Mompoweehi petotoa
8
1 Raro mpetila, mokeakami kami nto'orio pompeehawano Apu Alla hai ira jema'a Makedonia. 2 Ariomo konahira karasai da mobea. Sawali hai tongano koie karasai, deenapo dompando memohende ronga mobata to'u larondo metotoa, mau hi taperando kadee-dee. 3 Ehe'aku kanahi, pompoweehindo nunu'o pongkuramindo, deenapo liaho pongkuramindo. 4 Po'ehe pantado, mokorahira mo'ita hai cami, ki tewali kando itai metotoa hai miano mparasaea hai Yudea. 5 Pompoweehindo kolaloo me'alu ka'iaa da pomperahi-rahimami. Isodo soroo wotolundo hai Apu, perumbuino hai cami, kana da po'eheno Apu Alla. 6 Nangkuamo koie, kako oru tena'o i Titus, da ari tampu'uo mongkongko petotoa, kai lako awakomiu penda, ronga poko'ario koie pohedoa. 7 Diekana, comiu da mompokulaloi hai luwu-luwuako: laro imani, laro mpogau'a, laro ponto'oria, laronto'u mohedo, ronga pompeehawamiu cami; kanamo koie kahioomo kami mpompokulaloi laro mpohedoa diie.8 Kaku pogau kana koie naku da'a nta parentakomiu. Patudungku kaku tuluraakomiu'o hi daa jema'a da owose pompeehawano simbauno, kaku to'orio ki kana'umpe owoseno pompeehawamiu. 9 Minto'oriomo hi owose pololarono Apunto Yesus Kristus. Kawasaa, sawali namokongkadee-dee'o wotoluno tendenomo comiu, ronga koie kadee-deeno da mokongkawasakomiu.
10 Nunu'o po'awangku, moicoomo kami mpoko'ario koie pohedoa metotoa da ari tinampu'umiu ta'u da ari tealo, hina owosesi gunano hai comiu. Kana'umpe comiusi da iso pekirio ronga tampu'uo koie pohedoa. 11 Diekana kahioomo kami omputako koie pohedoa nunu'o pongkuramimiu. Kahioomo kami mpekora pasipolee koie pohedoa dungku kai ari, kana isomiu mekora pekirio. 12 Kana'umpe kito ehe mompoweehi, Apu Alla dahoo nta tarimaa, nunu'o hapa da ari nidionto. Nai da'a montuntu da sai hina hai cita.
13 Na'iaa patudungku bebeaticomiu, ronga kando mesanaa ko'ira da mpo'awa pompoweehimiu, sawali kai osie lalo'ea teposengka tora-toramiu. 14 Dadi diekana, kahioomo torano inawamiu danta mokongkoa'akondo'o miano da mengkakuranga. Perumbuipo, kindo mpo'awamo, yahopo kando pokongkoa'akomiu'o kakurangamiu. Kicanamo koie, nahinamo teposengka'ano. 15 Kana da teburi hai Boku Haratiano Apu Alla, « Miano da mo'awa me'alu nai kolalo, da mo'awa te'ete nai kakuranga. »a
I Titus tinena lako hai Korintus
16 Pontarimakasicami hai Apu Alla hinangkua da pokomorosoo pelaroano i Titus kako boboto tulumicomiu. 17 Kana'umpe i Titus nai te'iaasi nunu'o hico boboiho, sawali po'ehe mpantano kai lako awakomiu. 18 Danta salako'o, kopontena me'asa petila da te'angga hai luwu jema'a, nangkua pohedoano moleleako Lele Mohende. 19 Na'iaa te'iaa koie, koiemo miano da ari tinisudo opia jema'a, kai salakokami kico lako mowawa petotoa. Patuduno kai pinoko'owose Apu, ronga kai inonto hi laronto'umami montulumi.
20 Dompakami o'olokaa kai osie da'a miano da pasalakami laro pompokodungku'amami die petotoa owose. 21 Mokeakami moweweu da moico, na'iaa te'iaa hai ra'ino Apu, sawali ronga hai ra'ino to manusia.
22 Saliwano i Titus ronga koie simbauno, pontisukamipo me'asa miano, da manturumo pinaresamami hi ehe montulumi. Lalo'eahopo diekana, kana'umpe owose'o pomperahi-rahino hai comiu. 23 Koie i Titus yahoo simbauku, da mohedo merongaaku tendenomo comiu. Ronga koie da orua petilamami yahoo tinenado jema'a. Tendenomo i'ira kai pinoko'owose Kristus. 24 Mokeakami kami ntarima moicohira, kando ontoo ko'ira jema'a pololaromiu, ronga kando to'orio porereemami hai comiu hi menona.