'ungke tinoraakomami. Kico tinota'isala, kowolohiakono'o barakati. Kico pinakasea, kosabarakio. 13 Kindo pontumbu'akami, kolawaniakondo'o gau da moico. Tewalicamimo kana rengkono wita'ea; dungku die oleo kanakamimo pongkongkoa da mowuse.
14 Kupoburiakomiu die na'iaa nta koko'anuicomiu, sawali nta pokompehawakomiu kana ana nilolarongku. 15 Mau kicanano tepoporewu-rewu miano da potisu'akomiu'o dadaano Kristus, sawali nai me'alu da tewali tamamiu. Kana'umpe nangkua i'aku da leleakoakomiu'o Lele Mohende kami mparasaea, i'akumo tamamiu hai Yesus Kristus. 16 Nangkuamo koie, kaku po'ita to'u kami nunu'o da niweweungku. 17 Yahomo kaku tena'akomiu'o i Timotius, anaku da telou, da konianto'u nunu'o po'eheno Apu. Iaamo danta mokompehawa'akomiu'o dadaano toraa da ninunuku hicu daa parasaeaho i Yesus Kristus, yahoo kana ari pompotisuku pera jema'a.
18 Dahoo opi-opia miano hai comiu da mentaba, ndona angga'o hi saku da'amo nta paisa leu awakomiu. 19 Sawali ki po'eheno Apu, nai da'amo nta lembahi kaku leu awakomiu penda. Yahopo kaku daa nta to'orio kana'umpe kuasando ko'ira miano mentaba; na'iaa te'iaasi gau mpenando. 20 Kana'umpe pomparentaano Apu Alla na'iaa te'iaasi gau, sawali ronga kuasa. 21 Dadi kana'umpe da po'ehemiu? Mokeakomiu bara kaku leu awakomiu mowawa wosu, atawa nta leu lolarokomiu ronga pelaroa moluu?