Surano i Paulus hai jema'a
Efesus
Salamu
1
1 Die sura mebinta hai aku Paulus, rasuluno Yesus Kristus nunu'o po'eheno Apu Alla, nta dungku hai miano mparasaea da hai Efesus da konianto'u nunu'o Yesus Kristus. 2 Kahioomo Apu Alla Tamanto ronga Apu Yesus Kristus kando peehawakomiu ronga mapuhiakomiu'o barakati.Barakatido miano ntinindahakono Apu Alla
3 Tereree'omo Apu Alla Tamano Apunto Yesus Kristus da ari tilariakita'o luwu barakati da hai suruga. Koie barakati da mapuhio sangkoleonto, tendenomo hito pono-ponohaakono Kristus. 4 Iponoha nahinapo die wita'ea, ariomo Apu Alla tindahakokita tendenomo Kristus, kai mewota ronga molinyaa pelaroanto naamo sai tekebaako hai ra'ino. 5 Mebinta iso-iso kai lolarokita ronga patantuo kato tewali anano, mentete hai Yesus Kristus, nunu'o po'eheno ronga patuduno. 6 Nangkuamo kai tereree hi owose pompeehawano hi ari tilariakita'o Anano da telou.
7 Kana'umpe tendenomo reano kai hudakita ronga ampunio sinalakinto, hina owose kawasa pompeehawano Apu Alla icita. 8 Tende mandarano ronga ponto'orino da olaro, 9 kai po'awaakita po'eheno da tewuniako, nunu'o patuduno da meri'ou inotuhino danta niweweuno mentete hai Kristus. 10 Ronga diemo patuduno: ki dungkumo tempono, koie Kristus nta tewali kapala da pokome'asa'o luwu da da'a hai suruga ronga hai wita'ea.
11 Apu Alla weweuho luwu nunu'o po'otuhino ronga po'eheno pantano. Nunu'o patuduno, mebinta iso-iso kai tindahakokita tewali umatino da boboto'akono Yesus Kristus. 12 Patuduno Apu Alla hai cami da momperahi-rahi meri'ou hai Kristus, kako reree'o hi owose kuasano. 13 Tendenomo i Yesus, kami mpodeaho haratia da menona, yahoo Lele Mohende nta nisalama'akomiu. Ronga himi mparasaeaho i Yesus, yahomo Apu Alla kai peto'oakokomiu'o Sangkoleono hi ari dandicomiu. 14 Koiemo Sangkoleono Apu Alla pe'ungkaa'anto hito daa nta awaa tilarinto. Koie mentoda'anomo hi daa Apu Alla nta huda'o umatino, kai reree'o kuasano da owose.
Amala kato paha'o kuasano Apu Yesus
15 Nangkuamo koie, saku podeaho himi mparasaeaho Apu Yesus, ronga pololaromiu miano mparasaea, 16 naku ari-arimo montarimakasi hai Apu Alla tendenomo comiu. Ronga sadia kudaa neeho neemiu hai laro amalangku, 17 ronga mo'ita hai Apu Alla, Apuno Yesus Kristus Apunto, Tamanto da owose, kai poweekomiu pinehawa motu'a ronga paha mebinta hai Sangkoleono, kami nto'orio Apu Alla sameno-menonaano. 18 Kupo'ita kai pokomolinyaahakomiu'o Apu Alla mata mpelaroamiu, kami nto'orio da pinerahi-rahimiu hi ari dandicomiu Apu Alla tempono boboicomiu, hi ntaperano ko'angga kawasano nta tilano miano da tinindahakono, 19 ronga taperano owose kuasano hai cita da parasaeaho. Mokorano koie kuasano Apu Alla pengkenaa kuasano 20 tempono wanguo koie Kristus mebinta hai raro miano mate, ronga motoro'o hai muanano Apu Alla hai suruga. 21 Totoro'ano Apu Yesus kolaloo montoe ka'iaa pera da mpomparenta, ronga da kuasa, ronga ka'owose, ronga da momokole, naamo luwuo pangkati da montoe, na'iaa te'iaa diekana, sawali ronga oleo danta leu. 22 Luwuo da da'a ariomo Apu Alla soroo hai tonto karuno Apu Yesus, ronga weehakondo'o jema'a koie Apu Yesus kai tewali kapalano pera da da'a. 23 Koie jema'a yahomo wotoluno. Iaamo pepokongkoa'ano jema'a,a ronga Iaamo mondo'ano luwu da da'a.