7
1 Raro mpetila da telou! Luwu koie dandi yahoo taronto. Nangkuamo koie, kahioomo kato pokomowuaho wotolunto ronga sangkoleonto hai pera da mokomowusee. Kahioomo kai e'elengua tetiani molinyaa pelaroanto ronga momee hai Apu Alla.Mohende hi tepokonamo mbule
2 Milawaticami hai pelaroamiu! Nako paisa moweweu ntesala hai te'asapo miano, ronga nai hina miano da ari pinokomporemami. Nahina dahamami mo'ala laba mau hai te'asapo miano. 3 Kaku kanahi kana koie, na'iaa nta pasalakomiu. Kana'umpe ariakumo mo'awaakomiu meri'ou kanahi: dompakami meehawakomiu, kato tora mpetila dungku mate. 4 Kuparasaea to'ukomiu! Dompa'aku mohende'ako comiu! Mau ki me'alu karasai da awakami, sawali taperangku telilimboi ronga mohende.
5 Kana'umpe sadungkumami hai Makedonia nahina pekolimami. Hai hapa dahamami dahoo susa: hai luara dahoo pekakahia, ronga hai laro dahoo da pinomeetako. 6 Sawali Apu Alla, da lilimboiho miano da tekura larono, yahomo da lilimboicami hi leumo i Titus. 7 Nai te'iaa hi leumo, sawali ronga hi tuluraakami hi sanaa larono daamiu mperonga. Kana'umpe iaa da ari mo'awaakami himi moko'au, himi mpesosoori, ronga hi laronto'umiu nta meduluaku, dungku kai tetiani owose mohendeku.
8 Dadi, mau kicu ari popoetio laromiu tendenomo koie surangku, naku da'a mesosooriako. Menonaa, ariaku mesosoori tempongku ontoo koie sura hi pokomopoe'o laromiu, mau ki te'iaasi asantonia. 9 Kaku mohende diekana, na'iaa hi mopoe laromiu, sawali hina nteboli'imo sipamiu tendenomo koie poe laro. Kana'umpe koie poe laromiu po'ehenosi Apu Alla, yahomo kasami da'a marugi hai cami. 10 Kana'umpe poe laro da nunu'o po'eheno Apu Alla weweukita kato manda kato salama. Poe laro da kana koie osie sosoorio, sawali poe larono wita'ea powawaa matea. 11 Mimpekiriopo hapa wuano poe laromiu da po'eheno Apu Alla! Wuano koie poe laro yahoo hi laronto'umiusi molawani hi sami ntesala, mingkokoleahomo dosa, momee moweweu da tesala, moko'au hai cami, ronga laronto'umiu hukumaa miano da tesala! Luwu hai niweweumiu koie inontoanomo hi sai hinasi tesalamiu. 12 Dadi, mau kicu ari moburi koie sura, kaku poburi, na'iaa tendenomo miano ntesala, na'iaa penda tendenomo da marasaihako tesalano. Sawali kuna moburiakomiu koie sura, kai menteemiuo hai ra'ino Apu Alla hi laronto'umiu loukami. 13 Koiemo da mokolilimboiho pelaroamami.
Saliwano koie, taperamamipo penda sanaa, kona ontoo mohendeno i Titus himi ari pokosanaa'o pelaroano. 14 Menonaa, peri'ouhakumo rereekomiu hai iaa. Pontarimakasiaku hai comiu hi sami da'asi koko'anuihaku. Luwu ari kanahimami hai comiu menonaa. Kanasi penda koie ko'ari rereekomiu hai Titus menonaa. 15 Diekana i Titus tetianiomo polouno comiu, koa hi pokopehawa'o himi mpada nunu'o oliwino, ronga himi ntarimaa kami daa angga'o ronga nunu'o po'eheno. 16 Taperangku sanaa, kana'umpe kuparasaeakomiumo hai perano pasipole.