Erongithsa yo pa mukinya
5
Diyuwa dimweya Yesu ou a monine mbunga, wa thzire pa mukinya no ku kekara. Erongwa yenthzi ya keyire ku kwenthzi, 2 ngou a tatekire ku i rongithsa.Thsiyauthzi
3 Wa ambire ci:
“Akwathsiyauthzi ahepwe mu mupepo,
inene Kutumina ko ku Wiru po kwo.
4 Akwathsiyauthzi awa a di mu thsidiro,
inene kenge mba hengawethziwa.
5 Akwathsiyauthzi awa a cihuthsa kushi,
inene kenge mba tambura kaye.
6 Akwathsiyauthzi awa a fa nthzara no dinotwa dyowawa,
inene kenge mba rakwithsiwa.
7 Akwathsiyauthzi awa a di no ñeke kwamweya,
inene Nyambi naye kenge mba ekara no ñeke kukwo.
8 Akwathsiyauthzi awa a di no micima thzothzikenu,
inene kenge mba mona Nyambi.
9 Akwathsiyauthzi awa a retera anu amweya thsiyaro,
inene kenge mbethsiwa ana Nyambi.
10 Akwathsiyauthzi awa a nyandithsiwa mukaci ko ku kwama owawa,
inene Kutumina ko ku Wiru po kwo.
11 “Mwakwa thsiyauthzi ngeci anu aa mi tukathzana, ku mi nyandithsa no ku mi shangethza yoimango yo mishovoshovo mukaci ko ku ni shupwera. 12 Mu roere no ku nyanyuka, inene muyambo wenu mu wiru po ukuru. Nakwakukethza o kukare dya wa tendire nawo.
Mungwa no mwethzi
13 “Yamwe mwa mungwa o kaye. Unone ngeci mungwa u na tutukwa ne ngepi nga u kwamiwa karo ci u toware? Tumba u kwathsa thsimweya karo shime ku mwaiwera pora no ku dyatadyatiwa kwanu.
14 “Yamwe mwa mwethzi o kaye. Thsikuña thso ku umberiwa pa mukinya tumba thsi tawa ku horekiwa. 15 Karo kwithsa munu o ku muneka kambarambara no ku ka furumeka kafuma, unone aa ka paka pa thsimeko ci ka munekere wahe awa a di mu nthzio. 16 Mofoci namwe, mu thsie mwethzi wenu u munekere anu ci a mone ekwama yenu yoiwa no ku shangara Tata wenu o ku wiru.
Erongithsa yo Murao
17 “Mwa anekera ci naa keyera ku na pwithsa murao nerongithsa yakwakukethza, dyombo! Ka na ni keyera ku na i pwithsa, unone ku na i roithserera. 18 Naa mi tongwera yoshemwa ci diwiru no kaye o ku i shime ku pwa, kwithsa shaanga kataku ko shoonye nji kakwenyukwenyu aka ka ñoriwire mu murao aka ka ku tundithsiwamo, shime enu yoihe o ku i na kwanenena. 19 Munu yomuhe o ku corapo shaanga thso shoonye peyo eraerera no ku rongithsa amweya ku tenda kengeyo, kenge a kwithsiwa ci muonye mu Kutumina ko ku Wiru. Uno honi o ku i hengeka no ku i rongithsa amweya, kenge a kwithsiwa o mukuru mu Kutumina ko ku Wiru.
20 “Naa mi tongwera yoshemwa ci ngeci owawa wenu ka wa kupita wAfarithsi narongithsi o murao, mbera ka mwingena mu Kutumina ko ku Wiru.
Erongithsa mukaci koanthzi
21 “Mwa yuva eyi ya ambiwire kwakwathsañuru kukare ci: ‘Kadi o mukwa kwipaa, karo munu yomuhe o kwipaa aa roera ku raturiwa.’ 22 Unone ame naa mi ambera ci yomuhe o ku anthzipera muenthzenthzi, kenge a ku raturiwa. Karo, yomuhe o ku shwahura muenthzenthzi kenge a ku twariwa mu Nthzango. Karo noyu o ku ambera muenthzenthzi ci: ‘Owe o thsitomba!’ Aa roera mudiro o dihere.
23 “Mweyo, ngeci waa pa nupu pa katara owepo vuruka ci muenthzoe o na ku anthzipera, 24 o thsie nupu thzoe pa rupara ro katara no ku thza. O huke tango o ka ciamburwere na muenthzoe mbeci o keye ku na tupura nupu thzoe.
