Dadaano kai mate i Yesus hai keu mpinotalambe
2
1 Raro mpetilaku, tempongku leu awakomiu ronga leleakoakomiu'o rahasia da mebinta hai Apu Alla,a naku da'a leu mobunga-bunga gau kana miano mandara. 2 Kana'umpe ariakumo otuhio, solama hito daa mperonga, nahina danta nigauku meha te'iaasi dadaano i Yesus Kristus, da mate hai keu mpinotalambe. 3 Tempo daanto mperonga, modengkee wotolungku, ronga taperangku bibi momee. 4 Da nigauku ronga da nileleakongku na'iaa gau mpelou-lou, na'iaa mandarano to manusia. Sawali kuasano Sangkoleono Apu da mokomenteeho hi menona da pompotisuku. 5 Dadi, na'iaa hicua mandarano to manusia kami mparasaea, sawali yahoo kuasano Apu Alla.Mandarano Apu Alla
6 Mau kicana koie, hai tongano miano da modoro parasaeando, dakamimo nta mogau'ako pompotisu da mandara. Sawali na'iaa mandarano dunia, atawa mandarando da mpomparenta die wita'ea, danta lono kuasando. 7 Koie da nileleakomami yahoo mandarano Apu Alla da tewuniako ronga terahasia. Nahinapo die wita'ea, ariomo Apu Alla pasadia'o koie mandarano nta nimohende'akonto. 8 Nahina te'asa miano da mpomparenta diekana da to'orio koie mandarano. Kana'umpe kicanano ndoto'oriomo, matantuomo nando da'amo nta basiropaa Apu Yesus da pinoko'owose. 9 Sawali kana da teburi,
« Hapa da sai paisa inonto ronga pinodeano to manusia,
ronga da sai paisa tinealohino pekirino miano,
koiemo da pinasadiano Apu Alla nta tarondo pera miano da lou'o. »b
10 Sawali Sangkoleono Apu penteteanomo hi palenga'akita'o Apu Alla, kana'umpe Sangkoleono Apu da to'orio luwu, dungku pera patuduno Apu Alla, mau da tewuniako. 11 Da to'orio ihi mpelaroano miano yahoo sangkoleono pantano koie miano. Kanamo na'ana dadaano Apu Alla. Da to'orio ihi mpelaroano Apu Alla, te'iaasi Sangkoleono Apu Alla pantano. 12 Nato da'a pinoweehi sangkoleo da mebinta die hai dunia, sawali Sangkoleo da mebinta hai Apu Alla, da tulumicita kato paha'o kana'umpe hi kawasa pontilari hai cita.
13 Kona mpokomenteehakondo'o pompotisu da menona mebinta hai Sangkoleono Apu hai miano da merongaa Sangkoleono Apu. Nako da'a mogau'ako ino'awa mandarano miano, sawali gau da pompotisuno Sangkoleono Apu. 14 Miano da sai merongaa Sangkoleono Apu Alla nai tule'i montarima hapa da pompotisuno koie Sangkoleo, te'iaasi angga'akono'o tulurano miano mpore. Miano da kana koie nai to'ori paha'o koie pompotisu, kana'umpe anggano koie da pompotisuno Sangkoleono Apu tule'io tino'ori te'iaasi kicua koie Sangkoleo da tulumio. 15 Miano da merongaa Sangkoleono Apu Alla to'orio tindahako da moico ronga da mosa'o, sawali koie miano nahina miano suere da tule'i moko'ukuru'o. 16 Hai Boku Haratiano Apu Alla dahoo teburi, « Inai da to'orio da pekirino Apu? Ronga inai da tule'i oliwio? »c Sawali icitamo da kopekiri mengkenaa Kristus.