Boboto'ano jema'a
4
1 I'aku die miano ntinorungku'ako pohedoano Apu Yesus, kupekora mo'ita kami ntora kana sipano miano da niboboino Apu Alla. 2 Kahioomo kai moluu ronga owawa laromiu, naamo sabara. Osie mo'ungkaari sinalakino simbau'u, kami nto'ori pekalola-lolaro. 3 Mimpeehawa'o kami e'elengua piaraa boboto'amiu hi ari moweekomiu Sangkoleono Apu, da kinoko'ako tora ntepokonaa. 4 Tewalicomiumo me'asa wotolu. Me'asa Sangkoleono Apu, ronga me'asasi da pinerahi-rahimiu tendenomo hi boboicomiu Apu Alla. 5 Me'asa Apu, me'asa parasaea, me'asa pebaho'a, 6 me'asa Apu Alla Pe'ama'ano ronga Pe'apuano luwu to manusia, mohedo menteteiho luwu, ronga da'a hai larono luwu.7 Sawali icita tee-tee'asa miano aricitamo pinoweehi kuasa nunu'o da pinatantuno Kristus. 8 Nangkuamo koie, kai teburi hai bolo Boku Haratiano Apu Alla kanahi:
« Tempono moleka sabe hai montoehano,
me'aluo miano nterako da niwawano,
ronga titila'ira mianono pompoweehi. »a
9 Kito kanahi, « moleka », na'iaa bara batuano, hi ari metiihako hai puri wita dahano ola-olaro?b 10 Koie da arimo tii, koiemo da sabe monto-montoepo ka'iaa pera da da'a hai langi, kai poponotio luwu. 11 Ronga Iaamo da ari titila'ira mianono: meha tewali rasulu ronga nabii, kai tii meha da moleleako Lele Mohende, yahopo powawai da piaraa jema'a, naamo guru. 12 Patuduno luwuo koie yahoo mokongkoa'ira miano mparasaea danta mpohedo pasipolee umati, kai pinokomorodo jema'a kana wotoluno Kristus, 13 kai dungku luwunto boboto mparasaea, ronga to'orio dadaano Anano Apu Alla. Yahopo kato tewali miano nto'ori, ronga tetiani sai tekebaako dungku mengkenaa Kristus.
14 Kicanamo koie, icita na'iaamo kana anadalo da pinuale moraa morumai, ronga pinokowahe-waheno pera giuno pompotisudo miano mengkule, ronga pinokomporeno akalado da mosa'o. 15 Sawali kahioomo kato ungkaario pompotisu da menona ronga mololaro, e'elengua tora tewali miano nto'ori moweweu kana Kristus, ponggawano jema'a. 16 Iaamo da ari atoro'o luwu wotolu kai tesusu moico, ronga kinoko kai morodo koa'o losuano. Ki pohedo moicomo koie tee-tee'asa pokosangkano nunu'o tugasino, dahiramo nta tora mpekalolaro wanguo wotoluno.
Manusia tonia
17 Nangkuamo koie, kupo'awaakokomiu ronga oliwicomiu nunu'o da po'eheno Apu, kami osiemo penda tora kana miano da sai to'orio Apu Alla da mpepekiri sahina gunano. 18 Rondomaamo pinehawado ronga nando da'apo to'orio toraaha da mebinta hai Apu Alla, tendenomo porendo ronga motea rapando. 19 Nahinamo ko'anundo, yahomo kando nunu'o po'eheno larondo, ronga tora mpo'endeohi.
20 Sawali icomiu, na'iaa koie da ari pinepopotisu'akomiu mekona dadaano Kristus. 21 Kana'umpe mimpodeahomo dadaano Kristus, ronga aricomiumo pinotisu'ako sipano Apu Alla da da'a hai Yesus. 22 Nangkuamo koie, mibintaamo bangumiu da mengkau, kana toramiu iso-iso, da sinosa'ono kea-kea mosa'o da mokomporekomiu. 23 Kahioomo sangkoleomiu ronga pekirimiu kai niboli'i to'u, 24 kami mpesipa'ako bangumiu da tonia, da pinokodadi nunu'o sipano Apu Alla, tekona, mewota, ronga molinyaa mpelaroa da santo'u-to'u.
25 Nangkuamo koie, mi'osiemo mpekulepi, mimpogaumo da menona pada-pada comiu, kana'umpe luwunto pada-padasi pokosangkano da me'asa wotolu. 26 Ki mosa'o laromiu, osie mpoweweu da sai po'eheno Apu Alla. Osie masusa ngkaida'a dungku kai sumoo oleo, 27 kami osie mokontepoweweuho ponggawano bilisi kai pokontuunakomiu hai bolo dosa. 28 Miano da mononako, osiemo da e'elengua mononako, sawali kai pekoramo mohedo nta tinoraakono da halala, ronga to'ori montulumi suere miano da kakuranga.
29 Osie mogau ngkabaria, sawali gau da koguna da mokomorodoo pelaroando miano, kana da paraluudo, nta nimoicoakondo miano da modeaho. 30 Ronga mi'osie popoetio larono Sangkoleono Apu Alla. Aricomiumo pineto'oako koie Sangkoleono hicua comiu mianono Apu Alla. Koie peto'o menteehanomo hi daa nta leu oleo dahano Apu Alla nta hudakomiu. 31 Luwu poe laro, mekikilowu, sa'o laro, megagahi, montumbu, kahioomo kai osie da'a hai comiu, kanapo pera da mosa'o. 32 Kahioomo kami ngkolaro, mpekamoicoako laro, ronga pada mpeka'ampu-ampuni, kana Apu Alla hi ari ampunicomiu tendenomo himi boboto'akono Kristus.