Luwuo te'iaasi pompeehawano Apu Alla
2
1 Iponoha daamiupo sai parasaea, kami mate tendenomo sinalakimiu ronga dosamiu. 2 Koie tempo tora da ninunumiu yahoo torano miano wita'ea, kami nunu'o po'eheno ponggawano bilisi da momparenta hai laamoa, koiemo da mohedo diekana hai pelaroando miano madoraka. 3 Iponoha cita na'anta kanasi ko'ira miano, daantopo nunu'o kea-keano wotolu naamo po'ehento ronga pekirinto da mosa'o. Koie tempo, cita na'anta nta kinonano sa'o larono Apu Alla, kana ko'ira suere miano.4 Sawali taperano owose pompeehawano Apu Alla! Tendenomo hi to'u-to'u lolarokita, 5 yahomo kai potorakita merongaa koie Kristus, mau aricitamo mateako sinalakinto. Dadi, te'iaasi pompeehawano Apu Alla kami salama. 6 Ronga tendenomo hito boboto'akono Yesus Kristus, kai wangusakokita Apu Alla, kai poweekita totoro'a merongaa Kristus hai suruga. 7 Kai weweuho kana koie Apu Alla, kai ontoo to manusia oleo perumbui, hi dompa owose pompeehawano ronga moicono larono hai cita tendenomo Yesus Kristus. 8 Kana'umpe kami salama tendenomo pompeehawano Apu Alla mentete hai parasaeamiu. Na'iaa pasipolemiu, sawali yahoo pompoweehino Apu Alla. 9 Na'iaa pohedoamiu, kai osie da'a miano da mentaba'ako. 10 Kana'umpe cita die miano niweweuno Apu Alla, da pinokodadino tendenomo Yesus Kristus, kato poweweu da moico, hi ari mompasadia kato nunu'o.
Kato boboto tendenomo Apu Yesus
11 Nangkuamo koie, comiu miano da sa'iaa miano Yahudi, mimpehawa'o, iponoha miano Yahudi neekomiu miano da sai mpesuna. Arumaimo kanahindo ko'ira miano da ari mpesuna, da da'a peto'ondo hai wotolundo da ari niweweuno limano miano. 12 Kana'umpe koie wotu nami da'apo to'orio koie Kristus, nami ntewiso wargaa Israil umatino Apu Alla,a ronga nahina tilarimiu hai pedandino Apu Alla. Nahinapo dahamiu momperahi-rahi, ronga ponto'orimiu nahina Apu Alla die wita'ea. 13 Sawali diekana, tendenomo himi boboto'akono Yesus Kristus, comiu da mentala iponoha, diekana me'okudakomiumo, tendenomo reano Kristus.
14 Kana'umpe Iaamo da pokomoicokita miano Yahudi ronga da sa'iaa, kato boboto. Kai mate wotoluno koiemo porowakino wala da posincaa miano da medalu. 15 Koiemo da kikihio pera parenta ronga atora da teburi hai bokuno nabii Musa. Patuduno kai pokoboboto'ira miano Yahudi ronga da sa'iaa, tewali me'asa manusia tonia da boboto'akono, kai pokontepokonahira. 16 Tinaweakono i Yesus Kristus hai keu mpinotalambe yahomo da pokoboboto'ira koie orua suku da medalu, ronga da mokontepokonahiramo hai Apu Alla. Yahomo kai puramo pedalua. 17 Koiemo nileuhakono, yahoo mowawa lele ntepokonaa hai comiu da mentala, ronga hai ira da okuda. 18 Tendenomo Iaa, kato to'ori okudahio Apu Alla Tamanto, cita miano Yahudi ronga da sa'iaa, meronga pontulumino Sangkoleono Apu.
19 Diekana, comiu koie na'iaamo miano sumoo atawa miano leu, sawali tewalicomiumo asa rompu umatino Apu Alla, ronga ihi rahano Apu Alla, 20 da niwangu hai wawondo rasulu ronga nabii kana watu pondasi, ronga i Yesus Kristus kowati watu pompu'uino. 21 Iaamo da atoro'o ko'ira watu kai tesusu moico, kai tewali raha da tetindahako tarono Apu. 22 Himi boboto'akonomo Apu Yesus, itaicomiumo inengkatako tewali raha poo'iahano Sangkoleono Apu Alla.