Petotoa hai jema'a Yerusalem
16
1 Diekana mekona petotoamiu hai miano Ngkarasitee hai Yerusalem, patudungku minunu'omo ku'ari motisu'ira raro jema'a hai Galatia. 2 Tapio oleo Mincu, kahioomo kami mpontindahako doi, kami dioho nta petotoamiu opi-opiamo nunu'o inawano tee-tee'asa miano. Dadi, impia kaku leu, nami da'amo nta mpongkongko. 3 Kaku teleupo, dahakusi nta montena miano da po'ehemiu danta wawaa koie petotoamiu hai Yerusalem meronga sura. 4 Ronga ki paraluu kaku lako, kahioomo kako mperonga.Patuduno i Paulus
5 Dahaku nta lako awakomiu kicu ari tealo hai Makedonia, kana'umpe dahaku nta tealo meri'ou hai Makedonia. 6 Aipo dahaku nta moo'ia hai comiu, deenapo dungku pura wula mokoseoha. Ki aripo koie, dakomiumo nta tule'i bantu'aku kaku omputako salangku. 7 Die tempo, naku ehe nta tealo awakomiu ki sabutunomo. Ki po'eheno Apu, mokeahaku lembahi'ite hai comiu.
8 Nta daahangku isala na'ai hai Efesus dungku oleo owose Pentakosta. 9 Kana'umpe diekana lalesaakumo mohedo pohedoa da owose ronga koguna, mau ki daa me'alu miano pedalungku.
10 Ki leu Timotius, kai moico polawatimiu kai sanaa merongakomiu, kana'umpe hina ngkanasi i'aku mohedo hai Apu. 11 Osie sampe da'a da paruruo. Mibantu'o kai tule'isi omputako salano ronga momapu larono, dungku kai pohule awaaku, kana'umpe dahaku tarimaa meronga ko'ira salakono.
12 Petilato i Apolos manturu'akumo tena'o merongahira raro mpetilato kando lako awakomiu, sawali nasai ehe lako diekana. Ki leuhomo wotuno da moico, dahosi nta lako.
13 Mimpedagai kai morodo parasaeamiu! Mimosekamo ronga morosomo! 14 Luwu da niweweumiu, kahioomo kai peronga pololaro.
15 Minto'oriomo dadaano i Stefanas ronga ihi laicano, iramo da meri'ou tewali miano Ngkarasitee hai Akhaya. Laronto'undo mpohedo molayani umatino Apu Alla. Raro mpetila, mokea to'uaku, 16 kami nunu to'uo miano da kana i Stefanas, kanapo pera miano da nunu'ira mekora mpohedo. 17 Mohende'aku hindo leumo i Stefanas, i Fortunatus, ronga i Akhaikus. Iramo popo'eumiu. 18 Pompokomohendeno larongku, kanasi pompokomohendeno laromiu. Nangkuamo koie, miharagai'ira.
Salamu
19 Salamundo jema'a propinsi Asia hai comiu. I Akwila, i Priskila, ronga jema'a da nte mesambahea hai laicando mpompokatu salamu hai comiu ronga neeno Apu. 20 Salamundo luwu petila sa'imaninto hai comiu.
Pada mpekasalamu ronga mongkeni lima peto'ono himi mpe'asa imani.a
21 Die i'aku i Paulus, die salamungku niburi limangku.b
22 Inai da sai lou'o Apu, dahoo nta tonduwako Apu. O Apua, Mileumo!c
23 Kahioomo pompeehawano Apu Yesus kai perongakomiu.
24 Polouku luwumiu da boboto'akono Yesus Kristus.