Turu hai pamarenta
13
1 Kahioomo luwu miano kai nunu'o po'eheno pamarenta da kuasa, kana'umpe nahina pamarenta da sai mo'awa kuasa mebinta hai Apu Alla; ronga Apu Alla da ari patantuo koie pamarenta. 2 Nangkuamo koie, inai da monta'o pamarenta, dahomo ta'oo da ari pinatantuno Apu Alla, ronga inai da moweweuhako, dahomo moweweu nta petorungku'ano. 3 Kana'umpe miano da moico niweweuno, nai da'a paraluu momeetako pamarenta, te'iaasi ki poweweu mosa'o dahanomo nta momee. Mokeakomiu bara tora sai momeetako pamarenta? Poweweumo da moico, dakomiumo nta nireree. 4 Kana'umpe pamarenta yahoo ata mpinerahi-rahino Apu Alla da mohedo nta nimoicoakomiu. Sawali kimi mpoweweu da mosa'o, kahioo kami momeetako, kana'umpe nai da'a sia-sia hi ari pinoweehi kuasa. Pamarenta yahoo ata pinatantuno Apu Alla danta padala'o hukumano Apu Alla hai miano da moweweu mosa'o. 5 Nangkuamo kai paraluu kami nturu, na'iaa te'iaa momeetako sa'o larono Apu Alla, sawali nunu'o ponto'orino laromiu. 6 Nangkuamo koie sababuno kami mpowada sima. Kana'umpe pamarenta yahoo miano ntinenano Apu Alla da urusio koie pohedoa. 7 Dadi, mimpowada hai pamarenta da paraluu niwadamiu. Miwada'o sima ronga karakesi hai mianono pamarenta da montagi. Mi'angga'o miano da paraluu inangga, ronga haragai'o da paraluu hinaragai.Pololaro koa'anomo parentano nabii Musa
8 Osie kodosa kasami wada'o. Luwu dosa te'iaasi me'asa da moico da sai paisa tewada yahoo dosa mekalolaro. Kana'umpe inai da mololaro simbauno, yahomo da nunu'o Boku Parentano nabii Musa. 9 Nangkuamo koie parentano i Musa kanahi, « Osie meduluakono da sa'iaa samporau, osie mompepate, osie mononako, osie mokeahako hapa-hapano simbau'u, »a ronga luwu petabe suere, mondo'anomo hai larono die parenta: « Lolaroo simbau'u kana tongko wotoluu. »b 10 Inai da lolaroo simbauno nai da'amo nta weweu mosa'oo simbauno, nangkuamo koie miano da lolaroo simbauno kai inangga da mokoweweuhomo luwu parentano nabii Musa.
11 Himina nto'oriomo dadaano wotu diekana hicuamo wotu mpe'engka'a mebinta hai poturia, kahioomo kami mpe'engka. Kana'umpe sa'oku-okudanomo salama'a diekana ka'iaa iso-isoto parasaea. 12 Mengkauhomo malo, dahomo nta oru meanta.c Nangkuamo koie, tobintaamo niweweu da mosa'o, kato ungkaario sandata da molinyaa. 13 Totoramo ko'ampadea, kana hi meanta, osie lia mohende'a da sa'ia-iaa dungku memolangu, osie endeo ronga nunu'o kea-keano laromiu, osie menteposala ronga singgira. 14 Sawali kahioomo Apu Yesus Kristus kai tewali sandata peta'omiu, ronga osie monunu'akono kea-keano wotolumiu da kodosa.