4
1 Nangkuamo koie, raro mpetila da nilouku ronga nimoko'auhakongku, kahioomo kai modoro pentademiu boboto hai Apu. Icomiumo mohende'angku ronga tila mpeponangincu.Oliwi kompura-puraano
2 Euodia ronga Sintikhe, ku'oliwicomiu, kami boboto mpinehawa, kana miano mpe'asa mparasaea hai Apu. 3 Ronga co'o na'au, Sunsugos da konianto'u, kupo'ita kau oliwihira ko'ira tina da orua kando boboto. Arihira mekora itaihaku moleleako Lele Mohende, kanapo na'ana koie i Klemens ronga ko'ira simbauku meha, da teburimo neendo hai boku ntoraahano Apu Alla.a
4 Kahioomo kami sadia memohende himina boboto'akonomo Apu. Teponohanopo penda kukanahi, mimohendemo. 5 Kahioomo kai to'orio luwu miano himi ngkolaro. Apu okudaamo! 6 Mau ki hapa da kadadia, mi'osie tewereako, sawali mi'amala kami sabahako pino'itamiu ronga pe'e'etamiu hai Apu Alla, ronga mimpontarimakasi. 7 Mapuhino Apu Alla da mokulaloiho luwu akalano manusia danta dagai'omo pinehawamiu ronga pekirimiu da pono-ponohaakono Yesus Kristus.
8 Dadi perumbuino, raro mpetilaku, kahioomo kami mpepekiriako luwu da menona, da te'angga, da adili, da sai tekebaako, da mompokosanaa pelaroa, luwu da moico pinodedea, da kolalo moico, ronga da pantasi nireree. 9 Ronga hapa da ari pinepopotisu'akomiu, tinarimamiu, pinodedeamiu, ronga inontomiu hai aku, kahioomo kami weweuho. Apu Alla pu'uno mapuhi danta merongakomiumo.
Pontarimakasino i Paulus
10 Taperangku mohende hai Apu, tendenomo hi tora mbule pompeehawamiu nta tulumiaku. Menonaa, taperamiu mehawa'aku, sawali mengkaukomiumo sai tepoweweu. 11 Die kaku kanahi, na'iaa hi daa awaaku kakuranga, kana'umpe ariakumo mepopotisu nta sanaa larongku, mau ki kana'umpe dadaangku. 12 Kuto'orio tora marasai atawa tora sanaa, mowohi atawa mokohuloo, kawasa atawa kadee-dee, luwuo ko'ira ariakumo tealohio. 13 Meronga kuasano Apu Yesus da pokomorosoakumo, kaku tule'i rora'io ko'ira luwu.
14 Mau kicana koie, moicoo himi ehe tulumiaku daangku marasai. 15 Raro mpetila miano Filipi, dakomiumo to'orio isoku lako mebinta hai Makedonia moleleako haratiano Apu Alla, te'iaasi comiu da totoahaku. 16 Mau daangku hai Tesalonika, manturukomiu nte mokatuaku hapa da paraluuku. 17 Da kontu'uma pinokeahakongku na'iaa pontulumi, sawali te'iaasi kami mpo'awa barakati tendenomo petotoamiu. 18 Diekana kutarimaamo luwu pompoweehimiu. Nahina kakurangangku, hapa da da'a hai aku kolaloomo. Koie da niwawano i Epafroditus kanamo pesomba da mowondu, ronga kanamo sinumbele da te'ehe hai ra'ino Apu Alla. 19 Apu Alla Apungku danta pokongkoa'akokomiu'o da paraluumiu mebinta hai kawasano da sai nta pura tendenomo Yesus Kristus. 20 Tereree'omo Apu Alla Tamanto samengka-mengkauno. Amin.
Salamu
21 Pokodungku'akuo salamungku hai koa-koa'o miano da parasaeaho Yesus Kristus. Salamundo petila mpe'asa imanincu da perongangku. 22 Salamumiu mebinta hai pera miano Ngkarasitee, kontu'uma da meda'a hai raha mokole'eano Roma.
23 Kahioomo barakatino Apu Yesus Kristus danta merongakomiu.