Mekatulu-tulumi
6
1 Raro mpetilaku, kimi lako mo'awa te'asa miano da moweweu dosa, comiu da kinuasaino Sangkoleono Apu, kahioomo kami ngkopelaroa moluu potisu'o koie miano kai pohule nunu'o mbule tora da tekona, ronga mimpedagai kai osie konakomiu posoba-soba. 2 Kahioomo mimpekatulu-tulumi batanio simbaumiu hai larono karasai, yahopo kami nunu'o parentano Kristus. 3 Kana'umpe ki daa me'asa miano da kanahi ko'angga'o wotoluno, sawali ki sai hina miano da angga'o, iaamo da kulepio wotolu mpantano. 4 Moicoo tee-tee'asa miano kai paresaa niweweuno. Ki moico, yahopo kai tewali mohende tendenomo niweweuno. Sawali osie mo'o'onto niweweuno suere miano. 5 Kana'umpe pera miano dahoo nta tanggoiho niweweu mpantano.6 Moicoano miano da pinotisu'ako haratiano Apu Alla, kai poweeho da paraluuno koie da potisu'o.
7 Osie kulepio wotoluu. Apu Alla nai ehe pinoko'anu-anu. Kana'umpe da nimbulano miano koiesi danta pinelaweno. 8 Inai da mombula pombulo da komboho, batuano, ki nunu'o po'eheno wotolu ngkodosano, dahoo nta mo'awa matea mebinta hai wotolu ngkodosano. Sawali ki pombula pombulo da moico, batuano, nunu'o po'eheno Sangkoleono Apu, dahoo nta awaa tora ngkaida'a mebinta hai Sangkoleo. 9 To'osie mokokau moweweu da moico, kana'umpe ki dungkumo tempono, dakitasi nta upuo wuano, ki sato da'asi isea. 10 Nangkuamo koie, hito daapo lalesa, kahioomo kato poweweu da moico hai pera miano, kontu'uma hai petilato da pe'asa imaninto.
Pompokompehawa ronga salamu
11 Ontoomo, kana'umpe owoseno adie horopu hicu ari moburiakomiu ronga lima mpantaku.a
12 Ko'ira miano da tandaiho pakisaakomiu kami mpesuna yahoo miano da mokea mepopo'ontoniako hindo nunu'o sarano agama. Patudundo yahoo kando osie pinakasea tendenomo leleako nimateakono Kristus hai keu mpinotalambe. 13 Kana'umpe ko'ira na'anda miano da ari mpesuna, nando da'asi mponunu parentano i Musa. Sawali patudundo kami mpesuna yahomo kando mehawa'ako himi nunu'o koie atora. 14 Sawali i'aku, nahina to'u da po'ehengku, ki sa'iaa nimateakono Apunto Yesus Kristus hai keu mpinotalambe. Tendenomo nimateakono koie, die wita'ea nahinamo gunano hai aku, ronga kanaakumo miano da mateakono wita'ea. 15 Kana'umpe ari mesuna atawa sai mesuna nahina batuano, da kontu'uma yahoo tewali miano da tora ntonia. 16 Kahioomo Apu Alla kai mapuhio ronga lolaroo luwu miano da nunu'o die atora, ronga miano Israil da nunu'o Apu Alla.