Erongithsa ya Johani Mukwakukorovethza
3
Mwao mayuwa, Johani Mukwakukorovethza wa monaharire no ku tateka ku honga mu dikunguthsitu dya Judea. 2 Wa ambire ci: “Mu cere evi yenu, inene Kutumina ko ku Wiru pepi ku di.” 3 Johani po yodiyo oyu a ambire yenthzi mukwakukethza Isaya ci:“Diywi dyoyu kuerera mu dikunguthsitu dyaa amba ci:
‘Mu roithse mukwakwa wa Fumu,
mu orore makuñwa enthzi!’ ”
4 Evata ya Johani kuma ya kwamiwire pohunga o kamere, kuma a ciangire mwiya o thsitumba mu mbunda, edya yenthzi nedi thsetuthsetu noki. 5 Kethsiya thsikati anu o mu Yerusalema no Judea yomuhe, nanu awa ekarire mu mandau aa a na cihata no Rware rwa Jorodani, wahe a thzire ku kwenthzi. 6 Ou a citawerire evi yo, wa wa korovethzire mu Rware rwa Jorodani.
7 Unone Johani ou a monine Afarithsi nAsaduki owangi o kwa keya oku a korovethzerire, wa wa amberire ci: “Amwe mwana mayoka, edye naa mi nomenithsa ku cira kuanthzi wa Nyambi ou u keya? 8 Mweyo, mu kwame ekwama eyi i na monithsa kucera evi yenu. 9 Mwa anekera mu micima thzenu ku amba ci: ‘Tu di no tata wetu Aburahama.’ Inene naa mi tongwera ci Nyambi aa twethsa ku kwamena Aburahama ana poa mawe aa! 10 Kamo ka na pakiwa kare pa mithzithzi thzetondo. Thsitondo no thsitondo thso kukana kwima ima yoiwa thsa ku henduriwe no ku kuheriwa mu mudiro.
11 “Ame naa mi korovethza ko meyu, ku monithsa ci mu na cera evi yenu. Uno honi oyu keya munyima thzange po mukoro kupita ame, ka ni roerire shaanga ku mu shimbera mashangu enthzi. Kenge a ku na mi korovethza ko Mupepo Oukenu no mudiro. 12 Thsihere thsenthzi mu moko enthzi thsi di ku yererekethza vuroto. Kenge a ku kundura oheke pa thsihoto thsenthzi no ku u paka mu thsishepa, uno honi muyungu ao kenge a ku u tumeka ko mudiro u shithzimana.”
Korovethzo thza Yesu
13 Kethsiya thsikati, Yesu wa tundire ku Galilea no ku thza ku Rware rwa Jorodani ci a ka mu korovethze Johani. 14 Unone Johani wa fotire kukana, wa ambire ci: “Owe po yowe o na roera ku ni korovethza, owe karo waa keya ku kwange?”
15 Unone Yesu wa mu tawire ci: “O tawe ci ikare kengeyo thsino thsikati, inene yaa roera ci tu kwame eyi ci owawa u citombore.” Johani ngou a tawire.