Patuduno Apu Alla da tewuniako
3
1 Nangkuamo koie, i'aku die i Paulus miano da metorungku'ako Yesus Kristus, tendenomo comiu da sa'iaa miano Yahudi. 2 Matantuomo dakomiumo modeaho moicono larono Apu Alla kai patugasiaku tendenomo comiu. 3 Apu Alla ariomo palenga'akuo patuduno da tewuniako, kana ku'ari buri ongkundaakokomiu'o die hai sura.a 4 Ronga kimi basaamo, dakomiu nta to'orio pompahaku dadaano patuduno da mekona hai Kristus. 5 Apu Alla nai paisa mo'awaakondo koie patuduno hai miano mperi'ou, sawali diekana, Sangkoleono Apu namo'awaakondomo ko'ira rasulu ronga raro nabii da ari tinindahakono. 6 Koie patudu ihinomo Lele Mohende, yahoo: ko'ira miano da sa'iaa miano Yahudi itaihiramo mo'awa tilari mebinta hai Apu Alla, hindona mparasaeaho Lele Mohende, itaihiramo tewali pokosangka hai wotolu da me'asa, ronga itaihiramo mo'awa barakati da ari nidandino Apu Alla tendenomo Yesus Kristus.7 Kai poweehaku pololarono Apu Alla da kuasa mohedo hai bolo mpelaroangku, kai patugasiaku tewali miano ntinenano leleako koie Lele Mohende. 8 Hai luwu umatino Apu Alla, i'akumo die miano da sai hina pekonaangku, sawali tendenomo koie pompeehawano i'aku, kai tena'aku leleako barakatino Kristus da sai tekira-kira hai ira miano da sa'iaa Yahudi, 9 kando to'orio luwu miano koie patuduno Apu Alla da sai tino'ori, da teporewu-rewu ta'u niwuniakono, Iaamo da ari padadio pera da da'a. 10 Patuduno Apu Alla diekana yahoo: mentete hapa da niweweuno hai jema'a, kando to'orio pera kasangi-sangia da kuasa ronga da mpomparenta hai laamoa, hi owose ronga mandara ponto'orino Apu Alla, 11 nunu'o patuduno da sai teboli'i, da ari pinokodadino mentete hai Yesus Kristus Apunto. 12 Diekana toda'amo momee okudahio Apu Alla, hitona mparasaeahomo Apu Yesus ronga boboto'akono. 13 Nangkuamo koie, kupo'ita hai comiu kai osie motewe laromiu hicu daa marasai tendenomo comiu, kana'umpe luwuo koie patuduno kami itai pinoko'owose merongaa Apu Yesus.
Amalano i Paulus
14 Koiemo sababuno kaku kokolontuu amala hai ra'ino Apu Alla Tamanto, 15 da ari moweehira nee luwu koluargaa da hai suruga ronga hai wita'ea. 16 Kupo'ita hai Apu Alla da nireree, pu'uno barakati da kawasa, kai pokomorodoakono'o pelaroamiu kuasa Sangkoleono, 17 kai poo'ia koie Kristus hai pelaroamiu tendenomo himi mparasaeaho. Ronga kupo'ita kami mpepu'uako ronga kohaka'ako pololaro. 18 Kupo'itaakomiu ronga pera miano mparasaea kami nto'ori paha to'uo molueno, mentaano, montoeno, ronga olarono pololarono Kristus. 19 Ehepo kami nto'orio koie pololarono, da mokulaloiho pera ponto'orino to manusia, dungku kai pokongkoa'akomiu'o luwu sipano Apu Alla.