Pinokontekona tendenomo parasaea
3
1 Kompura-puraano, raro mpetilaku, mimohendemo hai Apu. Nai pontangkoro larongku duduhio buriakomiu'o kana da ari niburincu meri'ou, nangkua nta nimoicoakomiu.2 Midagai'ira ko'ira miano da mesipa'ako sipano dahu, da moweweu mosa'o, ronga da pakisaa'o miano mpesuna nunu'o Boku Parentano nabii Musa. 3 Kana'umpe icitamo da ari tarimaa suna da santo'u-to'u, yahoo mesombaiho Apu kana pompotisuno Sangkoleono, ronga mohende'ako Yesus Kristus, na'iaa momperahi-rahi koie da inonto. 4 Santo'u-to'uahano, i'aku na'angku tewalio kaku pomperahi-rahi ko'ira daakana. Ki daa miano suere da me'alu pomperahi-rahiano da inontono mata, lalo'eahopo i'aku. 5 Umurungku kaku pesuna hoalupo oleo, pembue'angku miano Israil, sukuku Benyamin. I'aku miano Ibrani to'u, i'aku miano Farisi, nangkuamo kaku nunu to'uo Boku Parentano nabii Musa. 6 Tendenomo hicu pangkuku nunu'o agama Yahudi, yahomo kaku pompakasea miano Ngkarasitee. Kicua nunu'o Boku Parentano nabii Musa, naku tekebaako.
7 Koie luwu da meri'ou inanggaku laba, diekana ku'angga'o karugia tendenomo Kristus. 8 Deenapo, luwu ku'angga'o hi sahina gunano, kana'umpe nangkolalo owose anggano hicu to'oriomo Yesus Kristus Apungku. Yahomo kaku bintaa ko'ira luwu ronga angga'o kana saro, kaku to'ori awaa Kristus, 9 ronga boboto'akono. Na'iaa hicu pinokontekona tendenomo nunu'o Boku Parentano nabii Musa, sawali tendenomo parasaeaho Kristus, yahoo Apu Alla da pokontekonaaku hicuna mparasaea. 10 Da pinokeahakongku yahoo: kaku to'orio Kristus ronga kuasa da pokontoraa mbule, kaku itai merongaa marasai, kaku tewali kana Iaa hai laro mateahano, 11 ronga momperahi-rahi kaku niwangusi na'angku mebinta hai raro miano mate.
12 Naku da'a kanahi hicu tarimaamo, dungku tewali miano da sai tekebaako, sawali dahaku lulu'io kicu daasi nta merapio, kana'umpe i'aku die terako'akumo hai Yesus Kristus. 13 Raro mpetilaku, naku da'a angga'o hicu daamo ungkaario koie da nilulu'incu. Sawali da niweweungku diekana yahoo, mekolu-kolumpee da ari tealo, kaku pekora o'alahio da hai ra'incu. 14 Dahaku mekalulu o'alahio dahangku nta mo'awa parasee, yahoo peboboino Apu Alla nta lako hai suruga mentete hai Yesus Kristus. 15 Icita da mengkaumo parasaea, kahioomo kato pepekiri kana koie. Sawali ki daa hai comiu da suere po'awano, dahosi Apu Alla danta mokomentoda'akomiu'o. 16 Sawali kahioomo kato tora nunu'o atora da ari tinealohinto dungku diekana.
Oliwi hai jema'a
17 Raro mpetilaku, kahioomo kami nunu'o banguku. Icami da tewali pe'ontoamiu. Pekokoohira ko'ira miano da nunu'o niweweumami. 18 Kana'umpe manturu'akumo mo'awaakokomiu, naamo diekana ronga wowo kudaa mo'awaakokomiu penda, hi me'alu miano da sa'ia-iaa tora-torando, dungku kando sosa'oo batuano nimateakono Kristus hai keu mpinotalambe. 19 Torando ko'ira miano daakana kompura-puraano nta hancuru, pesombaando yahoo hai tiando, kando te'angga yahoo moweweu ko'anu, da pinehawado te'iaasi hapa da da'a hai wita'ea. 20 Sawali die cita yahoo mianono suruga, kokeenamo pebintaano Pompokosalama da tinotarimanto, yahoo Apu Yesus Kristus. 21 Iaamo danta boli'io die wotolunto da modengke kai tewali kana wotoluno da te'angga, tendenomo kuasano da mokopaturu'o luwu.