Petotoa hai jema'a Yerusalem
9
1 Santo'u-to'uno nai da'amo paraluu kaku poburiakomiu dadaano petotoa danta pinokatu hai miano mparasaea da hai Yudea. 2 Kuto'oriomo himi ehe metotoa, ronga ariakumo rereekomiu hai ra'indo miano mparasaea hai Makedonia. Kupo'awaakondo hi petampu'u ta'u da ari tealo, raro mpetila hai Akhaya sadiakomiumo nta mompoweehi petotoa.a Ronga tendenomo po'ehemiu mompoweehi, me'aluhira na'anda da mokea mompoweehi. 3 Diekana kutena'akomiu'o i Titus ronga ko'ira petila da orua, kai osie dadi kule hapa da porereemami comiu. Dadi, kahioomo kami sadia to'u, kana-kana ku'ari mo'awaakondo. 4 Ki daa opia miano Makedonia da perongangku lako hai comiu, kando awakomiu hi sami da'apo mesadia, dakami nta dompa mokoko'anu hicona dompa rereekomiu. Ronga comiu na'amiu nta kanasi mokoko'anumiu. 5 Nangkuamo koie, kaku penasaa hi paraluu montena miano lako awakomiu meri'ou, danta urusio koie petotoa da ari pedandimiu. Kaku weweuho kana koie, ki dungku'omo teleuhangku, petotoamiu sadia'omo. Nangkuamo dahano nta mentee, yo petotoamiu koie meronga pelaroamiu da molino, na'iaa pinakisaa.Mohende metotoa dahoo barakatino
6 Mimpeehawa'o, miano da mohawu palongo te'ete dahoo nta mo'awa te'ete, ronga miano da mohawu me'alu dahoo nta mo'awa me'alu. 7 Tee-tee'asa miano kahioomo kai pompoweehi nunu'o po'eheno larono, osie bata-bata atawa tepakisaa, kana'umpe Apu Alla lolaroo miano da mohende mompoweehi. 8 Ronga Apu Alla kuasaa moweekomiu barakati da me'alu, kami sadia mo'awa da paraluumiu, deenapo kolalo, kami nto'ori moweweu da moico ronga montulumi. 9 Kana da teburi hai Boku Haratiano Apu Alla,
« Iaamo da moweeho ronga da titila'o miano ngkadee-dee,
kolaroo dungku samengka-mengkauno. »b
10 Apu Alla da mompasadia'akono palongo danta mohawu, ronga nta mengkinaanto, yahosi danta mokome'aluakokomiu'o koie da hinawumiu, kai tetiani wuano hai niweweumiu da moico. 11 Kanamo koie kami daa nta kawasaako luwu, ronga sadia mobata mompoweehi. Ronga pompoweehimiu da tinitilamami nta mokome'aluomo miano da montarimakasi hai Apu Alla. 12 Kana'umpe die pohedoamiu da moico na'iaa te'iaa mokongkoa'o kakurangano miano mparasaea, sawali namokome'aluo miano da montarimakasi hai Apu Alla. 13 Tendenomo koie pohedoamiu da inontondo, me'aluo miano Ngkarasitee hai Yudea danta reree'o Apu Alla, hindona ontoo konianto'uno laromiu nunu'o Lele Mohende dadaano Kristus da pinarasaeamiu, ronga ontoo hi mobata laromiu titila'akondo'o koie petotoa, ronga hai miano suere. 14 Dahandomo nta santo'u-to'u amalaakokomiu hindona loukomiu, tendenomo hi peehawa to'ukomiu Apu Alla. 15 Kahioomo kato pontarimakasi hai Apu Alla tendenomo pompoweehino da sai hina pengkenano!