Osie momposala'i petila
14
1 Mintarimaa miano da modengke parasaeano ronga osie gagahiakono'o da ponto'orino. 2 Dahoo miano da parasaea hi tewali mongkaa pera giuno kinaa, sawali dahoo da modengke parasaeano, te'iaasi mongkaa inahu riri, po'awano nai tewali mongkaa da sinumbele. 3 Koie miano da mongkaa pera giuno kinaa, osie paruruo miano da sai ehe mongkaa; ronga koie miano da sai mongkaa, osie pasala'o miano da mongkaa, kana'umpe koie miano dada'iaangkosi mianono Apu Alla. 4 Inaiho da kana co'o, kau tibo lako adili'o atano suere miano? Pongkonano sai pongkonano koie ata urusanomo ponggawano. Ronga nai da'a nta tuuna, nangkua Apu Alla da daga'o kai pentade ngkaida'a.5 Saliwano koie, dahoo penda miano da awaa hi daa oleo da owo-owosepo ka'iaa oleo meha. Sawali dahoo penda da awaa hi pengkena koie oleo. Kahioomo tee-tee'asa miano kai parasaeaho kana da ponto'orino. 6 Ki daa miano da awaa hi daa oleo da owo-owose, koie miano kai weweuho kana koie, dahoo pa'angga'o Apu. Ronga da mongkaa pera giuno kinaa, kai weweuho kana koie nta te'angga'ano Apu, namontarimakasi hai Apu Alla. Ronga da sai mongkaa pera giuno kinaa, kai weweuho kana koie nta te'angga'ano Apu, namontarimakasi hai Apu Alla. 7 Kana'umpe nahina miano da toraakono wotolu mpantano, ronga nahina miano da mateakono wotolu mpantano. 8 Kana'umpe hito tora, toraakono Apu, ronga kito mate, mateakono Apu. Dadi, tora ronga mate, icita die mianono Apu. 9 Nangkuamo koie, kai ari mate koie Kristus ronga tora mbule, kai tewali Apuno miano mate ronga miano ntora.
10 Sawali comiu hapa kami adili'o petilamiu? Atawa hapa kami mparuruo petilamiu? Kana'umpe luwunto dakita nta inadili hai pongadilano Apu Alla. 11 Nangkuamo koie, kai teburi:
« Kanamo die haratiano Apu:
Tendenomo Kuna ntora,
pera miano dahoo nta kokolontuu hai ra'incu,
ronga luwu elo dahoo nta poko'owose'o Apu Alla. »a
12 Dadi, icita tee-tee'asa miano dakita nta tanggoiho niweweunto hai Apu Alla.
Osie modio watu ntesubea
13 Nangkuamo koie, to'osie pada mpekamposa-posala'i! Sawali nta moicoano kato nunu'o die po'awa: To'osie moweweuhakono nta tesubeano pelaroano petilato kai tuuna. 14 Tendenomo hi pokomentoda'akuo Apu Yesus, kaku to'orio hi sahina da haramu hai ra'ino Apu Alla. Sawali hapa da kanahino koie miano hi haramu, haramunoo. 15 Kana'umpe kiu pokomasusa'o pelaroano petila'u tendenomo kinaau da inanggano haramu, nau da'amo meehawa'o pololaro. Osie mokomasilaka'o petila'u tendenomo kinaau, kana'umpe koie Kristus ariomo mateakono. 16 Osie moturusio miano kai sosa'oo niweweuu da moico. 17 Kana'umpe da kontu'uma hai laro mpomparentaano Apu Alla, na'iaa hapa da kinaano ronga da nindo'uno miano, sawali yahoo kai nunu'o po'eheno Apu Alla, ronga mo'awa mapuhi mpelaroa naamo mohende'a mebinta hai Sangkoleono Alata'ala. 18 Inai miano ntinenano Kristus da kana koie, koie miano mokosanaa'o larono Apu Alla ronga inangga'o hai to manusia.
19 Nangkuamo koie, kahioomo kato sadia mepekiriako da mompokoboboto, ronga da mompokomorodo imaninto pada-pada cita. 20 Osie sosa'oo pohedoano Apu Alla tendenomo kinaa. Luwu kinaa halala'o. Sawali tesala'o miano, ki tendenomo kinaano, kai pokontuunaa hai dosa simbauno. 21 Moicoano, osie mongkaa ihi mpinotuwu atawa mondo'u angguru atawa pera hapamo da pokontuunaa hai dosa petila'u. 22 Hapa da pinarasaeau, ungkaariomo panta'u hai ra'ino Apu Alla. Sanaa'o miano da sai mompenasa tesala, hi poweweu da tekonanoo. 23 Sawali inai da bata-bata, kai pongkaa, tesala'o koie miano, nasai da'a weweuho nunu'o parasaeano. Ronga luwu da sai mepu'uako parasaea yahoo dosa.