25 “O ciyuve na mukwathsithzimbo thsoe wanguwangu o ku mu di mu dikuñwa ku thza ku kuta. Inene ngeci amwepo mu ka kumako, kenge a ka ku twara kwa mukwakuratura, aye mukwakuratura kenge a ka ku pa mu moko o tupathso ci tu ka ku konthzere mu kamenga. 26 Naa ku tongwera yoshemwa ci ko wa ku tundamo shime ou wa ku manenena ku kura murandu ouhe.
Erongithsa keyi yo mirembe
27 “Mwa yuva eyi ya ambiwire ci: ‘Kadi o mukwa ku rembeka.’ 28 Unone ame naa mi ambera ci yomuhe o ku kenga mbuyama no ku u cikumbwethza, o na mu rembeka kare mu mucima wenthzi. 29 Ngeci dithziho dyoe dyo rudyo adyopo di ku twara ku thsivi, o di thzongoremo no ku di konthza. Ku di nawa ku yawa thsirama thsofoci kwirama yoe, kupita ci erama yoe yoihe i konthzeriwe mu dihere. 30 Karo ngeci dyoko dyoe dyo rudyo adyopo di ku twara ku thsivi, o di teteko no ku di konthza. Ku di nawa ku yawa thsirama thsofoci kwirama yoe, kupita ci erama yoe yoihe i thze mu dihere.
Erongithsa mukaci ko kufa ko maruo
31 “Mañoro karo aa amba ci: ‘Mukwerume yomuhe o ku rukurura munuwenthzi aa roera ku mu pa diñoro dyo ku mu rukurura.’ 32 Unone ame naa mi ambera ci ngeci mukwerume ayepo rukurura munuwenthzi, aa mu retera ci ekare o mirembe ngeci ayepo yekiwa kwa wao, shime ngeci aa mu rukurwera peamba yo mirembe. Karo no mukwerume o ku yeka mbuyama o ku rukururiwa o na rembeka.
Erongithsa mukaci ko kwethza ngoro
33 “Karo mwa yuva edi kwa ambiwire kwakwathsañuru ci: ‘Mwethza ngoro mwinu eyi mwa ku kwanga ku kwama. Unone mu kwamene Fumu enu eyi na mu mu kumbwethza ku mu kwamena.’ 34 Unone ame naa mi tongwera ci mwethza ngoro shaanga kamanana, ikare ko diwiru, inene thzodiyo ngunja thza Nyambi, 35 nji ko kaye, inene thsodiyo thsipura thso mauru enthzi, nji ko Yerusalema, inene thsodiyo thsikuña thsa Fumu Shokuru. 36 Karo wethza ngoro ko mutwi woe, inene tumba o twethsa ku pirura shaanga dihuki dyofoci ci dikare dyodikenu nji dyodiru. 37 Mu ambe pohuma ci: ‘Ii’ nji ci ‘Dyombo.’ Yo ku shumuna kweyo yaa tunda koyu o mumango.
Erongithsa mukaci ko kuhuthsera omango
38 “Mwa yuva ci kwa ambiwire kenge ci: ‘Dithziho no dithziho, dieo no dieo.’ 39 Unone ame naa mi ambera ci mwa kanena munu o mumango. Ngeci munu aa ku mbandura ku ditama dyo rudyo, o mu tengekere nedi dimweya kengeyo. 40 Ngeci munu aa ku twara ku kuta ku ka ku thzekithsa ci a shimbe hembe woe, o mu pe no vaki woe kengeyo. 41 Ngeci munu aa ku ootera ku mu shimbera mupango wenthzi kanano kofoci, o u mu shimbere tunano twidi. 42 O pe oyu na ku rombo, karo wa kanena oyu na foto ku korota ku koe.
Mu shime akwethzimbo yenu
(Luk 6.27-28, 32-36)
43 “Mwa yuva ci kuma kwa ambiwire ci: ‘O shime muenthzoe no ku thzimba mukwathsithzimbo thsoe.’ 44 Unone ame naa mi ambera ci: ‘Mu shime akwethzimbo yenu no ku romberera awa a mi nyandithsa.’ 45 Ngeci amwepo mu tenda kengeyo, kenge mu monithsa shemwa ci mwana Tata wenu o ku wiru, aye oyu na vithseranga diyuwa dyenthzi anu owamango nowa owawa, no ku rokithseranga mvura anu owawawa nowa o dipethso. 46 Ngeci amwepo mu shima pohuma awa a na mi shimi ne, muyambo mwine mwa ku wana? Kadi aterithsi nawo aa kwamanga kengeyo? 47 Karo ngeci amwepo mu vumenenanga pohuma aenthzenu ne, mwaa pita ngepi amweya? Kadi no mahedeni dya na kwamanga? 48 Mweyo, mwikare o kwononoka eci edi a di o kwononoka Tata wenu o ku wiru.