Salamu
16
1 Mokeahaku kami nto'orio ronga o'ontoo petilato i Febe, da mohedo hai jema'a Kengkrea. 2 Mintarimaa ronga tulumio ki pepetulumi, kana'umpe iaa miano ntinindahakono Apu; me'aluomo miano da tinulumino, rongaamo i'aku. 3 Pokodungku'akuo salamungku hai Priska ronga i Akwila, simbau mpohedongku hai Yesus Kristus. 4 Te'eteno kando mate tendenomo pokosalama'aku. Na'iaa pantaku, sawali luwu jema'a da sa'iaa Yahudi montarimakasi hai ira. 5 Ronga pokodungku'akuo salamungku hai jema'a da mesambahea hai laicando.Salamungku hai Epenetus da nilouku. Iaamo da meri-meri'ou parasaeaho Kristus hai wonua Asia.a
6 Salamungku hai Maria, da ari mohedo mobea tendenomo comiu.
7 Salamungku hai Andronikus ronga Yunias, pe'asa sukuku ronga da ari perongangku metorungku, da meri'oumo parasaeaho Kristus ka'iaa i'aku, ronga te'angga hai ira rasulu.
8 Salamungku hai Ampliatus da nilouku, da pe'asa mparasaeangku hai Apu.
9 Salamungku hai Urbanus, da pe'asa mpohedonto hai Kristus, ronga hai Stakhis da nilouku.
10 Salamungku hai Apeles, da konianto'u hai Kristus.
Salamungku hai ira ihi laicano i Aristobulus.
11 Salamungku hai Herodion, pe'asa sukuku.
Salamungku hai ira ihi laicano Narkisus, pe'asa imaninto.
12 Salamungku hai Trifena ronga hai Trifosa da mohedo mobea hai Apu.
Salamungku hai Persis da nilouku, da me'alu pohedoano hai Apu.
13 Salamungku hai Rufus, miano nirurukino Apu, ronga hai tinano da kowati tinangku.
14 Salamungku hai Asinkritus, Flegon, Hermes, Patrobas, Hermas, ronga raro mpetila da mperongando.
15 Salamungku hai Filologus ronga Yulia, Nereus ronga petilano tina, Olimpas ronga pera miano mparasaea da mperongando.
16 Pada mpekasalamu ronga mongkeni lima peto'ono himi mpe'asa imani.b Salamundo luwu jema'ano Kristus hai comiu.
Oliwi kompura-puraano
17 Raro mpetila, kupo'ita kami mpedagai hai miano da mompokonteposala ronga mompokomohitu miano mparasaea, da sai ehee pompotisu da ninunumiu. Mi'osie mo'okudahi ko'ira daakana. 18 Kana'umpe ko'ira da mpoweweuhako kana koie na'iaa mohedoakono Kristus Apunto, sawali nunu'o po'eheno wotolundo. Niweweundo te'iaasi kulepihira miano da sai hina tino'orindo ronga lou-lou'akondo'o gau da momami. 19 Luwuo miano ndopodeahomo himi nunu'o po'eheno Apu Alla. Nangkuamo koie, kumohende tendenomo comiu. Mokeahaku kami mandaraako da moico, ronga mowuahako da mosa'o. 20 Apu Alla pu'uno mapuhi, danta mokohancuru'omo ibilisi hai tonto karumiu. Kahioomo pompeehawano Apu Yesus kai perongakomiu!
21 Timotius simbau mpohedongku mesalamu hai comiu. Kanamo na'ana i Lukius, i Yason, ronga i Sosipater da pe'asa sukuku.
22 I'aku i Tertius, da moburi die sura, mesalamu hai comiu larono Apu.
23 I Gayus mesalamu hai comiu. Koie laicano dahangku moo'ia, ronga tekongkoano jema'a. I Erastus, bendahara doino wonua, mesalamu hai comiu, kanapo na'ana i Kwartus, petila mpe'asa imaninto.
Luwu poreree hai Apu Alla
25 Tereree'omo Apu Alla, da kuasa mokomorodoo imanimiu tendenomo lele moico da nileleakongku dadaano Yesus Kristus. Koie da nileleakongku kana da pinokomenteeno Apu Alla, da tepo'etu-etu ta'u tewuniako, 26 sawali diekana mentoda'omo. Tendenomo parentano Apu Alla da sai hina puraano, koie rahasia da ari niburi hai bokudo raro nabii dungku'iramo pera suku, nta wawahira kando parasaeaho Apu Alla ronga nunu'o po'eheno. 27 Te'iaasi pantano Apu Alla, da dompa olaro ponto'orino. Ronga koie Yesus Kristus penteteanomo kai owose tereree'ano dungku samengka-mengkauno. Amin.