Pengkenaa miano ntinenano Apu Alla
3
1 Raro mpetilaku, koie wotu daanto mperonga, naku tule'i mogau'akokomiu kana hicu pogau'akondo miano da merongaamo Sangkoleono Apu. Sawali kuna mogau'akokomiu kana miano da nunu'o dadaano miano wita'ea, da toniapo parasaeaho Kristus, kana ana'ate da sai da'apo te'upu hai susu. 2 Iponoha kupoweekomiu susu, na'iaa kinaa da motea, nasami ntule'ipo nta udooho. Deenapo dungku diekana nami da'apo tule'i. 3 Akoie, dakomiupo nunu'o dadaano miano wita'ea. Kimi daapo singgira ronga mpekakahi, na'iaa bara menteehano himi daapo nunu'o dadaano miano wita'ea, ronga mesipa'ako sipano miano biasa? 4 Ki daa da kanahi, « Kupeduluo i Paulus, » ronga mehano kanahi, « Kupeduluo i Apolos, » na'iaa bara koie menteehano himi daapo mpesipa'ako kana miano wita'ea?5 Santo'u-to'uno, inai koie i Apolos? Ronga inai koie i Paulus? Icami te'iaasi miano ntinenano Apu Alla da motisukomiu kami mparasaea. Icami te'iaasi padala'o pohedoa hi ari Apu tilakami tee-tee'asa. 6 I'aku da mbulaa, i Apolos da e'eiho, sawali Apu Alla pantano da mokontumbu'o pinombulano. 7 Dadi, da mombula ronga da mo'e'ei na'iaa da kontu'uma, sawali yahoo Apu Alla da mompokontumbu. 8 Da mombula ronga da mo'e'ei pengkenahira. Dahirasi nta tinila'ako gadindo nunu'o kokaundo. 9 Camimo die simbau mpohedono Apu Alla, ronga comiu yahoo umano Apu Alla.
Mentoda'ano pohedoano tee'asa miano
Ronga comiumo laica pino'engkano Apu Alla. 10 Tendenomo pompeehawano Apu Alla i'aku, kaku kana tuka watu mandara, kaku weweuho pondasino laica, ronga suere miano da omputako mompotoro laica hai wawono koie pondasi. Sawali pera miano kahioo kai dagai'o kai osie sala mpowangua laica koie hai pondasi. 11 Kana'umpe Apu Alla ariomo dioho Yesus Kristus tewali pondasi, ronga nahina miano da to'ori moweweu pondasi suere. 12 Dahoo miano da mompo'engka hai wawono koie pondasi, pokosangkano yahoo wulaa, yo pera, montia, keu, kapu, atawa seami. 13 Ki dungkumo oleo nta leuhano Apu, dahomo nta mentee pohedoano tee-tee'asa miano. Koie oleo dahoo nta leu meronga api, ronga koiemo api danta mokomenteeho dadaano pohedoando. 14 Koie pohedoano miano, ki sai da'asi kaaho api, koie miano dahoo nta tarimaa gadino. 15 Sawali ki kaaho api, dahoo nta marugi. Menonaa, dahoo nta salama, sawali nta kana miano da ari tealo mebobolo api.
16 Nami da'a bara to'orio hicuamo comiu da tewali rahano Apu Alla, ronga Sangkoleono Apu Alla da moo'iahicomiu? 17 Ki daa miano da sosa'oo rahano Apu Alla, yahoo jema'ano, wotoluno Apu Alla danta sosa'oo koie miano. Kana'umpe rahano Apu Alla mewota'o, ronga comiumo koie rahano.
18 Osie da'a miano da kulepio wotolu mpantano. Ki daa da angga'o wotoluno hi mandara nunu'o po'anggano manusia, kahioomo kai tewali miano da porenoo manusia, kai to'orisi tewali miano da santo'u-to'uno mandara. 19 Kana'umpe da inanggano miano wita'ea mandara, yahoo pore hai po'ontono Apu Alla. Dahoo teburi hai Boku Haratiano Apu Alla, « Apu Alla rako'akono'o miano mandara akala mpantano. »a 20 Dahosi penda teburi, « Apu Alla to'orio pekirino miano mandara hi sai hina gunano. »b 21 Nangkuamo koie, kahioomo kasai hina miano da mentaba'ako hi daa meponggawa hai suere miano. Kana'umpe luwuo yahoo anumiu: 22 i Paulus, i Apolos, i Petrus,c die wita'ea, toraaha, mateaha, wotu diekana-kana, ronga wotu danta leu, luwuo anumiu. 23 Ronga comiu, da pe'apuamiu hai Kristus, ronga Kristus, pe'apuano hai Apu Alla.