Boboto ronga owawa laro kana Kristus
2
1 Morosoomo pelaroamiu tendenomo himi boboto'akono Kristus, ronga pololarono da lilimboicomiu. Sangkoleono Apu wowawakomiu, naamo mimpekapee-peehawa ronga mpekalolaro. 2 Nangkuamo koie, kahioomo kami mpokosanaa'o larongku himi mpe'asa mpelaroa, me'asa mpekiri, me'asa mpinehawa, ronga me'asa mpatudu. 3 Osie moweweu dahamiu nta sanaa pantamiu atawa dahano nta kanahi miano himi dago, deenapo kai owawa laromiu kami angga'o suere miano hi kolalo te'angga ka'iaa pantamiu. 4 Osie te'iaasi meehawa'o nta sanaa'ano laromiu pantamiu, sawali mimpeehawa'o nta nimoicoakondo suere miano.5 Kahioomo hai laro ntoramiu kami mpepekiri ronga kompepeehawa kana Yesus Kristus. 6 Mau hi pesipa'ako sipano Apu Alla, sawali nai mokea me'o'oloiho anggano kowati Apu Alla. 7 Deenapo paruruo wotoluno kai tewali kana me'asa ata ronga tora kana to manusia. 8 Laro ntewaliano manusia, kai poko'owawa'o wotoluno ronga nunu'o po'eheno Apu Alla dungku mate, yahoo mate nibasiropa hai keu mpinotalambe. 9 Yahomo koie, kai taarako Apu Alla monto-montoe ronga moweeho nee da mokulaloiho pera nee. 10 Koiemo neeno Yesus nta mpesombaando luwu da da'a hai suruga, hai wita'ea, ronga hai tontono wita, 11 nta mangaku'ano luwu miano, hicua Yesus Kristus Apundo, kai nireree Apu Alla Tamanto.
Konianto'u weweuho nta sinalama'akomiu
12 Nangkuamo koie, raro mpetilaku da telou, mi'e'elengua nunu'o oliwincu kana daanto mperonga, lalo'eahopo diekana hi sato da'amo. Kahioomo kami ngkonianto'u mohedo kai moico toramiu, kana miano da ari pinokosalamano Apu Alla. 13 Nangkua pantano Apu Alla da mohedo hai bolo mpelaroamiu, yahomo kami ehe nunu'o ronga to'ori weweuho da po'eheno.
14 Hai luwu da niweweumiu, mi'osie mpengungu ronga mpegagahi. 15 Kicanamo koie bangumiu, nami da'amo nta tekebaako mosa'o atawa pinosala'i, kana anano Apu Alla da sai hina tesalamiu hai tongado miano ngkabaria da mosa'o pelaroando kami nto'ori wincahi'ira kana olimpopo da wincahio wita'ea, 16 ronga leleakoakondo'o koie haratia da mompokontora. Kicanamo koie, dahomo sababuno kaku mohende ki dungku leu mpenduahano Kristus, tendenomo hi sai da'asi sia-sia kokaungku hicu ari mohedo. 17 Sawali mau kicuamo nta tinesolo'akono reaku nta pompokomondono pesombamiu hai Apu Alla tendenomo parasaeamiu,a dahaku nta mohende'ako, kaku sanaa merongakomiu. 18 Kanapo comiu dakomiu nta itai sanaa ronga mohende merongaaku.
I Timotius ronga i Epafroditus
19 Pomperahi-rahincu ki po'eheno Apu Yesus, dahaku nta tena'o i Timotius kai merare lako awakomiu, kai sanaa larongku tendenomo lelemiu. 20 Kana'umpe nahina te'asa miano da pe'asa mpinehawaku, te'iaasi iaa da santo'u-to'u padulio pera da paraluumiu. 21 Luwundo te'iaasi urusio tinoraakondo pantado, nando pompeehawa pohedoano Yesus Kristus. 22 Minto'oriomo, konianto'uno bantu'aku hai laro mpoleleakoa Lele Mohende, oruakami kana to'u da me'o'anamami. 23 Nangkuamo kaku daa nta oru tena'akomiu'o, ki manasamo nta dadaano koie kara-karaku. 24 Sawali kuna mparasaea, ki po'eheno Apu, dahakusi nta oru leu awakomiu.
25 Koie petilato i Epafroditus da ari tinenamiu kai leu tulumiaku, paraluu'o kaku tena'o kai pohule awakomiu. Ariomo bantu'aku laro mpohedoangku kana miano da itai mamusu. 26 Kana'umpe taperano moko'au larono hai comiu, ronga tewere pinehawano himi mpodeahomo hi daa morungku. 27 Menonaa, ario morungku, ronga te'etenopo kai mate, sawali Apu Alla nalolaroo, ronga na'iaa pantano da nilolaro, sawali i'aku na'angku yahosi, kai osie lalo'ea mopoe larongku. 28 Nangkuamo koie, kaku tena'o kai oru mohule, kami ontoo ronga sanaa laromiu, kai morodo pinehawaku. 29 Dadi, misanaamo kami ntarimaa kana petila sa'imani. Ronga pera miano da kana iaa, kahioomo kami angga'o. 30 Kana'umpe tendenomo pohedoano Kristus te'etenomo kai mate, laronto'uno soroo penaano tulumiaku popo'eukomiu.