Banguno i Paulus
10
1 Dahoo opia miano hai comiu da medoka kanahi, mowaraaku hito mentepora'i, ronga mosekaaku kito pekamentalahi. Sawali larono neeno Kristus da sabara ronga moluu, i'aku Paulus, mo'ita, 2 kami osie pakisaa'aku mesipa moseka kito mentepora'i. Kana'umpe patudungku nta moseka banguku hai ira miano da kanahi, dakami nunu'o bangudo miano die hai wita'ea. 3 Menonaa, dakamipo tora hai wita'ea, sawali nako da'a me'o'anu kana dadaano miano wita'ea. 4 Sandata da pinakemami laro mamusua na'iaa sandatano miano die hai wita'ea, sawali sandata da mowawa kuasano Apu Alla. Koiemo sandata porowakimami bente, 5 batuano pononangimami miano da mekakahi ronga luwu miano da mentaba, da halangio miano kando osie to'orio Apu Alla. Luwu da pekirindo kokuasaiho, kando turu hai Kristus. 6 Ki laronto'umiumo nunu'o po'eheno Kristus, sadiakamimo nta hukuma'ira luwu da sai ehepo mpenunu.7 Kahioomo kami ontoo da hai ra'ino matamiu! Ki daa miano da parasaeaho wotoluno hicua iaa mianono Kristus, kahioomo kai pekirio ronga to'orio hicuasi na'amami mianono Kristus, kana iaa. 8 Mau kicanano lalo'eahaku mereree mpanta tendenomo kuasa hi ari tilaricami Apu, naku da'a nta mokoko'anuako. Kana'umpe koie kuasa yahoo nta pokomorodoo imanimiu na'iaa nta sosa'oo. 9 Mi'osie kanahi hicu daa u'umeetiakokomiu'o surangku. 10 Kana'umpe kanahino miano, « Menonaa, ko'ira surano i Paulus ko'ihio ronga mongkasoo, sawali ki tepora'imo, molu'oo ronga ino'awano nahina gunano. » 11 Sawali ko'ira miano da mengkanahi kana koie, kahioomo kando to'orio, yo bangumami hito mentepora'i pengkenaasi gaumami hai bolo sura, hi sako da'a mentepora'i.
Pekirino i Paulus mekona hai wotoluno
12 Nako moseka cami mokompengkenaa wotolumami ronga ko'ira miano da mehawado mpereree mpanta. Ukuru'o wotolundo nunu'o po'ukuru niweweundo, ronga mokompengkenaa wotolundo pada-pada ira. Ntaperando mempore! 13 Deenapo nako ehe telia mereree mpanta. Sawali kohakukami mohende'ako luwu da niweweumami hai pohedoa hi ari mompatantuakami Apu Alla, da tewiso ronga comiu miano hai Korintus. 14 Kana'umpe icami da leu meri'ou hai Korintus awakomiu, tuluraakomiu'o Lele Mohende dadaano Kristus. Dadi, kico pereree mpanta tendenomo comiu, nako da'a lia mpereree'a, kicanano nako paisa leu hai comiu. 15 Nako da'a mereree'ako pohedoano suere miano da sa'iaa pohedoamami. Sawali pomperahi-rahimami, ki lakomo imanimiu tetiani, pohedoamami hai comiu nta tetiani molue, asala osie liaho pohedoa hi ari mompatantuakami Apu Alla. 16 Nangkuamo kako daa nta tule'i moleleako Lele Mohende hai wonua suere da liaho wonuamiu, asala osie mentaba'ako wuano pohedoano suere miano hai wonua hi ari mompatantuakondo Apu Alla. 17 Dahoo teburi hai Boku Haratiano Apu Alla, « Inai da mokea mohende, kahioomo kai mohende'ako Apu. »a 18 Kana'umpe na'iaa miano da mereree mpanta da inangga moico, sawali yahoo miano da nirereeno Apu.