Pokomohende'o toraano petilato
15
1 Icita da memorodo parasaeanto paraluu'o kato sabara rereteihira da memodengke parasaeando, osie te'iaasi pokosanaa'o wotolu mpantato. 2 Kahioomo kato poweweu nta mohende'ano larono petilato nta nimoicoakono, kai tetiani moroso parasaeano. 3 Kana'umpe koie Kristus nai da'a pekirio wotolu mpantano, kana da teburi hai Boku Haratiano Apu Alla kanahi, « Pera po'anu-anundo miano da anu-anukomiu ariomo awaaku. »a 4 Luwu da teburi iponoha yahomo nta motisukita, kai morodo pe'ungkaato dahanto momperahi-rahi, tendenomo sabara ronga polilimboi da mebinta hai Boku Haratiano Apu Alla. 5 Ehepo Apu Alla, pu'uno sabara ronga polilimboi, tilaricomiu boboto'a kana da po'eheno Yesus Kristus, 6 kami boboto mpelaroa ronga mpe'asa gau kami reree'o Apu Alla Tamano Yesus Kristus Apunto.7 Nangkuamo koie, paraluu'o kami lawatio petilamiu, kana ari polawatino Kristus comiu, kai tereree Apu Alla. 8 Patudungku, tendenomo hi konianto'u Apu Alla, kai pokontewalio Kristus kana me'asa ata da layanio miano Yahudi nta pokomentoda'o pedandino Apu Alla hai ira pembue'anto, 9 kando to'ori ko'ira suku suere reree'o Apu Alla, tendenomo pompeehawano, kana da teburi,
« Nangkuamo koie, kaku daa nta rereekomiu hai ira suku suere,
ronga melagu reree'o neemiu. »b
10 Dahoo teburi penda,
« Comiu pera suku,
mimohende meronga umatino Apu Alla! »c
11 Ronga penda,
« Mireree'o Apu Alla, perano suku,
ronga luwuo ihi wonua, kahioomo kami mpoko'owose'o! »d
12 Ronga penda kanahino nabii Yesaya,
« Mebinta hai leeno i Isai dahoo nta saba me'asa miano danta parentaa pera suku;
hai Iaamo pomperahi-rahiando luwu ihino wonua. »e
13 Kahioomo Apu Alla, pu'uno pomperahi-rahia, kai pokomohende'o pelaroamiu kai momapu, tendenomo himi daa parasaeaho. Kai kuasaicomiu Sangkoleono Alata'ala nta pokomokoraa pomperahi-rahimiu.
I Paulus mokomenteeho ihino surano
14 Raro mpetilaku, matantungkuo hi me'alu niweweumiu da moico. Mondo'omo ponto'orimiu, ronga dakomiumo nta to'ori mpeka'oli-oliwi. 15 Sawali tendenomo pompeehawano Apu Alla i'aku, kaku moseka mokompehawakomiu die hai sura. 16 Iaamo da tena'aku tewali atano Yesus Kristus lako hai upuo suku da sa'iaa miano Yahudi, mokodungku'akondo'o Lele Mohende mebinta hai Apu Alla. Pohedoangku kana pua'ima da montompa pesomba, kai tarimahira Apu Alla ko'ira miano da sa'iaa Yahudi kana pesomba da teruruki, da ari tinindahakono Sangkoleono Alata'ala.
17 Dadi, tendenomo hicu boboto'akono Kristus, mohende'akumo hicu daa mohedoakono Apu Alla. 18 Kana'umpe kaku moseka mogau kana koie, te'iaasi mekona da ari niweweuno Kristus mentete hai aku, yahoo motisu'ira suku suere da sa'iaa miano Yahudi kando nunu'o po'eheno, mengkena gauku ronga niweweungku, 19 meronga peto'o tekangka da sai paisapo kadadia tendenomo kuasano Sangkoleono Apu Alla. Kanamo laro lolako'angku mebinta hai Yerusalem dungku hai wonua Ilirikum, ariakumo leleakoakondo'o leleno Kristus. 20 Mokeahaku moleleako lele moico hai hapa dahano sai paisapo pinodea neeno Kristus. Naku ehe mompo'engka hai pondasi da niweweuno suere miano. 21 Kana da teburi hai Boku Haratiano Apu Alla,
« Ko'ira miano da sai paisapo dungku'ira leleno, dahiramo nta ontoo;
ronga da sai paisapo modeaho, dahiramo nta paha'o. »f
Patuduno i Paulus nta lako hai Roma
22 Koiemo sababuno kaku sadia tehalangi, hicu daa nta lako awakomiu. 23 Sawali diekana nasai hinamo nta pohedoangku die hai wonua, ronga na'opi-opiamo ta'u kumokea lako awakomiu, 24 patudungku kicu lako hai Spanyol, nta tealoaku tepo'awaakomiu, kami ntulumiaku hai laro lakoahangku, kito arimo mentepo'awa.
25 Sawali diekana nta lako'aku isala hai Yerusalem mowawaakondo petotoando umatino Apu Alla. 26 Kana'umpe jema'a Makedonia ronga Akhaya boboto'iramo nta metotoa hai ira miano mparasaea da mengkadee-dee hai Yerusalem. 27 Sanaa'omo larondo nta metotoa. Santo'u-to'uno pantasio kando totoahira ko'ira miano Yahudi hai Yerusalem da mengkadee-dee. Kana'umpe ko'ira miano da sa'iaa Yahudi mpo'awandomo barakati nisalama'ako mebinta hai miano Yahudi. Pantasio kando wolohi'ira miano Yahudi hapamo da inawando. 28 Ki arimo die pohedoangku, ronga hicu arimo soroakondo'o die petotoa da tekongkomo, dahakumo nta lako hai Spanyol tealo dahamiu. 29 Kicu tealo awakomiu, dahoo nta me'alu barakatino Kristus nta inawamiu.
30 Ronga neeno Kristus Apunto, kai tii pololarono Sangkoleono Apu Alla, kupo'ita hai comiu kami mpekora itai amalaakuo hai Apu Alla. 31 Mimpo'itaakuo kai pulosi'aku Apu Alla mebinta hai limando miano da sai parasaea hai Yudea, ronga kaku to'ori lako mowawa petotoa hai Yerusalem, kando tarima moicoaku ko'ira miano mparasaea kokeena. 32 Kicanamo koie, ki po'eheno Apu Alla, dahakumo nta to'ori lako awakomiu ronga sanaa mpelaroa. Dadi, dahakumo nta telilimboi hai comiu. 33 Ehepo Apu Alla, pu'uno mapuhi, kai perongakomiu luwumiu. Amin.