Yesu aa mu tumaura Satana
4
Mupepo Oukenu ngou wa twarire Yesu mu dikunguthsitu ku ka mu tumaura shamaonga. 2 Yesu ou a manine ku cikanga no nthzara mayuwa o makumi ane no mathsiku o makumi ane wa fire nthzara. 3 Aye mukwakutumauraa wa keyire ku kwenthzi no ku na mu ambera ci: “Ngeci yowe o Mwana Nyambi, o tumine aa mawe a piruke makende!”4 Yesu wa mu tawire ci: “Ku na ñoriwa ci: ‘Munu tumba a yoyo ko dikende pohuma, unone aa yoya ko diywi dyodihe edi di tunda mu kanwa ka Nyambi.’”
5 Shamaonga ngou a twarire Yesu ku thsikuña thso shokenu thsa Yerusalema no ku ka mu thzinithsa pa mutuya o Tembere. 6 Wa mu amberire ci:
“Ngeci yowe o Mwana Nyambi o reere pashi, inene ku na ñoriwa ci:
‘Kenge a ku tumina tungeru twenthzi ci tu kwakwere ko moko ato,
ci thsidyato thsoe katere thsi kuruke ku diwe.’”
7 Yesu wa mu amberire ci: “Ku na ñoriwa karo ci: ‘Katere o ereke Fumu Nyambi woe.’”
8 Karo shamaonga wa mu twarire pa mukinya oure nene no ku ka mu monithsa ofumu ouhe o kaye no kutethzima kwao. 9 Wa mu amberire ci: “Kenge ni ku pa yoihe eyi, ngeci o tongame ku ni rombera.”
10 Yesu ngou a mu amberire ci: “O tunde ku kwange Satana, inene ku na ñoriwa ci: ‘O rombere Fumu Nyambi woe, karo o kwamene aye pohuma.’”
11 Shamaonga ngou a thsiire Yesu, tungeru twa keyire no ku na mu kwamena.
Yesu aa tateka ekwama yenthzi mu Galilea
12 Yesu ou a yuvire ci Johani Mukwakukorovethza na a pakiwa mu kamenga, wa hukire ku Galilea. 13 Wa tundire mu Nazareta no ku ka tunga mu Kapenauma po pepi no Diviya dya Galilea, mu ditunga dya Zabuloni na Nafetali. 14 Eyi ya tendaharire ci i citombore neyi a ñorire mukwakukethza Isaya ci:
15 “Ditunga dya Zabuloni nedi dya Nafetali,
mu dikuñwa dyo ku thza ku diwate, mu thsambwadiya thza Jorodani,
Galilea wAnukenge,
16 anu awa a yoya mu mirema,
a na mono mwethzi oukuru!
Awa a yoya mu ditunga dyo muthzimbimbi o kufa,
mwethzi u na wa munekera!”
17 Ku tunda ethso thsikati, Yesu wa tatekire ku honga ci: “Mu cere evi yenu, inene Kutumina ko ku Wiru pepi ku di.”
Yesu aethsa erongwa yo kutanga
18 Diyuwa dimweya Yesu o ku thza o enda ku mukenga o Diviya dya Galilea, wa monine munu na minenthzi, Simoni oyu wethsiwire karo ci Peturu na minenthzi Andereasi o kwa konthzera dituwa dyo mu Diviya, inene nedi eyambi yothsi. 19 Yesu wa wa amberire ci: “Mu keye mu ni shupwere na ni mi rongithse ku yamba anu.” 20 Popo mwene a thsiire matuwa o no ku mu shupwera.
21 Ou a endireko ku tunda apo, wa monine karo munu na minenthzi, Jakovo na minenthzi Johani ana Zebedea aidi, awa ekarire mu wato na tata wo Zebedea o kwa honga matuwa o. Yesu wa wethsire, 22 popo a thsiire wato no tata wo, no ku mu shupwera.
Yesu aa rongithsa no ku porithsa anu
23 Diyuwa dimweya Yesu wa thzire o pita mu Galilea yomuhe o ku thza o rongithsa mu masinagoge o no ku honga yo Muthzimbu Ouwa o Kutumina ko ku Wiru, no ku porithsa ekora yo mishovoshovo yoihe no mawethzi mu kaci kanu. 24 Kapupo ka Yesu ka henyine mu ditunga dya Siria momuhe. Anu a retire ku kwenthzi akwakukora ekora yo mishovoshovo, mawethzi oakuru, akwamathzimu, akwathsinyonya, nakwakuara. Yesu wa wa porithsire wahe. 25 Anu owangi a mu shupwerire awa a tundire mu Galilea, mu Mambongi Dikumi,b mu Yerusalema, Judea, no mandau o mu thsambwadiya thzo Rware rwa Jorodani.