Rupa-rupa kuasa nta molayani
12
1 Nangkuamo koie, raro mpetila, tende pololarono Apu Alla ku'oliwicomiu, kami mpesombaako wotolumiu kana pesomba da tora ronga da tetindahako da po'eheno Apu Alla. Koiemo da pantasi kimi mpesombaako hai Apu Alla. 2 Osie monunu dadaano miano wita'ea, sawali kahioomo Apu Alla kai boli'io pekirimiu kai tonia, dahamiumo nta to'orio da po'eheno Apu Alla: hapa da moico, da sai tekebaako, ronga da pokosanaa'o larono.3 Tendenomo Apu Alla hi ari moweehaku pololaro, yahomo kaku daa oliwicomiu: Osie mentaba angga'o wotolumiu himi daa monto-montoe, sawali kahioomo kai kana da pantasi, nunu'o parasaeamiu hi ari Apu Alla tilaricomiu. 4 Kana'umpe koie wotolunto me'aluo pokosangkano, sawali nai da'a luwuo mengkena pohedoano. 5 Kanamo icita na'anta, mau kito me'alu, me'asamo wotolu tona boboto'akonomo Kristus; kana pokosangkano wotolu da me'asa. 6 Ariomo Apu Alla titila'akita'o tee-tee'asa miano kuasa da sai mengkena nta molayani. Kicua kuasa nta mogau kana nabii, moicoo kato weweuho nunu'o owoseno imaninto. 7 Kicua kuasa nta montulumi, moicoo kato pontulumi santo'u-to'u. Kicua kuasa nta mompotisu, moicoo kato pompotisu santo'u-to'u. 8 Kicua kuasa nta mompokomorodo pineehawa, moicoo kai santo'u-to'u. Inai da mokua metotoa, moicoo ki weweuho ronga mesawa mpelaroa. Inai da tewali powawai, moicoo ki mokua weweuho. Inai da mobuna larono montulumi, moicoo kai mohende moweweuhako.
Oliwi tora mpekalola-lolaro
9 Kahioomo himi mpololaro kai laronto'umiu. Osie mo'okudahi da mosa'o, weweuho da moico. 10 Mimpekalola-lolaro kana da metitila, ronga mpekoka mpekahara-haragai. 11 Kahioomo kai osie teruru mokuamiu. Kahioomo kai moroso laromiu layani to'uo Apu Alla. 12 Mohendemo kami daa momperahi-rahi, sabara tineiho karasai, ronga e'elengua amala. 13 Bantu'ira miano mparasaea da mengkakuranga, ronga sadia laromiu mompetoka miano.
14 Mimpo'itaakono barakati miano da pakaseakomiu; mi'osie tundario. 15 Mohendemo merongaa miano da mohende, pewowomo merongaa miano da mewowo. 16 Kahioomo kami meboboto mpelaroa hai laro ntoraahamiu. Mi'osie mepekiriako hapa da montoe, sawali gilisako pinehawamiu hai hapa da biasa.a Osie mokea mompemanda-mandara!
17 Osie wolohiakono'o sa'o da mosa'o; sawali weweuho da inanggado luwu miano hi moico. 18 Ki tewali, kami ntora tepokonaakondo luwu miano. 19 Raro mpetilaku da telou, mi'osie mokea mowolohi pantamiu, sawali kahioomo Apu Alla danta mowolohi, kana'umpe nadaa teburi kanahi, « I'aku da kohaku, I'aku danta mowolohi, kanamo koie haratiano Apu. »b 20 Sawali,
« Ki mokohuloo pedaluu,
osie sai moweeho mongkaa;
ki mokokondo'u, poweeho kai pondo'u!
Kana'umpe kicana koie poweweuu, dakomo montawuhako wea api hai towo rapano. »c
21 Osie ehe-eheako kai nangico da mosa'o, sawali nonangiakono'o da moico.