I Paulus ronga karasu-rasulu
11
1 Moicoano kimi sabaraakuo hicu pereree mpanta kana miano mpore. Menonaa himi sabaraakuo. 2 Kaku dagaicomiu kuna nta masusa ki daa da gangguicomiu. Pelaroangku kana pelaroano Apu Alla da dagaicomiu. Kana'umpe kuna arimo kootiakokomiu'o me'asa tama, yahoo koie Kristus, comiu kana me'asa waipode da kototo. 3 Sawali kuna ntemee-mee, te'iaamo ki lako pekirimiu pinokompore, kami bintaa poloumiu da molino santo'u-to'u hai Kristus, kana i Hawa da ari nigau-gauno ule tende ko'akalano. 4 Kana'umpe medokaa dahamiu tarimaa miano da leu leleako dadaano Yesus da suere, nai kana da nileleakomami, atawa tarimaa sangkoleo da suere, da sa'iaa Sangkoleono Apu da ari tinarimamiu, ronga tarimaa lele mohende suere ka'iaa da arimo tinarimamiu. 5 Sawali naku da'a mpiha menasaa, hicu kolalo owawa ka'iaa ko'ira miano da kana rasulu, da ponto'ori mpantado nai hina pengkenando. 6 Aipo naku mandara mogau, sawali kicua ponto'ori, na'iaa i'aku miano mpore. Koie manturukamimo mokomentoda'akomiu'o kami mpaha to'uo.7 Tempongku leleako haratiano Apu Alla hai comiu, naku da'a mo'ita ongkoso hai comiu mau te'ete. Kaku weweuho kana koie, kuna meparuru ronga pa'anggakomiu. Koiemo bara tesalaku hai comiu? 8 Tempongku layanicomiu, da ongkosoniaku yahoo jema'a suere. Tewalio kanahi, kupokomarugi'ira ko'ira jema'a kaku to'ori tulumicomiu. 9 Koie wotu hicu kakuranga, naku paisa mompokomasusa mau te'asapo miano hai comiu. Luwuo da paraluuku ko'ira petila da hai Makedonia da moweehaku. Ntaperangku o'olokaa kaku osie bebeaticomiu hai perano luwu, ronga dahaku nta e'elengua medagai kana koie. 10 Nimohende'akongku die, nai da'a nta tule'i tekikihi hai upuo wonua Akhaya. Kowati miano da ari tarimaa pompotisuno Kristus da menona, naku da'a mekulepi. 11 Yo hapa kaku kanahi kana koie? Tendenomo bara hi saku da'a lolarokomiu? Apu Alla da to'orio hicu sadia lolarokomiu!
12 Da niweweungku diekana, naku da'a nta ari-ari weweuho, kai osie hina alasando ko'ira rasulu kando mentaba ronga kanahi pohedoando pengkenakamisi. 13 Ko'ira miano daakana yahoo karasu-rasulu, miano da mompokompore, mompe'anu-anuto'u kana-kana hicua rasuluno Kristus. 14 Koie daakana nai da'amo paraluu tinekangkaako, kana'umpe mau na'ana ponggawano bilisi biasaa mesarungga kana mala'ekati da molinyaa! 15 Dadi, na'iaamo tinekangkaako kindo mpesarungga anabuano kana atano Apu Alla da nunu'o petenano. Kompura-puraano dahirasi nta tarimaa powolohi kana niweweundo da mosa'o.
Karasaino i Paulus tendenomo Lele Mohende
16 Ku'ulangio penda: Osie da'a da angga'aku pore. Sawali kimi angga'aku kana koie, palalesaaku die da pore kaku pereree mpanta te'ete. 17 Die dahaku nta mogau kana miano mentaba, sawali na'iaa Apu da tena'aku, die menonaa hicu daa mogau kana miano mpore. 18 Menonaa, me'aluo miano da mereree mpanta kana dadaano miano wita'ea, dadi aku na'angku dahaku nta mereree mpanta. 19 Himina merasa'o wotolumiu mandara, yahomo kami sanaa mompodedea miano mpore! 20 Mimpoturusio miano kai weweukomiu kana ata, atawa da purusicomiu ronga mo'alaicomiu laba, atawa menasaa hindo monto-montoe ka'iaa comiu, ronga moseka totapalicomiu. 21 Mokoko'anuaku akui'o hi ntaperamami modengke nta moweweu kana koie.a
Sawali ki daa miano suere da moseka mereree mpanta, aku na'angku mosekaaku! Die kudaa mogau kana miano mpore. 22 Miano Ibrani bara na'anda? Aku na'angku miano Ibrani. Miano Israil bara na'anda? Aku na'angku miano Israil. Leeno bara i Ibrahim na'anda? Aku na'angku kanasi koie. 23 Atano bara Kristus na'anda? Hicu pogau kana miano molawu, sawali menonaa aku die atano Kristus da kolalo moico ka'iaa ko'ira luwundo! Moko-mokoraa pohedoangku, mora-moraruakumo niwiso hai torungku, me'a-me'aluo pinakaseangku, manturu'akumo nta mate. 24 Pelimahiramo miano Yahudi pakaseahaku, hai larono asamponoha tolu pulu osio kawosu.b 25 Pentoluhira miano Roma langkuakuo tuko; ponohaaku niwatuindo miano me'alu; pentoluaku me'ulea hai bangka kai tondu, ponohaaku melontoi hai tahi asa oleo asa malo. 26 Manturu'aku mo'awa abalaa hai laro lakoahangku: abalaa e'e waa ronga abalaa parampo; abalaa hai miano Yahudi, rongapo da sa'iaa miano Yahudi; abalaa hai kota, ronga hai lueno; abalaa hai tonga ntahi, ronga abalaa mebinta hai ira da kanahi petila, mainakaa na'iaa. 27 Mokokauhaku tendenomo mohedo mobea, naku nte moturimo; mokohuloo ronga mokokondo'u, nte sai mongkaa; mokoseo tendenomo sai koa pinodai. 28 Naku da'amo nta monenee ko'ira meha-mehano, da pinekirincu tapio oleo yahoo dadaando ko'ira luwu jema'a. 29 Ki daa miano da modengke imanino, naku da'amo bara i'aku nta itai mompenasa modengke? Ki daa miano da tuuna hai dosa, nai da'a bara nta itai mosa'o larongku?
30 Kicu daa nta ehe mereree mpanta, dahaku nta mereree mpanta'ako hicu modengke. 31 Apu Alla Tamano Apu Yesus, da tereree samengka-mengkauno, da to'orio hi saku da'a mekulepi. 32 Tempongku da'a hai Damsik, gubernur da kuasa na'ico hai pomparentaano mokole Aretas, montena sorodadu dagai'o koie wambano kota kando rako'aku. 33 Sawali ko'ira simbauku ndona wiso'aku hai bolo ngkompe, kando ruruhaaku mebinta hai kaumba toricino kota. Kanamo koie kaku tepulosi mebinta hai limano gubernur.