Surano i Paulus hai jema'a
Filipi
Salamu
1
1 Die sura mebinta hai aku i Paulus ronga i Timotius atano Yesus Kristus, nta lako hai luwu miano mparasaea hai Filipi da boboto'akono Yesus Kristus, ronga hai luwu powawaino jema'a, naamo miano pinokotena-tenado. 2 Kahioomo Apu Alla Tamanto ronga Apu Yesus Kristus kando peehawakomiu ronga mapuhiakomiu'o barakati.Montarimakasi ronga amala
3 Kohoko kupokopehawakomiu, nilakoku montarimakasi hai Apu Alla Apungku. 4 Koa ku'amalaakokomiu, mohende'o larongku. 5 Kaku pontarimakasi hai Apu Alla tendenomo himi itaihaku mowawa Lele Mohende mebinta iponoha dungku diekana. 6 Apu Alla da ari tampu'uo koie pohedoa moico hai comiu, ronga parasaeahaku, Iaamo danta poko'ario dungku kai leu mpendua Yesus Kristus. 7 Pantasiomo kaku pepekiri kana koie, kuna mpeehawakomiu hai pelaroangku, kana'umpe tona mperonga pontarima barakati hai Apu Alla tona mpe'asa mpohedo, mau daangku tetorungku, kanapo hicu peluarako, kaku pokomentoda'akondo'o hi menona koie Lele Mohende mebinta hai Apu Alla hai ira miano da sai ehe tarimaa. 8 Apu Allamo da to'orio owoseno moko'auno larongku hai comiu, kana polouno Yesus Kristus icomiu.
9 Diemo amalangku, ehepo kai e'elengua tetiani pololaromiu, ronga pera ponto'orimiu, naamo pompahamiu da menona, 10 kami nto'ori tindahako da moico, ronga molinyaa mpinehawa, nami da'amo nta tekebaako ki leu mpendua Kristus. 11 Toramiu dahoo nta kowua'ako niweweu da moico da mebinta hai Yesus Kristus nta pinoko'owose'ano ronga tereree'ano Apu Alla.
Dadaano Paulus hai torungku
12 Raro mpetila, mokeahaku kami nto'orio, hapa da inawangku koiemo da pokome'aluo miano da modeaho ronga da parasaeaho Lele Mohende mebinta hai Apu Alla. 13 Nangkuamo ko'ira tantara hai bolo rahano mokole ronga luwu miano suere kando mento'orio hicua kaku tinorungku tendenomo leleako haratiano Kristus. 14 Koiemo hicu daa metorungku, kai morodo parasaeando hai Apu ko'ira miano Ngkarasitee, ronga tetiani moseka naamo sai momee leleako haratiano Apu Alla.
15 Dahoo miano da moleleako Kristus tendenomo singgira ronga sai ntepokona, sawali dahoo penda da leleako tendenomo pelaroa da mongkote. 16 Ko'ira miano leleako Kristus tendenomo pololaro, ronga hindona nto'orio hicua Apu Alla da tena'aku leu na'ai leleako koie Lele Mohende hi menona. 17 Sawali ko'ira miano suere nangkua akala mpantado ronga patudu da sai molino, ponto'orindo kicanamo koie dahiramo mokomasusa'o pinehawaku hai bolo ntorungku.
18 Sawali nai da'a mohapa, nta daanomo Kristus nileleako, mengkena sai laronto'u ronga laronto'u, dahakusi mohende. Naku da'a nta ari-ari mohende, 19 kana'umpe dahakusi to'orio hicu daa nta niluarako hai torungku, tendenomo amalamiu kaku salama ronga pontulumino Sangkoleono Yesus Kristus. 20 Da pinokeahakongku ronga da pino'itangku yahoo kaku osie mokoko'anu hai luwuo torangku. Pomperahi-rahincu kaku e'elengua moseka mogau, kana iponoha, lalo'eahopo diekana, kai tereree Kristus tendenomo i'aku, kana penaa ronga wotolungku, hai laro torangku dungku mateahangku. 21 Kicua i'aku, die torangku te'iaasi nta poko'owose'o Kristus, ronga kicu mate, kolaloo moico. 22 Sawali kicu tora die hai wita'ea, koie batuano mohedo da koguna. Dadi, naku to'orio maina nta nirurukincu. 23 Te'asi'akumo: mokea lako nunu'o ronga moo'ia meronga Kristus, koiemo da kolalo moico. 24 Sawali hinangkua comiu, paraluu'o kaku poo'iapo die hai wita'ea. 25 Koie matantungkuomo. Kuna nto'orio dahakupo nta moo'ia merongakomiu nangkua dahano nta e'elengua tetiani moroso parasaeamiu ronga mohendemiu hai Apu. 26 Kana'umpe kicu pohule awakomiu, dahomo nta tetiani sanaa laromiu reree'o Yesus Kristus tendenomo i'aku.
Oliwi kai sadia boboto
27 Da paraluu diekana toramiu kai pantasi nunu'o kana pompotisuno Lele Mohende dadaano Kristus. Kana'umpe kicu leu awakomiu kaku ontoo, atawa ki saku leu kaku podeakomiu, himi daasi meboboto mpelaroa, me'asa mpatudu, morodo parasaeamiu kami daasi boboto hai Lele Mohende. 28 Kahioomo kami sadia moseka rora'io pedalumiu. Koiemo peto'o kando to'orio hindo daamo nta binasa, ronga comiu danta salama, kana'umpe wotoluno Apu Alla danta pokosalamakomiu. 29 Kana'umpe aricomiumo pinoweehi barakati, na'iaa te'iaa parasaeaho Kristus, sawali ronga marasaihakono. 30 Diekana, po'awakomiumo kana da ari inawangku, yahoo da ari pine'o'anuakongku, kana da inontomiu meri'ou ronga da pinodeamiu dadaangku diekana.